КУМАНОВО

Ќе се реконструира општата болница

Со средства од еден милион евра наесен ќе почне реконструкцијата на Општа болница во Куманово. Проектот предвидува целосно реновирање и осовременување на повеќе одделенија и подобрување на условите за работа во болницата.
- Во првата фаза ќе бидат опфатени пет објекти: зградата во која се сместени одделенијата за хирургија, гинекологија, интерно и детско. Потоа објектите каде што се наоѓаат ушното и очното одделение, неврологија и психијатрија. Целосно ќе биде реновирана и старата зграда на инфективно, а ќе се изградат нови објекти за потребите на трансфузиологија и дијализа, вели директорот на болницата, Ариф Љатифи.
Во Министерството за здравство веќе е завршена тендерската постапка и се очекува почетокот на градежните работи. Овој зафат е дел од првата фаза од проектот за реконструкција на 20 јавни здравствени установи во Македонија, за што се предвидени 23 милиони евра од Банката за развој и исто толку од Владата. Вкупната вредност на проектот изнесува од 130 до 150 милиони евра.

Странски компании ќе ги реконструираат болниците

Градежни компании од Хрватска, Бугарија и Македонија ќе реконструираат 20 јавни здравствени установи со заем од Банката за развој при советот на Европа, во висина од 23 милиони евра и со средства од Буџетот.

Министерот за здравство Бујар Османи, денеска потпиша договор со фирмите „Ингра“ и „Конструктор Инженеринг“ од Хрватска, како и со фирмата „ДБС“ од Благоевград за реконструкција на три објекти, како и со домашните компании  „Вардар Градба“ од Скопје за реконструкција на еден објект и велешката фирма „Делта пром“,  која што ја градеше зградата на гинекологија на Клинички центар пред четири години.
„Се работи за отворена постапка во која, право на конкурирање имаат и домашни и меѓународни компании, така да во зависност од тоа кој ги исполнува условите и кој колку понудил се прифаќа најевтината цена. Имаше голем број на фирми, што се јавија на тендерот. Тие што ги исполнија условите беа рангирани по однос на цена“ - рече Османи на денешната прес конференција.

Во првата од вкупно три фази за реконструкција на здравствените установи не се опфатени Клиниката за белодробни заболувања „Козле“ и Болницата за душевни заболувања во Демир Хисар каде и според извештајот на Хелсиншкиот комитет, состојбата е алармантна. Министерот Османи најави дека тие влегуваат во втората фаза од целиот проект, бидејќи според проценката на експертите од проектната единица и според експертите од банката, овие две установи немаат комплетирана проектна документација
„Во тек се постапките за изградба на целосно нов објект на Институтот за белодробни заболувања „Козле“, каде ќе се руши еден дел и ќе се гради нов и целосна реконструкција на интерните клиники“ - рече Османи.

Во оваа прва фаза се опфатени општите болници во Прилеп, Велес, Охрид, Струмица, Куманово, Крива Паланка, Гостивар и Кочани, Здравствен дом Прилеп, Специјална болница за гинекологија и акушерство Чаир, Специјална болница Јасеново – Велес, клиничка болница Тетово, психијатриска болница Бардовци, и психијатриска болница Негорци.
„Ние корегираме една историска неправда во последните 20, можеби и 50 години која што е нанесена врз здравствените работници и врз пациентите што беа приморани да користат здравствени услуги во такви капацитети. Ова е еден голем исчекор кој што ќе влијае во подобрување на квалитетот на услугите“ - истакна Османи.

Според договорот, градежните работи треба завршат најдоцна за 16 месеци и доколку не се испочитува дадениот рок, предвидени се одредени пенали.

Првата фаза од проектот за реконструкција е во вредност од околу 30 милиони евра, од кои 23 се заем од Банката за развој при советот на Европа што ќе се исплаќаат во наредните 25 години со каматна стапка од еден процент на годишно ниво, а остатокот е од буџетот на Македонија.

Според Османи, намалувањето на Буџетот на Владата за реконструкција нема да се одрази и врз овој проект бидејќи во тој дел Владата учествува со само 2 милиони евра средства кои што ќе се префрлуваат на посебна жиро сметка, а ДДВ-то од 18 отсто ќе го исплаќа Министерството за здравство.

Реконструкцијата на јавните здравствени установи до сега беше најавувана во месеците март и јуни, а целата процедура околу завршувањето на тендерите трае речиси две години.крај/к.с.

Реконструкција на болницата во Чаир

Големина на текст:

По 15 години во Чаир почна реконструкцијата на Болницата за гинекологија и акушерство. Инвестицијата од околу 2 милиони евра, опфаќа модернизацијата со современа опрема со највисоки европски стандарди и подобрување на условите за сместување на родилките. Според министерот за здравство  со проектот е предвидено и реновирање на уште 20 болници низ земјава и тоа во Тетово, Гостивар,Куманово, Велес, Охрид, Струга, Струмица.

 “...........работите нема да траат повеќе од  12 месеци ќе имаме една модерна болница со современи соби и апартмани што значи ќе имаме и квалитетна услуга и пријатен престој за сите жени... Бујар Османи Министер за здравство

“Работата е перманентнана и тешка во вакви услови со кои се соочуваме, зградата е стара, имаме недостаток на кадар, се обидуваме да направиме колку што можеме, до сега сме успеале во тоа, да се надеваме дека ќе издржиме уште една година” Мендух Јегени директор на  Болницата за гинекологија и акушерство во Чаир

Министерот за здравство Османи , ги смета како неосновани обидите на Невладините женски организации кои побараа негова оставка, поради катастрофалната состојба на здравството, особени во родилиштата во земјава. Османи рече дека нема да поднесе оставка бидејќи тоа би значело само бегање на проблемите.

Семра Јакупи

http://alsat.mk/vesti/zemja/1018251.html

Гинекологија Чаир ќе го носи името „Мајка Тереза“

Преименувањето на болницата, како што соопшти Министерството за здравство, доаѓа во време кога целосно ќе се реконструира, догради и модернизира со што ќе го зголеми капацитетот, а ќе биде подигнат и квалитетот на здравствените услуги што ги нуди на граѓаните.

Реконструкцијата предвидено е да трае 12 месеци и е дел од првата фаза од проектот за реконструкција, доградба и изградба со кој се опфатени 20 јавни здравствени установи во државата.

По извршувањето на предвидените градежи зафати, родилиштето ќе добие нови модерни родилни, двокреветни соби и апартмани по најновите стандарди, со што родилките ќе добијат посовремен третман и попријатен престој во болницата, стои во соопштението.

Одлуката за преименување на болницата се совпаѓа со одбележувањето на 100 годишнината од раѓањето на Мајка Тереза.  

Специјалната болница за гинекологија и акушерство во Чаир е второ по големина родилиште во земјава, со над 3.000 породувања годишно.

http://www.sitel.com.mk/dnevnik/makedonija/ginekologija-chair-ke-go-nosi-imeto-%E2%80%9Emajka-tereza%E2%80%9C

Започнува реконструкцијата на болницата

 Според информации од болницата, градежните работи ќе започнат од одделението за трансфузиологија, каде треба ќе се гради нова зграда, а ќе продолжи на старата зграда на хируршко, интерно и детско одделение. Министерството за здравство за реновирање на болницата одвои околу 1 милион евра.