А1 Арена (Спортски центар „Борис Трајковски“)

СВЕТСКАТА КОШАРКАРСКА СЕНЗАЦИЈА ЌЕ ЈА ОТВОРИ НОВАТА САЛА

„Харлем глобтротерс“ во Скопје

„Црните бисери“ на 22 мај ќе приредат двочасовен спектакл за отворањето на повеќенаменската сала „Борис Трајковски“

Кошаркарската сензација на Америка, тимот „Харлем глобтротерс“ на 22 мај доаѓаат во Скопје за отворањето на новата повеќенаменска сала „Борис Трајковски“ .Раководството на инвеститорот,Јавното претпријатие „Борис Трајковски“, обелоденува дека договорот со познатите „црни бисери“ веќе е потпишан, а уплатен е и аванс. Триесет кошаркари-егзибиционисти два часа ќе ја забавуваат публиката со разни вештини со топка, со која „можат да направат се', освен да ја изедат“. Нивната игра е заснована на невообичаени движења и скокови, интересни дофрлувања, атрактивни забивања и многу гимнастика.

СЕНЗАЦИЈА ШТО РЕТКО СЕ ГЛЕДА

Вечерта на свеченото отворање на салата планирано е да присуствуваат 6.000 гости, односно толку влезници ќе се пуштат во оптек. „Харлем глобтротерс“ се невидена сензација каква што ретко настапува на овие простори - вели Борис Змејковски, директор на Јавното претпријатие „Борис Трајковски“. Спортската сала требаше да биде свечено отворена во текот на овој месец, но поради ангажирањето на светската атракција, терминот морало да биде поместен. Змејковски вели дека до „Харлем глобтротерс“ се доаѓа многу тешко, бидејќи ретко имаат слободни термини за настап.  Нивниот ангажман не ни дозволуваше да ја отвориме салата во април. Датумот 22 мај е избран за официјален датум, но е начелен. Лентата ќе ја пресече премиерот Никола Груевски, а потоа ќе следува шоуто - изјави директорот Змејковски.Освен настапот на „Харлем глобтротерс“ за посетителите ќе има и друга забавна програма, која се' уште се изработува. Змејковски потенцираше дека таа ќе биде богата и професионална.За плаќањето на настапот на „Харлем глобтротерс“ ќе бидат задолжени спонзорите, односно како што вели Змејковски, нема да биде потрошен ниту денар буџетски пари. За свеченоста веќе има и генерален спонзор, но раководството се' уште не го обелоденува.Изградбата на спортската сала, според раководството, изнесува околу 17 милиона евра. На располагање се 700 паркинг-места за автомобили и 32 места за автобуси. Објектот ќе има капацитет за седење од 6.000 стола, но ќе може да се наместат дополнителни 2.000 стола. Изградбата ја почна Градот во април 2004, но ја предаде на државата затоа што немаше пари да ја доврши.

ПРОФЕСИОНАЛЦИ ИЛИ ЦИРКУСАНТИ

Кошаркарската група „Харлем глобтротерс“, составена од Афроамериканци, формирана е во 1926 година во Чикаго. Оттогаш до денес настапиле во 115 земји, а ги гледале повеќе од 120 милиони фанови. Иако играчите располагаат со невидени вештини за играње со топка, мислењата за нив се' уште се поделени, односно за дел од јавноста, сега и во минатото, тие се само циркусанти. Нивниот најголем успех по кој сите ги паметат е во 50-тите години од минатиот век, кога играле меч со професионалната кошаркарска екипа Лос Анџелес лејкерси и убедливо ги победиле. По овој меч забележлив е пробивот на Афроамериканците во професионалните лиги, особено во НБА, кои дотогаш биле составени само од белци. Досега забележале 20.000 победи и 332 пораза.

Јорданка Ивановска