Вандализам и примитивизам

Во последниов период зачести појавата на кражби и уништувања на хидрантите од јавните зелени површини во градот, соопштуваат од јавното претпријатие „Паркови и зеленило“. Според податоците оттаму, во Градскиот парк биле оштетувани фонтаните, при што трипати се краделе по четири вентили, а снемало и пет капаци од шахти и заштитните мрежи пред резервоарите за вода на пумпите. Исто така, со возила биле искршени четири, а оштетени три хидранти на булеварот Јане Сандански. Кражби и уништувања имало и на кејот на реката Вардар спроти хотелот „Холидеј ин“, како и кај поранешниот хотел „Македонија“, а само на булеварот Партизански одреди биле уништени осум хидранти. Од претпријатието додаваат дека поради изведување градежни работи на повеќе места во градот била оштетена и подземната хидрантска мрежа, како кај хотелот „Континентал“, на улицата Илинденска и кај Бит-пазар. - Нашите екипи секојдневно интервенираат на повеќе места во градот, при што затвораат хидранти што граѓаните самоиницијативно ги отвориле и ги оставиле да течат, па се создаваат езерца и барички во тревниците. И шахтите се полнат со шут, со што се оштетуваат вентилите и тие стануваат недостапни за работа. Апелираме до граѓаните да не ги крадат и да не ги оштетуваат хидрантите, а секогаш кога ќе видат дека вода неконтролирано истекува од мрежата да пријават во претпријатието - велат во „Паркови“.

Сезоната на петарди секоја година почнува се' порано

Експлозии одекнуваат и дење и ноќе, а граѓаните немаат одмор и сон

Слободниот влез на петарди во земјава, овозможува солидна снабденост на пазарот, а веројатно и заработувачка. Доказ се полните тезгиња на кои можат да се најдат петарди од најразличен вид

СНЕЖАНА КАЛАБАКОВА

Петардите и годинава им го нарушуваат мирот на скопјани. Силни експлозии постојано ги вознемируваат граѓаните, во секое време од денот или ноќта. Луѓето коментираат дека сезоната на петардите одамна е започната, за разлика од некогаш кога се пукаше само околу Нова година. А, таа да биде поуспешна се погрижиле бројните шверцерски канали на кои очигледно никој ништо не им може. Со години приказната се повторува, а надлежните ништо не преземаат. Граѓаните се револтирани, бидејќи токму можноста за слободен влез на петардите во земјава им овозможува и добра снабденост на оние кои се занимаваат со нивна продажба. Доказ за тоа се полните тезгиња на зелените пазари на кои можат да се најдат петарди од најразличен вид. За нивната продажба скопјани велат дека се одвива како да е најлегална. Родителите нагласуваат дека од петардите често страдаат децата, а други пак тврдат дека има и возрасни кои уживаат во нивните пукотници. Во една од скопските населби петардите се продаваат покрај сите други пиритехнички средства, ракети и огномети. Таму купувачите имаат можност и на самото место да го проверат интензитетот на одреден вид петарда.

Од Пазарната инспекција велат дека петардите ги третираат во акциите за запленување на пиротехника, а кога тие ќе се одземат, се носат во депо и потоа се уништуваат. Тврдат дека постојано се на терен и соработуваат со полицијата. „Немаме бројки колку петарди сме одзеле, бидејќи никој не не' тера да правиме спецификации за нивното одземање. Но, постојано сме на терен и соработуваме со полицијата. Кога одземаме петарди од познат сторител, тогаш против него се поведува судска постапка“, вели Владимир Кочовски, првиот човек на Државниот пазарен инспекторат.

Борче Пешевски, портпарол на МВР, вели дека од почетокот на годинава до вчера биле запленети 322.359 парчиња најразличен вид петарди. Против повеќето сторители биле поднесени кривични и прекршочни пријави. „Овие пиротехнички средства кај нас не се произведуваат и најчесто влегуваат од соседна Бугарија. Затоа, МВР ги презема сите потребни мерки и на границата и во внатрешноста. Порано беше практика шверцерите да се снабдуваат со петарди пред новогодишните празници, а сега тоа го прават во текот на цела година“, објасни Пешевски.

Фото вест

Скопјани вчера цел ден на плоштадот Македонија прескокнуваа паднат канделабар - ефект што веројатно го предизвикале некои несовесни граѓани во саботната ноќ . Годинава неколку светлосни столба од плоштадот се најдоа наземи.

За фрлена хартија на улица во Кисела Вода казна од 30 евра

Во зависност од прекршокот, казните се движат до 500 евра

ДЕСПИНА ТРАЈКОВСКА

Триесет евра за фрлена хартија на улица на подрачјето на Кисела Вода ќе бидат казнети сите несовесни граѓани доколку на самото место бидат фатени од страна на општинските инспектори за животна средина. Досега се изречени десетина вакви казни. Овие мерки во општината почнаа да се применуваат од 25 ноември е се во согласност со измените на Законот за управување со отпад и Законот за животна средина.

Надлежните посочуваат дека казнени мерки постојат за речиси сите видови уништување на животната средина. Во зависност од прекршокот, казните за физичките лица се движат од 30 до 500 евра. Најскапо ќе поминат тие кои ќе бидат фатени да оставаат градежен шут на недозволено место - ќе треба да платат 500 евра. Оној што ќе запали ѓубре во контејнер ќе биде казнет со 150 евра, а доколку фрли ѓубре во природа, или на патишта, казната изнесува 50 евра. Толкава е и паричната казна за тие кои фрлаат градежен шут, отпадни масла и гуми во урбани средини и во контејнери. Ако овие материи се фрлаат во природата или на патиштата, предвидената глоба изнесува 70 евра. Казнениот тарифник предвидува и казна од 100 евра за фрлање каков било вид ѓубре покрај реки, бари и езера, а оние кои ќе горат или закопуваат ѓубре во урбани средини, ќе бидат казнети со 150 евра. Висината на глобата за оние што ќе горат или закопуваат отпадни гуми и масла во природата изнесува 200 евра.

Снежана Пиперевска, раководител на Одделението за животна средина во Кисела Вода, објаснува дека на сторителот на самото место му се издава платен налог за наплата на глобата за прекршокот, при што казнетото лице треба да плати веднаш, или во рок од осум дена. Доколку казната ја плати во предвидениот рок, таа ќе биде намалена за половина. Во спротивно, против сторителот ќе биде поведена прекршочна постапка.

„Досега се изречени десетина казни и тоа сите за фрлена хартија на улица. Се' уште не се изминати роковите за наплата, па не можеме да кажеме дали казнетите навремено ја платиле глобата“, вели Пиперевска и посочува дека досега највисоката казна што ја изрекле изнесува 3.000 евра и тоа против правно лице кое изведувало канализација во Аеродром, а шутот го исфрлало на подрачјето на Кисела Вода.

Инаку, во споредба со глобите за физички лица, оние за правните се многу повисоки - изнесуваат од 2.000 евра нагоре. Највисоката парична казна може да достигне сума и до 20.000 евра. Од Кисела Вода информираат дека во инспекциската служба има двајца инспектори за животна средина и еден комунален инспектор, кои работат по 24 часа на ден и за време на викенди и празници. Согласно со програмата за работа, тие со дигитални апарати го „снимаат“ целото подрачје на општината.