Телеком арена (арена Филип II Македонски)

Јавното станбено претпријатие, минатата година, почна со изградба на капиталниот објект - северната трибина на Градскиот стадион во Скопје. Ќе успеете ли да ја завршите трибината до средината на 2009 година, како што ветивте, имајќи го предвид одржувањето на парламентарните избори и составувањето на новата Влада, кои ќе ги закочат капиталните инвестиции што ги реализира власта?
- Не сметам дека парламентарните избори, кои се во тек, и тие што следат наредната година нешто ќе изменат бидејќи со инвеститорот Бетон имаме склучено договор и градежните работи се во тек. Врз основа на договорот, изградбата на северна трибина треба да заврши во јуни 2009 година, имајќи предвид дека реномираната компанија го гради овој капитален објект. Не верувам дека ќе има какви било одложувања или непочитување на договорот. Во секој случај доколку настане застој или прекин во изведувањето на работите договорот содржи цврсти одредби кои ја регулираат оваа проблематика. Во тек е и постапка за источната и за западната трибина и планираме кога ќе биде подготвен целокупниот проект, до крајот на годината, ние да го објавиме и тендерот за доизградба на Градскиот стадион. Тоа значи дека најдоцна до 2011 година, ќе бидат готови и источната и западната трибина, со што Градскиот стадион ќе биде успешно завршен .

Имате ли проекции колку тоа ќе чини со оглед на фактот дека веќе неколкупати изјавувавте дека Градскиот стадион во Скопје ќе го правите по теркот на англискиот Вембли?
- Вембли е стадион со свои специфики. Сакавме да видиме и примениме некои помодифицирани начини на функционирање на стадионот и затоа отидовме во Англија, за да примениме некои искуства во изградбата на нашиот стадион. Сепак, морам да напоменам дека станува збор за два различни проекта, иако некои работи кои ги видовме таму ги искористивме и ги вметнавме во нашиот проект. Тоа е подземната улица до северната трибина со која фудбалерите директно ќе влегуваат во Градскиот стадион, а не како досега да се симнуваат пред стадионот и да бидат изложени на какви било несакани последици од страна на навивачите. Со проектот, според кој се гради трибината, ќе има и лифт за ВИП гости. Изградбата на северната трибина чини 14,5 милиони евра, а засега немаме прецизни информации колку ќе чини изградбата на источната и на западна трибина бидејќи се уште не е подготвен целокупниот проект. Од тие причини не би сакал да шпекулирам со бројки. Северна трибина, според проектот е предвидено да биде главна трибина и ќе собира 12.000 гледачи. Источната и западна, заедно, ќе собираат 18.000 гледачи. Со тендерот за овие две трибини ќе влезе и обновата на целокупниот терен, набавка на еден огромен семафор, кој што ќе биде наменет за стадионот и ред други работи кои што се неопходни за да функионираат тие две трибини.