Булевар Илинден

Бунтот на „Илинден“ не запира

Кога ни го исекоа дрворедот, ни ветија нов, а сега ни велат дека нема место за дрвја, туку само за една пешачка и велосипедска патека, широки одвај еден метар, реагираат жители на булеварот Илинден

Дел од жителите на Илинденска се' уште негодуваат поради проширувањето на булеварот, а дел веќе не се противат на одлуката на Градот - на Илинденска наместо дрворед, да има поголема сообраќајница.

Од пред две недели засилена механизација работи на улицата, на местото на асфалтот сега има дупка од 1 метар. Граѓаните што живеат по должината на улицата се жалат на низа недоследности што Градот ги турка, иако начелно имале други договори.

- Разбирам дека на градот му требаат пошироки улици, еве да речам дека разбирам оти и Илинденска требаше да се проширува поради сообраќајниот метеж, но не разбирам зошто по секој цена се' се прави против волјата на граѓаните. На соседот му ветија дека ќе му стават хидроизолација на темелите, оти новата Илинденска му поминува речиси до куќата. Но, како што гледам, нема абер од таа работа. Видовме дека со оваа власт граѓаните немаат избор, на секое поле губиме. Ни го исекоа дрворедот, а ни ветија нов. Сега ни велат дека нема место за дрвја, ќе има само една пешачка патека и велосипедска, широки одвај 1 метар. Значи мајка со дете за рака не може да мине. Имам двајца соседи од таканаречената ЈНА-зграда што ги продаваат становите, се откажаа оти веќе немаат нерви да се расправаат со нередот што им го приреди Градот. Физички сме само на неколку метри од Владата, а практично тие се километри подалеку од граѓаните - вели еден од жителите на Илинденска, кој не сакаше да се претстави.

Од Градот велат дека ги информирале граѓаните и им ја презентирале техничката документација. Според секторот за односи со јавноста, граѓаните од Илинденска не негодувале оти се увериле дека Градот ги поседува сите легални документи за реконструкцијата.

- Десет години во централното градско подрачје не е проширен ниту еден булевар. Долги години оваа улица претставуваше „тесно сообраќајно грло“, безбедноста на пешаците беше загрозена, времето на задржување на возилата беше продолжено поради долгите колони, а со тоа загадувањето на животната средина беше неизбежно - изјавија од одделението за односи со јавноста.

На терен ќе работат екипите на „Гранит“ А.Д., а од градот предвидуваат дека за целосното проширување на булеварот Илинден од градскиот буџет ќе се одвојат 80 милиони денари. Според планот, проширувањето на булеварот Илинден треба да заврши до 8 септември или 60 работни дена од отпочнувањето на градежните работи.

Булеварот со нов лик

Проширувањето на булеварот Илинден се работи на потегот од улицата Наум Наумовски-Борче до улицата Рузвелтова, во должина од 640 метри, а потоа од улицата Рузвелтова до булеварот 8 Септември, во должина од 800 метри. Булеварот Илинден, една од главните сообраќајни артерии во Скопје, е значајна алтернатива на булеварот Партизански одреди.

Булеварот Илинден со проширувањето ќе добие по две коловозни ленти во секоја насока, вкупно 4 по 3,25 метри. На делот од улицата Наум Наумовски-Борче до Рузвелтова булеварот ќе биде без средишно зеленило. По завршувањето на овој дел, булеварот ќе продолжи да се проширува на потегот од раскрсницата со улицата Рузвелтова до раскрсницата со булеварот 8 Септември. На овој потег, булеварот ќе добие по две коловозни ленти во двете насоки, со ширина од 3,5 метри и централно зеленило. По должината на булеварот ќе се градат и пешачка и велосипедска патека од двете страни.

Ќе се постави и ново осветлување со штедливи светилки кое ќе чини околу 8 милиони денари. Предвидени се и нови семафори на булеварот со улицата Никола Тесла кај Машинскиот факултет, кои ќе чинат 2 милиона денари.

Реакциите за проширувањето на Илинденска, на потегот од Владата до фонтаната во Градски парк, кој беше спорен за тамошните жители, се уште не стивнуваат. Дел од граѓаните и натаму се жалат дека со проширувањето на улицата во булевар им се остава многу мал простор, кој ќе биде претесен за паркирање на возилата што, според нив, немале каде на друго место да ги остават. - Очигледно е дека градската власт навистина постапи некоректно со жителите од десната страна на Илинденска, претежно стари скопјани. Неетички е граѓаните што ги купиле становите и куќите пред повеќе од педесетина години, или ги наследиле од своите родители, да останат без елементарно право на паркинг за своите возила - смета жител кој со допис се обрати до нашата редакција. Во Град Скопје и вчера информираа дека изградбата на булеварот тече непречено. - Се експроприра и последниот објект кој се наоѓаше на трасата на улицата. Објектот е срушен, а сопствениците се соодветно обесштетени, како и сопствениците на претходните објекти, кои беа срушени за проширувањето на Илинденска. Истовремено привршуваат и работите околу атмосферската канализација - велат од Одделението за односи со јавност. На терен се поставуваат последните 40 метри од канализацијата кон крстосницата со 8 Септември, а потоа ќе се стават водови од другата страна, во насока кон спортската сала „Борис Трајковски“. Во Градот велат дека канализационата мрежа е со профил од 500 милиметри, и со тоа ќе има силна моќ за прибирање на вода од пообилни врнежи. За атмосферската канализација се вложени околу 40 милиони денари, а работите ги изведува фирмата „Енергомонт“.