Градот Скопје, денеска ја почна реконструкцијата на заштитната ограда на мостот „Гоце Делчев“. Почетокот на градежните работи на оградата го означи градоначалникот на Град Скопје, Коце Трајановски.

Градоначалникот Коце Трајановски најави дека ќе се реконструираат оградите во должина од 600 метри, од двете страни. Покрај оградата ќе има и 26 канделабри.

-Вкупната вредност на инвестицијата е 22 милиони денари, а според тендерот рокот на изработка е 90 дена, меѓутоа има можносто овој рок да биде пократок, зависно од временските услови и работите кои треба да се планираат. Тежината на оградата која ќе се заменува е само за 7 килограми е потешка од постојната, така што условот за да не се надмине тежината, е во рамките на дозволената, рече градоначалникот на Скопје.

Новата ограда на мостот „Гоце Делчев“ ќе биде изработена од цевкасти профили (Ф 32 – 60 милиметри), а ќе ја составуваат 144 монтажни елементи со должина од 3,6 метри и височина од 1,2 метри, коишто ќе бидат поврзани со столпчиња.

Контурите на мостот ќе ги нагласуваат рефлектори за амбиентално осветлување.

Реконструкцијата на заштитната ограда на мостот „Гоце Делчев“ ќе ја изведуваат екипите на градежната фирма „Бауер БГ“, а идејното решение за оградата на мостот „Гоце Делчев“ е на авторите Михајло Дранговски и Јован Радевски.

Трајановски истакна дека, до крајот на овој месец целосно ќе бидезавршен и пуштен во употреба мостот кај МАНУ, а во текот на утрешниот ден официјално ќе биде пуштена и улицата „Мито Хаџивасилев Јасмин“.