Квалификации под рефлектори во октомври

Македонската фудбалска репрезентација квалификациски натпревари од Б-групата за ЕП 2012 како домаќин во вечерните термини под светлоста на рефлекторите ќе може да игра од октомври. Тоа е рокот што изведувачот „Бетон“ и Јавното претпријатие што стопанисува со Градскиот стадион во Скопје, го договориле по комплетирањето на документација околу реконструкцијата на јужната трибина. Согласноста од „Силекс“, кој е сопственик на поттрибинскиот простор, околу изведувањето на реконструкцијата на трибината била причина рокот за завршување на работите да биде поместен од 31 мај до 1октомври.

- До октомври јужната трибина треба да биде направена како новата северна трибина. Осветлението што ќе биде со јачина од 1.800 лукса ќе има приоритет во работата, за да може стадионот да биде во функција за вечерни натпревари. Се надевам дека и комплетирањето на трибината со столчињата ќе биде завршено во овој рок, додека пак поттрибинскиот простор е во втор план - вели Зоран Мисовски, директорот на секторот за градба во јавното претпријатие што стопанисува со стадионот.

ФФМ од проектните фондови на УЕФА обезбеди наменски средства за реконструкцијата на јужната трибина во висина од околу 650.000 евра. Овие пари ќе бидат ставени во функција откако ФФМ и Јавното претпријатие ќе го потпишат договорот што се' уште е на ревизија кај договорните страни. За возврат, ФФМ најави дека ќе добие бесплатно користење на стадионот за одигрување меѓународни натпревари во период од 15 години.

- Комплетирањето на стадионот продолжува, а овие средства се добредојдени. Објектот како целина, со кревањето на трибините зад головите треба да го завршиме до крајот на годината. На јужната трибина се работи. Се вади лимениот покрив за да се види во каква состојба се челичните носачи на покривната конструкција, и тој ќе биде заменет со нов како на северната трибина, по што ќе се монтира осветлението - додава Мисовски.

Октомврискиот термин за ставање во функција на осветлението на стадионот во Скопје, при составувањето на натпреварувачкиот календар за натпреварите од групата во која ќе играат уште Русија, Словачка, Република Ирска, Ерменија и Андора наметнува нова стратегија. ФФМ на договорната средба ќе треба да бара првите мечеви во септемвриските термини (3/4 и 7) да ги игра како гостин или, пак, под дневна светлина.

- Ако е само таа отстапка, на договорната средба ќе настапиме со предлог да стартуваме против Андора како домаќини под дневна светлина, а потоа да гостуваме на една од трите репрезентации Русија, Словачка или Ирска, со кои ќе треба да биеме битка за водечките места во групата - вели селекторот на македонската репрезентација Мирсад Јонуз.

Македонија во изминатиот квалификациски циклус за СП 2010 стартуваше под дневна светлина. Под скопскиот „вршник“ изгоре Шкотска (1-0), а за наредниот меч со Холандија беа донесени подвижни рефлектори што чинеа дополнителни средства. Атрактивноста на противниците и приходот од ТВ-правата во групата за ЕП 2012 нема да ја наполнат каста на ФФМ, па играњето под дневна светлина со ривалите може и дополнително да ја подиспразни. (Д.Н.)

http://dnevnik.com.mk/?ItemID=574B33912B3D7B42843DA5B55CE8BA5F