Промоција на Македонија

Се снима документарец за Македонија

Снимавме во Маврово каде што ги прикажавме скијачките терени и велосипедските патеки. Во Охрид ги снимавме археолошките локалитети, а по Тиквешијата винскиот туризам, изјави Џед Клав, продуцент на емисијата Esential Macedonia & Travel Today

Група млади Англичани од англискиот Travel Channel International, од 18 јули снима документарна емисија за Македонија под наслов Esential Macedonia & Travel Today. Во документарецот се опфатени туристичките потенцијали и природните убавини, како и некои од поатрактивни локации низ земјава, а исто така, како што беше кажано на вчерашната прес-конференција, повеќе ќе се фокусираат на велосипедизмот и планинарењето бидејќи Македонија поседува патеки соодветни за овие спортови. Освен ова, документарецот ќе опфати природни, историски и културни знаменитости, а ќе бидат прикажани и слики од животниот стил на Македонците.
-Документарната серија ќе се емитува во 120 држави на 20 јазици. Целта е да се прикаже животот, културата, религијата, историјата на една држава. Снимавме во Маврово каде што ги прикажавме скијачките терени и велосипедските патеки. Во Охрид ги снимавме археолошките локалитети и од таму ја претставуваме културата на државата. По Тиквешијата снимавме за винскиот туризам - изјави Џед Клав, продуцент на емисијата, кој додаде дека ја избрале баш Македонија бидејќи се совпаѓа во концептот за документарци за интересни и возбудливи места.

Вчерашниот ден екипата на Travel Channel International беше во Скопје каде ја снимаа Старата скопска чаршија, а вечерта се фокусираа на ноќниот живот во Скопје. Денес завршува нивниот престој во Македонија, а како за крај со хеликоптер ќе ги снимаат Кокино и Матка.
-Задоволен сум од престојот, гостопримството и македонската кујна. Животот си го ставив во опасност кога со велосипед се спуштав по стрмна велосипедска патека во Маврово и тоа ќе биде прикажано, но најтешкиот дел беше да се пробаат сите македонски вина - рече Дени Робинс, презентер во емисијата.

Документарецот кој се остварува во соработка со Агенцијата за странски инвестиции, ќе биде со времетраење од 35 минути, а ќе се емитува од септември два-три пати во текот на месецот во траење од три години. Директорот на Агенцијата за странски инвестиции, Виктор Мизо и Зоран Николовски, раководител на секторот за туризам при Министерството за економија се согласуваат дека документарецот на Esential Macedonia & Travel Today како водечки светски медиум кој емитува 24-часовна програма е одлична можност за промоција на земјата. На истиот канал, како што посочи Мизо, се емитуваа спотовите за "Македонија вечна" во рамки на активностите за меѓународната промоција на земјата во релевантни странски медиуми како атрактивна бизнис и туристичка дестинација. 

Досега од земјите во регионот Travel Channel снимал во Црна Гора и Грција, а Перу, Нигерија и Тајван се во изборот за следни дестинации.