Системот како решето, а „Водовод“ ќе си гради зграда

Јавното претпријатие „Водовод и канализација“ ќе гради нова управна зграда, информираат надлежните по вчера објавениот конкурс за идејно решение. Управната зграда нема да биде сама, таа ќе има и свои придружни содржини, но од претпријатието не појаснија што се' се подразбира под тоа. Детали за изгледот и за катноста на објектот, за тоа кој се' таму ќе биде сместен и колку пари ќе се потрошат за изградбата, ќе се знаат по завршувањето на конкурсот и изборот на првонаграден труд.

Од претпријатието не одговорија од каде нова зграда стана приоритет на „Водовод“ ако се земе предвид дека загубите на вода во системот, по разни основи, изнесуваат фантастични 60 отсто. Овој податок беше изнесен во годишниот извештај на претпријатието што пред два месеца го усвои Советот на Градот Скопје и покажа дека загубата со години е практично иста, а поскапувањето на водата за 100 отсто од пред три години, кое беше направено со цел тие да се намалат, било напразно.

Изградбата на нов објект, според надлежните во „Водовод“, е неодложна бидејќи сегашните бараки под Кале се времени објекти, подарени по земјотресот во 1963 година од државите што се солидаризирале со трагедијата. Во одговорот од претпријатието се вели дека во изминатите 20 години многупати била утврдена неопходноста од цврста градба на објект што ќе овозможи основни услови за нормално одвивање на работните активности, па според објаснувањето, токму сега дошло времето таа идеја да види бел ден.

- Управата на ЈП „Водовод и канализација“ функционира сместена во простории добиени благодарение на нашите пријатели од светот и нивната поддршка по катастрофалниот земјотрес во Скопје. Конкретно во нашиот случај тие се донација во форма на времени објекти - дрвени бараки од далечната 1964 година како привремено решение - велат во претпријатието.

Во однос на локацијата, од „Водовод“ не се сигурни каде ќе се наоѓа новата зграда, а не кажаа ни колку приближно би чинела изградбата.

- Се надеваме дека локацијата на која ќе се изгради овој објект ќе биде на постојната, каде што сега се наоѓаат времените бараки. Условите, начинот, роковите и останатите детали за изготвувањето и за пријавувањето на идејните решенија се утврдени во конкурсната документација и огласот што „Водовод и канализација“ го објави на страницата на Бирото за јавни набавки. Согласно награденото идејно решение, ќе се премине кон заокружување на финансиската конструкција, како и кон изнаоѓање можности за соодветни извори на финансирање на објектот - велат од „Водовод“.

Оттаму појаснија дека изградбата на објектот е од исклучително значење за вработените и за корисниците на услугите на претпријатието и затоа тековно, за секоја фаза од изградбата, навремено и детаљно ќе ја информираат јавноста.

Како што е познато, во времени објекти подарени по земјотресот со децении работат и вработените во Град Скопје, во речиси сите општини, во останатите градски претпријатија, како“Паркови и зеленило“, „Улици и патишта“, „Градски паркинг“, но и голем дел од државните претпријатија, како Јавното претпријатие за стопанисување со станбен и деловен простор. За жал, во слични услови се' уште се образоваат илјадници генерации ученици, затоа што многу основни и средни училишта во Скопје се' уште се сместени во трошни и распаднати бараки од по земјотресот, за кои се' уште никој не утврдил дека е приоритет да се изградат во цврста градба.

Јорданка Ивановска