ВО РАМКИТЕ НА ЕВРОПСКИОТ УНИВЕРЗИТЕТ РМ

Отворена прва приватна стоматолошка клиника

Претседателот Бојо Андрески истакна дека во Стоматолошкиот центар граѓаните наскоро ќе можат да се лекуваат и со сини картончиња

Стоматолошкиот клинички центар, што ќе функционира во рамките на Европскиот Универзитет РМ, вчера беше осветен од поглаварот на МПЦ г.г. Стефан, а во присуство на професорите, студентите и челниците на оваа високообразовна установа. Овој Стоматолошки клинички центар има шест клиники, а тоа се Клиника за болести на забите и ендодонтот, Клиника за протетика, Клиника за болести на устата и парадонтот, Клиника за ортодонција, Клиника за детска хирургија и Клиника за орална хирургија.

Претседателот на Европскиот универзитет, Бојо Андрески, истакна дека објектот се осеветува, бидејќи тој претставува една нова ѕвезда во РМ. Најави дека неговото отворање ќе се случи за неколку дена.
- Стоматолошкиот центар освен што ќе ги задоволува нашите стандарди, тој ги задоволува и светските стандарди, па може и да се каже дека и ги надминува сите граници, бидејќи со помош на деканката Славјанка Оџаклиевска, ние со нашите сили и знаења направивме нешто со што ќе се гордеат многу генерации, а посебно студентите на Факултетот за стоматологија. Овој Стоматолошки клинички центар не беше во план да го направиме, меѓутоа сакајќи да го заокружиме процесот на едукација, дојдовме до заклучок дека треба да бидеме независни, треба да бидеме подобри и најдобри, рече Андрески.

Претседателот на Европскиот универзитет РМ најави дека во иднина Стоматолошкиот центар ќе биде проширен и од сегашните 70 вработени како стручен кадар, догодина бројката ќе биде зголемена на 105 вработени лица.
- Заедно со деканската управа на Факултетот за стоматологија за Клиниката за детска хирургија решивме да додадеме новитет, а тоа е децата да гледаат цртани филмови, додека им се поправаат запчињата за да не бидат уплашени, бидејќи тие оваа состојба ја доживуваат како еден вид траума. Сето ова е резултат на целиот декански тим, истакна претседателот Андрески. Притоа, додаде дека во Стоматолошкиот центар граѓаните наскоро ќе можат да се лекуваат и со сини картони.

Славјанка Оџаклиевска, декан на Факултетот за стоматологија, рече дека идејата потекнува уште од времето кога се одлучи да се формира Стоматолошкиот факултет.
- За вежбање на студентите практично за настава мора да има и клиничка настава, којашто почнува некаде по третата година, па токму на време стасавме да го оформирме клиничкиот центар, којшто не само што ќе служи за едукација практично на студентите, туку ќе служи за услуги на целото население, рече Оџаклиевска.

Ќе се гради болница во Аеродром

Жителите од Аеродром се скептични дека ќе се гради ваков објект и мислат дека на атрактивната локација ќе никне трговски центар

Министерството за транспорт и врски наскоро преку јавна лицитација ќе продава државно земјиште на територијата на општина Аеродром, на кое треба да се гради голем болнички комплекс. Според општинарите од Аеродром, на лицитацијата ќе може да учествуваат странски и домашни компании. Но, жителите од Аеродром се скептични дека ќе се гради болница и мислат дека на нејзино место ќе никне трговски центар.

- Според детаљниот урбанистички план „Бисер АРМ УЕ В“, предвидена е изградба на болнички комплекс зад касарната „Гоце Делчев“, кој ќе гледа кон булеварот Србија. Во земјава има неколку приватни болници, па се надевам дека и за оваа атрактивна локација ќе голем интерес. Освен поликлиниката „Јане Сандански“, во општината нема поголема здравствена институција. А општината се шири и има поголема бројност, така што болницата ќе биде добредојдена. Станува збор за голема маркица, па затоа се надевам дека ќе се изгради голем болнички комплекс. Во Општината во план е и изградба на градинка, средно и основно училиште, комерцијални и културни објекти и, се разбира, цела една зона ќе биде наменета за спорт и рекреација, а со изградбата на болницата ќе се заокружи урбанистичката целина. Аеродром навистина ќе биде најпосакуваното место за живеење - вели градоначалникот Ивица Коневски.

Граѓаните од Аеродром се скептични дека планот за изградба на болницата ќе биде успешен.
- Идејата за изградба на болница е повеќе од добра, а тоа и ме плаши. Многу е важно да се гради, тоа и останува, но не е добро ако се постават темели и на тоа да остане. Аеродром е голема општина, можеби според бројот на жители колку некој град од внатрешноста на земјава. Затоа, не само што е неопходна болница туку е и пожелна. Подобро е да се гради болница, отколку трговски центар. Веќе сум изморен од презентациите на деталните урбанистички планови каде што се планира само изградба на катни гаражи и на трговски центри - вели пензионерот Диме Петровски.

Од Општината Аеродром велат дека според детаљниот урбанистички план „Бисер- АРМ, УЕ В“, покрај болничкиот комплекс, на површина од 5,20 хектари се планира изградба на четири станбено-комерцијални објекти, еден објект за лесна индустрија и дури 16 станбени објекти, од кои еден е веќе во градба.

Марија ТАСЕВ

Амбулантите во Скопје од ’63 ќе се реновираат од темел

Во Скопје има 7 вакви амбуланти кои веќе се дотраени иако неколкупати се обновувани. Се наоѓаат во Бутел, Автокоманда, Лисиче, Маџари, Карпош. Ѓорче и Тафталиџе. Најголем дел се дадени под концесија, но во сите има лаборатории и пунктови за вакцинација кои се во состав на Здравствен дом Скопје.

Кога ќе се изградат каде има потреба ќе се пружаат  и специјалистички услуги.

-Оваа реализација се врши во тековната 2012 година, рок на извршување е 1 година, кога сите овие времени објекти ќе бидат заменети со цврста градба, вели Боби Бојчевски од Здравствен дом Скопје.

Целата инвестиција ќе чини околу 1 милион евра.

-Финансиски средства се обезбедени од буџетот на Здравствен дом Скопје, Владата на Р. М и министерството за здравство, додава Бојчевски од Здравствен дом Скопје.

Од здравствен дом Скопје додаваат дека со реконструкцијата на амбулантите на пациентите ќе им обезбедат нормални услови за здравствени услуги.http://sitel.com.mk/dnevnik/makedonija/ambulantite-vo-skopje-od-%E2%80%9963-ke-se-renoviraat-od-temel