Индустриски објекти и зони (општо)

На скопска „Првомајска“ процвета приватниот бизнис

Стопанствениците чии фирми се лоцирани на оваа улица тврдат дека добро им оди и дека имаат муштерии

Александар Пешев

Улицата „Првомајска“ полека, но сигурно се претвора во една од поголемите индустриски зони во околината на Скопје. Слободно може да се каже дека таму веќе цути приватниот бизнис. Пред десетина години, оваа улица, која ги поврзува населбите Кисела Вода и Драчево беше позната само по ОХИС, кој беше единствениот индустриски објект на таа локација. На другите плацови од овој реон имаше само куќи и ниви. Денес, спроти ОХИС се изградени повеќе фабрики, магацини, продажни салони и продавници. Од неодамна дури и неколку големи компании лоцираа дел од своите бизниси на тој простор.

Стопанствениците кои работат на оваа улица тврдат дека им оди добро и дека имаат купувачи, и покрај фактот што оваа индустриска зона се наоѓа далеку од центарот на Скопје.

„Успеавме да привлечеме муштерии со успешна маркетинг-кампања и со високиот углед што го стекнавме преку другите претставништва кои нашата компанија ги има во градот“, објаснува Лидија Анческа, вработена во „Карат“, компанија која тргува со мебел и репроматеријали, како што се шпреплочи и иверки. „Мое лично видување е дека во овој реон полека, но сигурно се отвораат нови компании и фабрики, односно дека тој се претвора во една активна индустриска зона“, додава Анческа.

Улицата „Првомајска“ е дел од територијата на Општина Кисела Вода. Станува збор за една од трите индустриски зони кои се изградени во оваа скопска општина. Оттаму тврдат дека за поддршка на бизнисите кои се развиваат на територијата на општината е оформена стопанска комора. „Целта на тоа тело е да ги поддржува сите бизниси кои се развиваат на територијата на општината. Наша цел е да понудиме секаква поддршка за развој на нови бизниси, бидејќи тоа наедно отвора нови работни места“, објаснува Тони Чуповски, портпарол на општината.

Сепак, стопанствениците тврдат дека, и покрај големиот потенцијал, во оваа новооформена индустриска зона се' уште има простор за подобрување. „Меѓу нашите основни забелешки се што не добиваме комунални услуги и што немаме канализација. Значи, сите одводи се' уште се поврзани со септички јами. Отпадоците и ѓубрето никој не ги собира и сето тоа е оставено на нас“, вели Анческа.

Плацовите на улицата со денационализацијата се вратени во приватна сопственост. Во овој реон полесно е да се најмува плац. Засега речиси ниту еден од сопствениците на приватни плацови не е заинтересиран за продавање.