Седум вагони на МЖ годинава ќе добијат нови тапацирани седишта, функционални прозорци, врати и чист под

Сања Наумовска

И македонските возови, конечно, почнуваат да личат на европски. Нови тапацирани седишта, функционални прозорци, врати и чист под во вагонот. Оваа слика веќе еден месец ги изненадува граѓаните што со „Македонски железници“ патуваат на релацијата Скопје - Битола. Старите, валкани, распаднати и искршени возови, полека, но сигурно ќе заминат во историјата. Ова е првиот стар вагон од седумте што „Македонски железници“ целосно ќе ги реконструира годинава во велешката фабрика „Колска“. За петнаесетина дена патници ќе прими и вториот реновиран вагон, а за два месеца уште два старо-нови вагони. Првиот вагон сообраќа во рамките на бизнис-линијата „Пелагонија експрес“, за која се плаќа поскап билет. Другите вагони ќе бидат распределени на линиите за Гевгелија и за Кичево. Планирано е да се обноват вкупно 30 стари вагони во следните неколку години, а дел од нив ќе имаат и де лукс услови. Ќе бидат климатизирани и опремени со модерни вакуум-тоалети и адаптирани за пристап на лица со посебни потреби.

За стандардната реконструкција „Македонски железници“ ќе платат од 70.000 до 100.000 евра за еден вагон, односно 300.000 евра за де лукс опремените возила. Тоа е за неколкупати помалку од сумата потребна за купување нови модерни вагони. Од „Железници“ информираат дека на европските пазари тие чинат околу еден милион евра, а во план е во 2015 година да се набават и неколку нови патнички вагони.

„Покрај реконструкцијата на ентериерот, на секој вагон во ’Колска’ ќе му биде освежена и надворешната боја, а целосно ќе биде преиспитана и неговата состојба од аспект на стабилноста и безбедноста за патување. Обновените вагони ќе бидат опремени и со дополнителни уреди за одложено сопирање во услови на опасност, кои се утврдени со европските стандарди за безбедност“, вели Трајче Тошевски, раководител на патнички сообраќај во „Македонски железници-транспорт“. Вработените, вели тој, очекуваат патниците да го чуваат обновениот ентериер, кој првенствено ќе им служи ним.

Покрај патничките, информираат од „ Железници“, во „Колска“ ќе бидат реконструирани и поголем број товарни вагони. Од септември минатата година се обновени околу 60 вакви вагони, а во моментов во погоните на фабриката се работи на уште 18 товарни коли. „Колска“ е една од ретките фабрики на Балканот што врши поправки на вагони и железнички коли. Сопственик е државата, а во неа работат близу 200 работници. Капацитетот на фабриката ги задоволува потребите на „Македонски железници“, а доколку се подобрат условите за работа можно е фабриката да стане конкурентна и надвор од границите на државата. Реновирањето на еден вагон трае три месеци, но вработените во „Колска“ веруваат дека терминот може да се намали за еден месец, односно за еден и пол месец.