Хотели, преноќишта и одморалишта (општо)

Скајвингс ќе гради хотел кај „Александар Велики“

	Коментари (8)

Инвестиција вредна 500.000 евра во изградба на помал хотелски објект во близина на аеродромот „Александар Велики“ најави авиокомпанијата Скајвингс.

Ваков амбициозен план објави во понеделникот претседателот на Бордот на директори на компанијата Ајан Џафероски за време на промотивниот лет Скопје-Брисел.

Џафероски посочи дека изградбата на хотелот треба да започне во март идната година, а истиот треба да биде пуштен во употреба во јуни 2010 година.

Предвидено е хотелот да има 20 соби, а во најголем дел би се користел за потребите на екипажите на Скајвингс, која планира во идниот хотел да го пресели и седиштето на компанијата.

Скајвингс во соработка со Ер лифт сервис во понеделникот воведе директна линија на релацијата Скопје-Брисел, а веќе в недела ќе започне да сообраќа кон Рим, додека од 10 ноември ќе биде воспоставена линија кон Бергамо, во близина на Милано.

Скајвингс, која е регистрирана во Скопје, досега има отворено редовни линии од Скопје кон Истанбул, Цирих и Диселдорф.

Скајвинг засега оперира со еден авион од типот боинг 737-300, но од декември треба да пристигне уште еден ист таков авион.

На површина од 22.500 метри квадратни ќе се гради хотел од висока категорија на шест ката, а околу него ќе се градат спортски терени со професионални димензии наменети за подготовка и тренинзи на спортисти

Италијанска градежна компанија е заинтересирана да вложи 14 милиони евра во изградба на луксузен спортско-рекреативен и спа-центар во Катлановски бањи. На површина од 22.500 метри квадратни ќе се гради хотел од висока категорија на шест ката, а околу него ќе се градат спортски терени со професионални димензии наменети за подготовка и тренинзи на спортисти. Локацијата се наоѓа во близина на бањите, поточно над црквата Св. Недела", во близина на чешмата со лековита вода.

Од Општина Петровец информираат дека локацијата е урбанизирана и дека во моментов изработката на локалната планска документација е во завршна фаза и ќе биде предадена во Министерството за транспорт и врски за десетина дена. Министерството треба да ја продолжи постапката за отуѓување на земјиштето. Од таму велат дека инвеститор е градежната фирма "Евроиталија", која има регистрирано фирма во Скопје и го доби тендерот во Прилеп за производство на мермер.
- Евроиталија е компанија што во нашата општина веќе подолг период се смета за еден од најсигурните инвеститори. Минатиот месец наша делегација беше во посета на Италија и градоначалникот Борче Митевски разговараше за инвестицијата, за проектот којшто навистина е многу значаен за локалниот економски развој на нашата општина, информираат од кабинетот на градоначалникот на Општина Петровец.

Општинарите велат дека ова е една од неколкуте странски инвестиции што треба да се реализираат наскоро.

ЗАТВОРЕН ЕДИНСТВЕНИОТ СМЕСТУВАЧКИ КАПАЦИТЕТ

Велес остана и без хотелот Вила Зора!

Од пред десетина дена Велес е без хотел откако единствениот сместувачки капацитет во градот - хотелот Вила Зора, беше затворен. Неколку години не работи ниту хотелот Интернационал, кој претставува грда слика на градот. Хотелот Вила Зора беше изграден во 1985 година со средства од Фондот за пензиско и здравствено осигурување и пари од боречката организација. Последен со него управуваше фирмата а.д. Киро Ќучук". На неколку дена пред Новата година, го напуштија хотелот и тоа без никакво објаснување. Го собрале инвентарот, ставиле клуч на вратата и заминале. Причините за напуштањето на објектот, раководството на друштвото не ги обелоденува. Службените телефони на фирмата се исклучени поради неплатени сметки и беа недостапни за одговор. Од боречката организација ни рекоа дека пред да го напуштат хотелот со нив и со претставници од Фондот на ПИОМ, било извршено примопредавање на она што тие го оставиле.
-Пред да се иселат, не повикаа. Без многу објаснување рекоа дека го напуштаат хотелот. Како боречка организација не сме во можност финаниски да го одржуваме хотелот. Со фондот за ПИОМ мораме да се договориме што понатаму. Доколку не се најде друг да стопанисува, Вила Зора ќе пропадне. Навистина е жално овој објект да не работи. А што е поважно, жално е Велес да остане без хотел и хотелско сместување. Овој хотел некогаш беше гордост на Велешани - вели Кицо Саздовски, претседател на Здружението на борците.

Хотелот Вила Зора располагаше со 160 легла во 60-тина соби и имаше три ресторан-сали за 500 гости и голема летна бавча. Со делбениот биланс од 1999 година, Владата му го даде објектот на градот, поради што борците оваа одлука ја оспоруваат.

Посетителите кои доаѓаат да ги видат големиот број историски и културни споменици во Велес, мораат сместување да побараат во некој од хотелите во соседните градови или пак, во мотелот Романтик на брегот на Велешкото Езеро. Но, сите велат дека тоа не е решение и дека на Велес му е потребен хотел.