А1 Арена (Спортски центар „Борис Трајковски“)

Картинг центарот со СЦ Борис Трајковски е во деловно партнерство, а инвестицијата е од страна на приватен субјект кој располага со договор за франшиза со реномирана Картинг компанија од Италија која ќе биде промовирана на отворањето на Картинг центарот.

Широчината на патеката ќе изнесува седум метри, а должината 450 метри. Истовремено на патеката ќе можат да се движат најмногу шест картинг возила. Возилата ќе бидат од брендот „хонда“ со четворотактни мотори со зафатнина од 200 кубни метри и моќност од 7,5 коњски сили што ќе дава можност за развивање на максимална брзина од 70 километри на час.

Новина во однос на постоечките картинг возила кои се во државата е тоа што кај овие картинзи ќе има поставено „транспордер“ - уред за мерење на времето идентичен како и системот за мерење време кај болидите во Формула 1.

Според возрасната граница планирано е да има картинг возила за лица до 16 год и лица постари од 16 години.

Првично проектираната цена е 300 денари за пет минути возење и 500 денари за 10 минути користење на картинг возило.

Директорот Капушевски информираше и за идните проекти на спортскиот центар од кои како покрупен зафат го најави комплетното реновирање на базенот „Младост“ по кое тој ќе се ребрендира во пливачка арена „Борис Трајковски“, со што центарот ќе добие достоен репрезент за спортовите на вода.