Велосипедите и натаму ќе се рентаат за 10 денари

Од „Градски паркинг“ не успеаја да издејствуваат поскапо рентање, што го правдаа со неликвидност на проектот

Деспина Трајковска



И годинава, втора сезона едноподруго, градските велосипеди ќе се рентаат по цена од 10 денари од час и без аванс. Иако од ЈП „Градски паркинг“ неодамна предложија изнајмувањето за еден час да изнесува 15 денари, а за загарантирана безбедност на велосипедите граѓаните да остават аванс, сепак, од Градот процениле дека поскапувањето негативно би се одразило на проектот што лани наиде на позитивни коментари кај скопјани.

За конечната цена, дефинитивно, ќе треба да пресечат градските советници. Тие денеска ќе одлучуваат за предложениот ценовник на ЈП „Градски паркинг“ од каде што сметаат дека повисока цена треба да се наплаќа барем за дуплите велосипеди што ќе се купат наскоро. Еден час рентање на тие велосипеди надлежните предлагаат да изнесува 30 денари.

Борче Јакимовски, директор на „Градски паркинг“, цената за двојните велосипеди ја правда со поголемите издатоци за одржување на велосипедите.

„Сметаме дека и во овој случај парите од рентањето нема да бидат доволни за тековно одржување на целиот проект, но процените на надлежната комисија од Градот беа спротивни, па така ценовникот, очигледно, ќе биде истиот како и лани“, вели Јакимовски, кој информира дека во Градот не поминала ниту идејата на УО на ЈП за секој изнајмен велосипед граѓаните да остават аванс како еден вид гаранција за неговата безбедност.

Годинава „Изнајми велосипед“ ќе стартува на 1 април. И во претстојната сезона ќе важи истото работно време како и лани, односно велосипед ќе може да се изнајмува секојдневно од 7 до 23 часот. Градски велосипед ќе може да користи секој полнолетен граѓанин со приложување лична карта.

За разлика од лани кога велосипеди се изнајмуваа само од три пункта, на плоштадот „Македонија“, кај „Треска“ и пред ТЦ „Бисер“ во Аеродром, годинава е планирано бројот на пунктови да се зголеми за уште два. Планирано е пункт да има и на градскиот паркинг во Ѓорче Петров и оној кај Транспортниот центар. Наместо досегашните 70, на располагање ќе бидат уште најмалку 100 нови велосипеди, и тоа не само „обични“, туку и детски и двојни велосипеди, односно со две седишта. За проширување на возниот парк, претпријатието планира да потроши 500.000 денари, а во фаза на набавка на нови велосипеди е Градот Скопје, благодарение на добиената наменска донација од Кина во висина од 600.000 денари.

Инаку, додека проектот наиде на позитивни коментари, надлежните трпеа штети токму од граѓаните што ги изнајмуваа велосипедите. Тие беа изложени на демолирања, дури имаше регистрирано и кражби на делови од велосипедите, па само за поправка, ЈП имаше расходи во висина од 150.000 денари, додека остварениот промет изнесуваше 30.000 денари помалку.