Парцела од околу 800 метри квадратни во општина Центар ќе се продава на јавно наддавање организирано од министерството за транспорт и врски.

Според информациите од Транспорт на продажба е парцела во делот “Мал Ринг“ со намена “Е2 Инфрастрктура“ односно катна гаража и со алтернативна класа на намена согласно Правилникот за стандарди и нормативи за урбанистичко планирање.

“За предметната градежна парцела е изработен Идеен проект, потребен за добивање на Решение за локациски услови во надлежната општина, а врз основа на кој во понатамошна постапка ќе се изработи и Основен проект, а кој ќе го одобри Комисија формирана за таа потреба од страна на Министерот за транспорт и врски“, се вели во информацијата од Транспорт.

Секој учесник во наддавањето како обврски ќе треба да го откупи идејниот проект и изградбата на катната гаража да биде согласно овој проект.

Почетна цена на јавното наддавање изнесува 7.600 денари  од метар квадратен. Пријавите за учество на јавното наддавање можат да се достават до петти  јануари.

http://www.netpress.com.mk/vest.asp?id=80118&kategorija=2

Општина Аеродром денеска, 17.12.2010 година, почна со изградба на монтажнo паркиралиштe во Ново Лисиче покрај булеварот „Србија", поточно меѓу полициската станица и Прокредит банка.

Станува збор за монтажно паркиралиште од челична конструкција со надземна платформа со капацитет од речиси 100 нови паркинг места. На конструкцијата ќе бидат изградени и пристапни рампи за влез и излез, скали за пешаците, како и сливници за вода, а пред пуштањето во употреба паркиралиштето ќе биде обележана хоризонталната и вертикалната сообраќајна сигнализација.

„Целта на проектот за изградба на современо монтажно паркиралиште е да се одговори на еден од поголемите предизвици со кои се соочува Општина Аеродром - недостигот од паркинг простор", изјави градоначалникот на Општина Аеродром, Ивица Коневски.

Тој додаде дека изградбата на монтажните паркиралишта е најсоодветно решение за решавање на недостигот од паркинг места, бидејќи на тој начин, од една страна со малку средства се добиваат дополнителни паркинг-места, а од друга ќе се зачува зеленилото.

Директорот на ЈП „Градски паркинг", Борче Јакимовски, кој присуствуваше на денешното поставување камен-темелник на првото монтажно паркиралиште во Република Македонија, изрази надеж дека со добрата соработка ќе се реши целосно проблемот со паркирање во општината, не само на овој начин туку и преку други облици, како што е воведувањето зонско паркирање.

Во зависност од желбата и одлуката на граѓаните, Општина Аеродром планира ваков тип паркиралишта да гради уште на неколку други локации.

Станбеното се пишмани за катната гаража на плоштад

Јавното претпријатие и' ја вратило парцелата на државата што ја продава на лицитација. Почетната цена за квадрат изнесува 7.600 денари

Деспина Трајковска

Од финансиски причини, Јавното станбено претпријатие се откажа од изградба на една од планираните четири катни гаражи и одлучи да и' го врати земјиштето на државата што му ги имаше подарено локациите без надомест. Сега, наместо претпријатието, објектот на постојниот мал паркинг на „Телеком“ во близина на плоштадот „Македонија“ ќе го гради приватно лице.

Веќе задутре би требало да се знае кој ќе стане сопственик на парцелата од 801 квадратен метар. Министерството за транспорт и врски ќе го продава земјиштето на јавна лицитација со почетна цена од 7.600 денари за квадрат. Купувачот ќе има обврска да го прифати избраниот изглед на катната гаража и да гради според идејното решение што пред неколку месеци го избраа во ЈПССДП.

Од Министерството за транспорт и врски потврдуваат дека претпријатието ја вратило парцелата, односно дека е донесена нова одлука со која се поништува претходната за доделување на парцелата.

„Владата одлучи да ја поништи одлуката со која оваа локација и' се дава на ЈПССДП за да инвестира во изградба на предвидениот објект. Оттука, Министерството распиша јавна објава за отуѓување на градежното земјиште по пат на јавно наддавање, со цел на оваа локација да биде изградена катната гаража“, велат од ресорното Министерство.

Неочекуваната промена на визиите за изградба на четири катни гаражи, од претпријатието ја објаснуваат со неодамна направените процени за финансиската конструкција за сите четири проекти. Оттаму утврдиле дека изградбата на оваа катна гаража би им го оптоварила буџетот за годинава.

„Дефинитивно, констатиравме дека за таа катна гаража нема да имаме доволно средства ниту, пак, можности за кредитно задолжување. Од тие причини одлучивме парцелата да и' ја вратиме на државата“, вели директорот Владимир Бахчовановски, објаснувајќи дека досега потрошените средства за избор на идејно решение за објектот, практично, ќе ги повратат од идниот закупец на локацијата. Имено, тој не само што ќе има обврска да гради по веќе избраното идејно решение, туку ќе треба и да го откупи.

Објектот, како што вели Бахчовановски, ќе биде со модерна фасада, иако во непосредна близина ЈПССДП ќе ја гради барокната катна гаража. „За таа парцела не важат насоките од ДУП-от објектот да има стилска фасада“, додава Бахчовановски, кој во меѓувреме ги спроведува постапките за останатите три катни гаражи. За барокната, претпријатието веќе зема кредит, а привршува и изборот за изведувач за да може до пролет да почне нејзината изградба. За катната гаража кај Синдикат ќе биде обезбеден друг кредит и наскоро ќе се избере изведувач, додека за објектот кај Музејот на холокаустот привршува расчистувањето на имотноправните односи.