Живописниот релјеф на нашите улици и булевари

Асфалтот на улиците пред автобуските „плаче“ за реконструкција

Градските власти имаат пари, но приоритетните локации за обнова се' уште не ги утврдиле

Сања Наумовска

Градот Скопје нема детална програма за обновување на раскопаните улици. Деновиве, Јавното претпријатие „Улици и патишта“ започна со крпење на дупките кои се отворија поради снегот и мразот, а особено поради солта и песокот што беа посипувани на коловозите. Сепак, акцијата ќе остане само на пополнување на дупките, без планирање на посериозни зафати таму каде што асфалтот е многу оштетен.

Скопјани, освен на раскопаните улици , се жалат и на „брановите“ на асфалтот на автобуските станици и на раскрсниците. Оваа појава особено е присутна на улиците во центарот на градот, но се забележува и на поголемите булевари каде што сообраќаат автобусите на градскиот превоз. За реконструкција „плачат“ речиси сите раскрсници на „Партизански одреди“, на „Илинденска“, „Димитрие Чуповски“ и други.

Во буџетот за 2009 година, покрај изградбите на „Илинденска“, клучките кај Бит-пазар и Тутунски комбинат и некои други проекти, градските власти имаат предвидено финансии и за реконструкција на асфалтот на одредени раскрсници и автобуски станици. Сепак, во Градот се' уште не знаат на кои локации конкретно ќе се работи. Тоа зависи од процената, а таа ќе се прави напролет.

„Во ставката за реконструкција на улици за 2009 година, во буџетот има 270 милиони денари. Во рамките на овие финансии се предвидени и обновите на некои улици, но приоритетите ќе се направат подоцна, во текот на градежната сезона. Тоа е редовна практика, за да не се доведеме во ситуација да намениме пари за еден проект, а подоцна да заклучиме дека друг е поприоритетен“, објаснуваат во Градот.

Во ЈП „Улици и патишта“, пак, велат дека се подготвени да ја започнат новата градежна сезона. Очекуваат дека ќе добијат налози за реконструкција на над 90 проценти од раскрсниците на градските улици и на автобуските постојки во Скопје, бидејќи се навистина во лоша состојба.

Со новите машини реконструкцијата на улиците ќе ја извршуваат многу поефикасно и побрзо. Дел од возилата и во моментов се на терен, заради пополнување на ударните дупки. Годинава, велат во претпријатието, за прв пат сами произведуваат зимски асфалт, за кој има гаранција дека нема да се уништи во рок од 5 години. Тоа, според нив, дополнително ќе ја подобри сликата на скопските улици.

„Зимскиот асфалт го произведуваме по канадска технологија и очекуваме големи резултати. Откако почнавме со акцијата за пополнување на дупките, имаме потрошено близу 200 тони, со кои сме закрпиле над 400 квадратни метри дупки. Ќе продолжиме се' до последната, а веднаш потоа ќе размислуваме и за поголемите зафати“, вели Илија Мартиновски, директор на „Улици и патишта“.