Реконструкција на Собранието

Во Собранието ќе работат и мајсторите и пратениците!

Градежните работи на собраниската зграда ќе се
одвиваат во фази

Оливера Војновска


Неделава почнува реконструкцијата на Собранието, на кое ќе се гради уште еден кат и три куполи, една голема централна и две странични, од метална конструкција со специјално стакло во кружни форми. Градежните зафати што опфаќаат зајакнување на објектот, доградба, надградба и адаптација ќе ги изведува градежната фирма „Бетон“. Реконструкцијата ќе чини околу 11 милиони евра, ќе опфати три буџетски години и се предвидува комплетно да заврши во март 2012 година. Градежните работи на собраниската зграда, која е во форма на петаголник, ќе се одвиваат во фази. Парламентот нема да престане со работа, ќе има пленарни заседанија и комисиски седници и, нормално, ќе се одвиваат сите други активности.

Сепак, додека трае реновирањето, вработените во собраниските служби и пратениците ќе се стеснат, бидејќи канцелариите на вертикалите на кои ќе се изведуваат градежни работи ќе се испразнат. Поради градежната механизација нема да функционира ниту паркингот, па пратениците најверојатно ќе ги оставаат автомобилите на паркиралиштето кај хотелот „Холидеј ин“.

Архитектот Билјана Иванова, која е одговорна за проектот, вели дека зградата ќе се зајакнува и ќе се прави надградба ламела по ламела, а паралелно ќе се изведува доградба во внатрешниот дел на петаголникот и адаптација на сутеренот. Ќе се обновува и фасадата на парламентот, но таа ќе го задржи истиот изглед. Старите дрвени прозорци ќе бидат заменети со нови, исто така, дрвени, какви што ќе има и на катот што ќе се догради. Тоа е во согласно со условите за градба и со мислењето дадено од Управата за заштита на културното наследство, каде што се сугерира да не се нарушува автентичниот лик на Собранието. Сепак, ролетните нема да бидат дрвени. Тие ќе бидат кафеави, како и прозорците, но од алуминиум. Иванова вели дека веќе не можело да се најдат дрвени ролетни, а алуминиумските биле пофункционални и полесни за одржување.

Во собраниската монографија е запишано дека зградата на парламентот се смета за една од најмонументалните градби во Македонија, за која во 1930 година бил распишан и конкурс за проектирање (на кој победил архитект Виктор Лукомски). Таа е изградена во 1938 година според проектот на чешкиот архитект Виктор Ј. Худак. Објектот е конципиран во модерен архитектонски јазик за тоа време во форма на надворешен петаголник. Зградата е во употреба од 1939 година како Управна палата на тогашната бановина.

Надградбата на парламентот и куполите неодамна беа прикажани како дел од визуелната анимација на проектот „Скопје 2014“. Куполите на Собранието, инаку, владејачката ВМРО-ДПМНЕ го турка уште пред четири години, набрзо по промената на власта во 2006 година. Идејата, која наиде на жестоки критики кај дел од експертската јавност, беше протуркана во Собранието како решение за просторните проблеми на пратениците.

Реконструкцијата, предвидува изградба на нови 3.900 квадратни метри и адаптирање на 840 квадратни метри. Надградбата ќе се изведе над петоаголниот габарит со површина од 2.140 квадратни метри и над Кристалната сала од 256 квадратни метри. На овој простор се предвидени 88 работни простории и шест сали за комисии, од кои две се покриени со куполи со радиус од четири метри.

Непосредно до салата „Борис Трајковски“ во внатрешниот двор на објектот е предвидена доградба од пет нивоа со вкупна површина од 939 квадратни метри. Предвидени се 31 работна просторија и една повеќенаменска сала од 575 квадратни метри надоврзана на последното ниво на доградбата. Таа е физички поставена на самостојна носива челична конструкција над пленарната сала и покриена со купола со висина од 9,80 метри и дијаметар од 34 метри.

Во сутеренскиот дел под салата „Борис Трајковски“ се предвидува да се адаптира простор за активностите на Собранискиот канал со површина од 233 квадратни метри. Дел од подрумскиот простор од петоаголниот габарит ќе се пренамени во помошни простории со површина од 600 квадратни метри.

http://utrinski.com.mk/?ItemID=7A8803D82B872C4C9F76E196E269BA89