Споменици и скулптури (општо)

Нова локација за споменикот „Бомба“

Споменикот, подигнат во чест на првата партизанска работилница за изработка на оружје, која се наоѓа меѓу комплексот судови и МРТ, деновиве се демонтира и за него е обезбедена нова локација, известуваат од Конзерваторскиот центар -Скопје. Споменикот познат како „Бомба“, чиј автор е Ацо Никуљски, ќе биде дислоциран во средина на комплексот судови кон реката Вардар и Младинскиот културен центар.

- Работниците од градежната фирма што работи на изградба на објект до комплексот судови внимателно го размонтираа споменикот. Секако, тоа се прави под надзор на стручни лица, а подоцна истите ќе го монтираат на локација многу близу до сегашната - велат одговорните во Центарот.

На местото на поранешната илегална работилница за оружје сега интензивно се гради Кривичниот суд, кој треба да биде пуштен во употреба в година. Новиот суд ќе има корисна површина од 9.000 квадрати, со 10 нивоа, две подрумски простории, приземје, шест ката и потпокрив. Ќе располага со 74 судски кабинети, 22 средни судници и две репрезентативни судници за 200 лица и една за 100. Обезбеден е простор за архиви, шалтер-сала со 60 работни места за сите оддели и простории за судската полиција, репрезентативна судница и канцеларии, судски кабинети за кривичниот оддел за организиран криминал, оддел за прекршоци и оддел за извршување санкции, кабинети и канцеларии за одделот за истрага, истражен оддел за организиран криминал, како и канцеларии за судската управа. Покрај делот за архива, шалтери, канцеларии, ќе има и обезбеден паркинг за 60 возила. Објектот чини 8,3 милиони евра, а средствата се обезбедени со заем од Светската банка и од буџетот на Македонија. Новата зграда на Кривичниот суд ќе биде во антички стил. (М.Д.Т.)

Швајцарски ултразвук ќе ги брка птиците од спомениците

Општина Центар ќе плаќа по 1.350 евра за едно апаратче

Деспина Трајковска

За да не се валкаат од птици и од инсекти, спомениците од „Скопје 2014“ ќе се заштитуваат со ултразвук. Општина Центар веќе направила зделка со швајцарска фирмата „Деко стар“ од Бининген за снабдување со потребните апаратчиња, кои чинат 1.350 евра од парче. Тие работат на принцип на испуштање ултразвучни сигнали, кои ги бркаат птиците, а притоа, како што тврдат општинарите, не претставуваат никаква опасност за околината.

Колку апаратчиња ќе се набават, кога и на кои споменици ќе се постават, општинарите допрва ќе утврдуваат. Апаратчињата ќе се монтираат на канделабри поставени во близина на спомениците, ќе бидат видливи, но нема да го нарушуваат амбиентот. Едно апаратче е со димензии 11 на 11 сантиметри. Голема е веројатноста дека први со ултразвук од птици ќе се бранат Гоце Делчев и Даме Груев, потоа Ченто, гемиџиите...

„Набавката и поставувањето на апаратчињата ќе се одвива сукцесивно, согласно со потребите на општината. Ќе нарачуваме едно по едно апаратче, во зависност од динамиката на поставување на спомениците. Инаку, се' уште правиме анализи на терен за поставување на првиот апарат, поточно бидејќи тие нема да се монтираат директно на спомениците, туку на канделабрите во нивна близина, се утврдува фактичката ситуација на терен. Значи, треба да се види дали има потреба од поставување дополнителни канделабри или, пак, ќе се искористат постојните“, вели Јовица Ацковски, портпарол во Општина Центар, според чии процени, тест-периодот на апаратчињата ќе стартува најмногу за два месеца.

Со оглед на тоа дека само на плоштадот и во околината општината ќе постави речиси триесетина споменици, за набавка на апаратчињата ќе треба да плати околу 40.000 евра. Но, според општинарите, оваа „и не толку голема инвестиција“, во секој случај е исплатлива, оти веруваат дека ќе се докаже како функционална. Имено, спомениците нема да се валкаат со измет од чавки, кои се нивни чести посетители, па така општината нема да има потреба да ангажира фирми за чистење на скапите споменични зданија.

Инаку, фирмата „Деко стар“ од Бининген - Швајцарија, била единствената што доставила понуда на јавниот повик на Општина Центар за избор на најповолен понудувач на апаратчињата.

Коњаникот за плоштадот во Автокоманда ќе се лее во Белград

Белградската леарницата „Јеремиќ“ е избрана како најповолна за леење на споменикот коњаник, кој треба да го заземе централното место на плоштадот во населбата Автокоманда. Споменикот ќе се лее за 300.000 евра, е посочено во тендерот објавен на веб-страницата на Бирото за јавни набавки.

Општината Гази Баба веќе го случила договор со леарницата „Јеремиќ“, која е избрана во конкуренција на понуди од вкупно шест фирми, уште две од Италија, една од Хрватска, една од Македонија и една од Германија.

Оваа леарница веќе подготвила и протокол според кој споменикот би требало да биде готов до крајот на годината. Заедно со него ќе се леат и осумте фигури од фонтаната, од кои четири се женски, а четири се воини.

- Ја избравме најповолната понуда. Италијанските леарници се многу скапи. Бидејќи оваа е поблизу, ќе бидат и помали трошоците за транспорт, а материјалот е со ист квалитет - квалитетна бронза. Се' што побаравме во тендерот српската леарница исполни - изјави Емилија Кипроска, портпарол во Општината Гази Баба.

Споменикот на коњаник, за кој првично беше најавено дека ќе биде споменик на Филип Втори, ќе биде висок висок пет метри. Постаментот висок три метри е изграден уште со самата изградба на плоштадот.

Автор на споменикот е Валентина Стефановска, која е и автор на споменикот на Александар Македонски, кој ќе биде поставен на централниот градски плоштад Македонија.

Фонтаната е замислена со четирите женски фигури, кои стојат на четирите агли, поставени на столбови, а во средината се четирите воини, кои над главите држат штитови. Водата ќе се прелева од едниот на другиот штит. (А.П.)

http://www.dnevnik.com.mk/?ItemID=E56AF7BBC92E0B46862660E90E926D5B