Реконструкција на А1 / Е75

Владата не успеа да обезбеди пари во висина од 13 милиони евра годинава за асфалтирање на автопатот

Друштвото на конструкторите на Македонија и' додели прва награда на „Џесаш“ за изведба на проектот за мостовите од Скопје до Велес

ВЕРЧЕ ГЕОРГИЕВСКА

Пред финализирање на мостовите од Скопје до Велес автопатот на целиот потег е раскопан. Огромни дупки се отворени на коловозот. Наместо да се стави целосно нов слој асфалт, државата ќе ги крпи дупките на автопатот.

Екипи на ЈП „Македонија пат“ деновиве забрзано го гребат асфалтот на местата каде што е оштетен коловозот за да се пополнат дупките пред да се пушти делницата од Катланово до Велес за сообраќај. Пред два месеца јавното претпријатие ги закрпи ситните дупки, но откако од државниот буџет не се обезбедија средства за комплетно нов слој асфалт, сега се прават покрупни интервенции на автопатот, кој на места сега изгледа како полн со кратери.

НАТО, со чија финансиска поддршка се поправаат мостовите, обезбеди сума во висина од 35 милиони евра само за реконструкција на оштетените премини, но не и за асфалтирање на автопатот. Владата се обиде да издејствува дел од одобрениот буџет да се пренамени за асфалтирање, но НАТО е категоричен дека за тоа може да се размислува дури откако ќе заврши втората фаза од реконструкцијата, во која е предвидено санирање и на мостовите од Демир Капија до Гевгелија, само ако евентуално остане нешто од парите.

Директорката на Фондот за магистрални и регионални патишта, Наташа Валкановска, вели дека за асфалтирање на двете делници од Скопје до Велес и обратно се неопходни некаде околу 13 милиони евра, пари кои Владата не можела да ги обезбеди годинава. Затоа пред да се реконструираат мостовите, се преземаат активности за санирање на примарните оштетувања на коловозот. За целосно нов асфалт на автопатот, на потегот од Скопје до Велес, кој е во прилично лоша состојба, ќе може да стане збор дури идната година откако Владата ќе успее да ги обезбеди потребните пари. Експертите предупредуваа во неколку наврати дека е најдобро, пред се' од безбедносен аспект, асфалтирањето да се заврши сега, кога нема никаков сообраќај додека се санираат мостовите.

„На автопатот сега се преземаат неопходните чекори за поправка на оштетувањата на коловозот. Асфалтирањето на патот е ставено како приоритет за наредната година, доколку има пари. Ако видиме дека во буџетот за 2008 година ќе се обезбедат средства, тогаш со асфалтирање ќе може да се почне идната година напролет, за што прво треба да се изработи проект, а потоа и да се распише тендер“, појаснува директорката на Фондот за магистрални и регионални патишта, Наташа Валкановска.

Од Министерството за транспорт и врски информираат дека веќе финализира првата фаза од проектот за реконструкција на мостовите. Комплетно се реконструирани вкупно 20 моста, додека четири се во фаза на комплетирање. Во Министерството се категорични дека роковите од страна на турскиот изведуваш „Џесаш“ ќе бидат испочитувани и мостовите ќе се реконструираат до 30 октомври, до кога, всушност, и трае забраната за одвивање на сообраќајот.

Мостовите ќе беа поправени и порано од предвидениот рок, но динамиката ја забави исклучително топлото време во текот на летните месеци, кога градежните работници не можеа да работат на плус 50 Целзиусови степени, изложени на директно сонце.

Турската фирма „Џесаш“, што го доби тендерот за поправка на мостовите во првата фаза, беше наградена за својата работа. Друштвото на конструкторите на Македонија и' ја додели првата награда на „Џесаш“ за изведба на проектот за мостовите од Скопје до Велес, а наградата за проект за 2006 година ја доби проектантски тим од Градежниот факултет. „Џесаш“ е добитник на наградата како изведувач, но, всушност, градежните работи на мостовите и целиот товар падна на македонските фирми „Гранит“ и „Синтек“.

По санирање на 29. мост од Катланово до Велес, треба да се поправат и оштетувањата на уште 21 мост од Демир Капија до Гевгелија. Тие ќе се реконструираат идната година, а НАТО ќе треба да распише нов тендер за изведувач на градежните работи. Од НАМСА, агенција што обезбедува логистичка поддршка на НАТО, велат дека тендерот ќе се распише навреме, но не соопштуваат кога, и покрај тоа што првата фаза за санација на 29 моста е при крај.

Од денеска напладне повторно ќе се вози двонасочно на автопатот Скопје- Велес -Скопје. Реконструкцијата на 29-те мостови на делницата Катланово - Велес е завршена. Турската фирма "Чесас" ги заврши градежните работи, јавното претпријатие "Македонија пат" ги закрпи дупките на коловозот на овој дел од автопатската делница и ги постави заштитните банкини и метални жици против одронување на карпи.
Реконструираната делница Катланово - Велес денеска кај клучката Катланово во употреба ќе ја предадат министерот за транспорт и врски Миле Јанакиески и генералот на штабот на НАТО во Скопје Џон Дуранс. Санацијата на мостовите и надвозниците на автопатот Скопје - Велес чинеше 35 милиони евра. Градежните работи започнаа лани во октомври со пари што ги обезбеди НАТО како компензација за користење на автопатот за време на косовската криза. Во изминатата година делницата Катланово - Велес беше затворена и сообраќајот се одвиваше двонасочно по автопатот Велес - Скопје. Поради непочитување на поставената сигнализација, оваа делница цела година беше сообраќајна црна точка и однесе многу човечки животи.
У.Ј.

До крајот на годинава ќе бидат реконструирани, според НАТО стандардите, 21 мост на автопатската делница од Демир Капија до Гевгелија. Ова на министерот за транспорт и врски, Миле Јанакиески му го вети генералот на НАТО штабот во земјава, Стојан Генков и директорот на логистика во НАМСА, Булент Тудеш.

- Во моментов веќе се работи на целосна санација на седум мостови, поради што е извршено и пренасочување на сообраќајот во делот каде што се изведуваат градежните работи. Се договоривме третата фаза во износ од 10 милиони евра да почне до јануари 2009 година. Со неа се предвидува обновување на патните правци каде што има оштетен асфалт - рече Јанакиески.

Генералот на НАТО штабот во Скопје истакна дека првата фаза од овој проект кога беа санирани 29 мостови на автопатот Скопје-Велес, претставува голем успех за сите што учествуваа во обновата.
- Од санацијата на мостовите бенефит ќе имаат сите корисници на патната инфраструктура во иднина - рече Генков.

Претставникот на НАМСА, Булент Тудеш даде кратко резиме на завршената работа во првата фаза и предвидените активности во втората и третата фаза од Проектот за зајакнување и санација на мостовите во земјава. Тој се надева дека изведувачот Џесаш од Турција заедно со подизведувачите Симтек и Гранит до крајот на 2009 година ќе ја реализираат и третата фаза од проектот.

(С. Бл.)