Трудовата инспекција поднела кривични пријави за двајца вработени во градежната фирма „Бетон“ бидејќи не презеле соодветни безбедносни мерки за работниците при изградба на северната трибина на стадионот „Филип Втори“, кога од скеле падна, а подоцна в болница почина 55-годишниот Живоин Петревски од Куманово. Истрагата утврди дека несреќата се случила бидејќи скелето било непрописно поставено. Кумановецот паднал од 15 метри висина и со амбулантно возило бил пренесен на Клиниката за анестезија и реанимација (КАРИЛ), каде што два дена подоцна починал. Од трудовиот инспекторат велат дека двете кривични пријави се за одговорни лица на градилиштето. Работниците тогаш се жалеа дека не се соодветно заштитени со потребната опрема што се користи на градилиште, дека работат по повеќе часови на плус 40 степени и дека за целиот труд не им плаќаат. - Освен кривичните пријави за непреземените безбедносни мерки, инспекторите констатираа и дека на работниците не им е платено прекувременото работење за месеците јуни и јули годинава и за работење на празнични денови. Инспекторатот го задолжи работодавецот да ги исплати платите, наредба што од фирмата беше реализирана - велат од Трудовиот инспекторат.
Од таму велат дека предметот засега е во скопското јавно обвинителство, кое, според доказите, треба да оцени дали ќе поведе обвинителен акт против одговорните луѓе во градежната фирма или не и дали ќе го прошири обвинението за други вработени.
За изградбата на северната трибина беше ангажирана фирмата „Бетон“, која имаше рок да ја изгради до 2 август годинава, пред натпреварот Македонија и“Шпанија. За таа цел државата потроши 12 милиони евра. Сега на националната арена во тек е изградбата и на источната и на западната трибина, за кои, исто така, е задолжен „Бетон“, кој склучи нов договор со Јавното претпријатие за стопанисување со станбен и со деловен простор за изведба на градежни, градежно-занаетски, инсталатерски и за други работи на објектот национална арена „Филип Втори“, во вкупна вредност од околу 50 милиони евра.