Роза Петкова


Трем пред главниот влез, двор во внатрешноста и бујна вегетација која ѕирка од стаклената фасада на зградата, ќе бидат дел од обележјата на новиот административен објект на општина Карпош, кој ќе се проектира според идејното решение на неколку архитекти. Победници на конкурсот кој го распиша Општината се Јован Ивановски, Горан Мицковски, Владимир Десков, Ана Бораниева, Ристо Аврамовски и Дејан Ивановски, со авторска шифра ЕДЕН1, а како што велат од Карпош, зградата ќе се работи според ова решение. Објектот ќе има приземје, три ката и поткровје и ќе го зафати просторот на бараките три и четири, каде што и досега беше сместена администрацијата. Според авторите, новата општинска зграда ќе се вклопи во постојното соседство, а ќе биде пристапна за граѓаните во секое време. Просторот пред главниот влез ќе се трансформира во собиралиште од јавен карактер, кое со околниот пејзаж ќе симболизира трем. - Преку ваквото етапно преминување од јавниот простор на улицата кон јавниот простор во рамките на самиот објект, на одреден начин се омекнува институционалното пристапување кон општинската зграда. Дополнително, тоа се прикажува и преку приземјето кое е изработено со идентичен материјал, како и влезниот хол. На обликовно ниво, новата зграда ги интерпретира природните, културните, урбаните и политичките особености на Општина Карпош. Архитектонскиот пристап се ослонува на неколку наративи, кои воедно се и главни карактеристики на општината - демократија, урбаност и пејзаж - велат авторите. Во рамките на самиот објект централен дел е холот, претставен како отворен повеќевисински простор околу кој се надоврзуваат општинските служби. Премините меѓу нивоата ќе бидат природно осветлени од внатрешниот двор, кој по својата геометрија, авторите го споредуваат со мозаикот од локалитетот Скупи. Симболиката е во тоа што Скупи е првата урбана тврдина на територијата на градот Скопје, а денес се наоѓа во рамките на Општината. Предвидено е во зградата, покрај општинската администрација, да биде сместена и матична служба за венчавки. - Со особено внимание во проектот е третиран просторот во кој ќе се остварува протоколот на венчавки на идните младенци. Во недостаток на соодветен простор на градско ниво, посетата на матичната служба во Општина Карпош ќе претставува впечатливо церемонијално искуство - сметаат авторите. Проектот предвидува внесување на вегетација во рамките на самиот објект, како и употреба на дрвото како завршна обработка. Зградата ќе нуди и енергетска заштеда, затоа што кровната фасада ќе може да се искористи за монтирање на фотоволтаични соларни системи како алтернативни еколошки извори на енергија. Покрај ова, решението предвидува и пешачки коридор со кој ќе се поврзуваат внатрешната зона на трговскиот центар „Лептокарија“, со објектите во кои се сместени подрачните единици на „Македонска пошта“, „Македонски телекомуникации“, како и супермаркетот „Тинекс“. Главниот влез ќе биде на западната страна од локацијата, додека пристапот за пешаци преку патеката која ги поврзува Партизанска и Никола Русински. Возилата како и досега, ќе влегуваат од задната страна и за нив е планиран подземен паркинг со капацитет од 70 автомобили.