Зонско паркирање во Скопје

Од Нова година казни и во третата зона за паркирање

Санкцијата за секој што нема да плати паркирање или ќе заземе место за инвалиди е 700 денари

„Градски паркинг“ по празниците ќе почне да казнува за неплаќање паркинг и во третата зелена зона, во Аеродром и во Дебар Маало. Од претпријатието велат дека засега се толерираат неплаќачите, бидејќи се' уште трае периодот на навикнување. Во првата зона во строгиот центар на градот одамна се наплатува казна од 1.300 денари, доколку некој не платил за паркирање или го надминал лимитот од два часа. Во втората зона казната за вакви прекршоци е 1.000 денари.

Неказнувањето во третата зона, пак, не им одговара на жителите на улицата „Орце Николов“, како и оние од зградите околу „Бисер“. Тие се жалат дека иако веќе три месеци плаќаат по 200 денари за станарски билет, сепак, се' уште се случува да нема место за паркирање. Жителите бараат „Градски паркинг“ да почне да ги санкционира несовесните или, пак, да им гарантира паркинг-место на станарите.

„Често се случува, особено во вечерните часови кога има поголем прилив на автомобили, особено во околните кафулиња, да немам каде да го паркирам својот автомобил. Иако имам станарска картичка, сепак, се наоѓам во ситуација да морам да го паркирам автомобилот некаде во околните улички. Излегува дека сме казнети ние што имаме картички, а тие што не плаќаат паркинг поминуваат неказнето“, вели жителка на улицата „Орце Николов“.

Во „Градски паркинг“, пак, информираат дека санкционирањето ќе почне по Нова година. Ќе се наплатува доплатен билет, како и во првите две зони. Ќе се казнува секој што нема да испрати СМС-порака или нема да поседува талонче за паркирање, а казната ќе изнесува 700 денари. Истата сума ќе треба да ја плати и секој што ќе заземе место наменето за инвалидизирани лица.

Плаќаат за паркинг, а паркинг нема

Жителите на Аеродром, што живеат кај трговскиот центар „Бисер“, реагираат дека честопати немаат слободно место за паркирање, а наскоро ќе почнат да плаќаат месечна карта за користење на зонскиот паркинг. Тие велат дека немаат против да плаќаат по 100 или 200 денари месечно за зонското паркирање, но бараат да имаат загарантирано слободно место, а не да вртат кругови низ населбите.

Зонското паркирање есеноска беше воведено во центарот на Скопје, но и во Аеродром, во делот кај „Бисер“, а наскоро ќе почне да се применува и од спротивната страна на булеварот Јане Сандански, кај маркетот „Веро“, каде што местата се обележани. Паркирањето за посетителите чини 25 денари од час, а за станарите досега беше бесплатно. Штом беше воведено, на паркинзите зад „Бисер“ се создаде некаков ред, а средишниот дел престана да се користи за паркирање, но на сметка на тоа се создаде голем метеж во останатите улици во околината, каде што нема зонско.

- На ваков начин зонското паркирање е нефункционално и воопшто и не би требало да се спроведува. Многу често кога ќе се вратам од работа по 17 часот нема место каде да го паркирам возилото, па мора да одам на паркингот кој е на соседниот блок отспротива. А веќе ми стигна предупредување да платам 200 денари месечна претплата за паркинг-местото. Немам против да си платам и да имам паркинг, но зошто од „Градски паркинг“ продаваат повеќе места отколку што имаат - прашува А.Д. кој живее во околината на „Бисер“.

Од јавното претпријатие „Градски паркинг“ велат дека кај „Бисер“ има обележано 1.355 паркинг места, а за потреба од паркинг се пријавиле 1.120 жители.

Директорот на јавното претпријатие „Градски паркинг“, Панче Стојановски, вели дека проблемот кај „Бисер“ се создава затоа што се' уште не почнале да ги наплатуваат казните за пречекорување на времето на паркирање.

- Сите жители од овој реон се евидентирани, но досега не сме им испратиле барање за месечна наплата за паркирање. Проблемот е во тоа што се' уште не сме почнале да ги санкционираме оние што не плаќаат за користење на паркинг-местото и оние кои го пречекоруваат времето. Системот на зонско паркирање не може да функционира ако не е извршена евиденција на жителите и на правните лица и ако не се применуваат доплатните карти за несовесните граѓани. Со примена на казните состојбата ќе се среди - тврди директорот Стојановски.

Според него, таканаречените доплатни казнени карти ќе се активираат од 15 јануари и ќе чинат 1.300 денари.

- Ќе бидат ангажирани мобилни екипи, кои ќе контролираат и со доплатни карти ќе ги казнуваат граѓаните што не плаќаат за паркинг. На оние што не сакаат и тоа да го платат, возилата ќе им бидат блокирани со блокатори. Сметам дека до 1 февруари ќе функционира се' како што треба - вели Стојановски.

Досега претпријатието немало можност да казнува бидејќи немале официјален ценовник.

- На последната седница на Советот на Град Скопје беше донесена одлука да се воведе зоната Д за зонско паркирање, каде што цената за паркирање за жителите што живеат во неа ќе биде 100 денари, а не 200 денари месечно, како што беше најавено. За оние што доаѓаат да завршат одредена работа, привременото паркирање ќе чини 25 денари за час, а за правните лица ќе чини 750 денари месечно - вели Стојановски.

Истите цени ќе важат и за делот кај маркетот „Веро“, каде што допрва ќе се врши евидентирање на жителите на кои им е потребно паркинг-место.

Анела Петрова