Катна гаража Тодор Александров - кај Беко

Поставен камен-темелник на катна гаража во центарот на Скопје

Катната гаража ќе се гради на површина од околу 3.070 квадратни метри и ќе има седум ката над земја и две нивоа под земја со капацитет од 600 паркинг места и паркиралиште за 120 велосипеди. Објектот ќе биде висок 23 метри, а за влез и излез предвидено е модерно сообраќајно решение и пристап од улицата„ Даме Груев“.

Оваа локација, според премиерот Груевски, е во срцето на главниот град каде фреквенцијата на луѓе е огромна, каде има поголем број институции, фирми и згради и каде проблемите на граѓаните да го паркираат своето возило се секојдневни.

- Токму затоа оваа катна гаража која ќе има седум ката над земја и две нивоа под земја и ќе обезбедува 600 паркинг места, ќе биде вистинско функционално решение на проблемот и ќе биде од значителна корист за граѓаните, рече Груевски.

Тој најави дека во наредниот период ќе почне изградбата на преостанатите катни гаражи од проектот и тоа кај Музејот на Холокаустот, Работничкиот дом, административната зграда на АД Македонски пошти, поранешната зграда на Нова Македонија и на уште неколку други локации каде се најавени приватни инвестиции.

- Пред два месеци започнавме да ја градиме првата катна гаража во близина на Основниот суд Скопје, а пред еден месец почна да се гради и втората во близина на Цветниот пазар. Денеска поставуваме камен темелник и на третата катна гаража од големиот проект за изградба на седум катни гаражи во Скопје, кој е во реализација на Владата, Градот Скопје, општина Центар и Јавното претпријатие за стопанисување со станбен и деловен простор, рече претседателот на Владата.

Со тоа, нагласи Груевски, полека но сигурно, започнува да се решава проблемот со паркирањето во центарот на главниот град, а Скопје добива дополнителен симбол на модерна и функционална метропола.

- Таквиот статус во иднина дополнително ќе биде надграден преку изградба на повеќе скопски сообракајници, меѓу кои изградба на подземна сообракајница која во голема мера ќе го растерети сообраќајот во централното градско подрачје. Изградба на нови патишта со кои главниот град ќе се поврзе со другите делови на земјата, како и со граничните премини со другите земји, рехабилитација и надградба на желизничката станица, изградба на голем број згради и куќи за лица во социјален ризик и други ранливи категории, изградба на каскадни прегради на реката Вардар и решавање на проблемот со фекалните води во дел од Град Скопје, истакна Груевски.

Премиерот потсети дека ќе се гради и скијачка патека на Водно, како и целосно ќе обнови и прошири на Луна паркот и ќе се изгради градски Аквапарк.

Градоначалникот Трајановски информира дека на приземјето и на првиот кат од оваа катна гаража се предвидува простор за деловна трговска намена.

- Сообраќајот по катови ќе се одвива преку спирална рампа сместена во кула. На секој кат се предвидени тоалети за посетителите вклучувајќи и тоалет за лицата со посебни потреби. Објектот е енергетски ефикасен според сите стандарди со модерни системи за греење и ладење и противпожарна заштита, рече Трајановски.

Проектот, кој ќе чини околу 850 милиони денари е на градежниот институт „Македонија“ АД Скопје, а ќе работат екипи на градежната компанија „Конструктор инжинеринг ДД Сплит“. Рокот за изградба е две години. 

Прашан за коментар за вчерашното јавно извинување на граѓаните за сообраќајниот метеж низ градот заради реконструкцијата на улиците и критиките на одредени медиуми, Трајановски рече дека оние што го критикувале ќе ги повика за неколку дена заедно да се прошетаат низ реконструираните улици на градот.

- Секогаш кога се гради условите се влошуваат, но добро е што тоа е во реално време. Заради дождот минатиот викенд не успеавме да ги реконструираме, истакна Трајановски и најави дека доколку дозволат временските услови утре и задутре ќе бидат асфалтирани сите улици.