„Монте Карло“ - Струмица

Се руши “Монте Карло“, се гради нов!

• Thursday, 13 September 2012 13:09

Некогашното летно збиралиште на струмичани, познатата летна бавча во срцето на Градскиот парк, “Монте Карло“, се руши. Се гради нов модерен угостителски објект – ресторан. Како што дознава Радио СтрумицаНет, објектот го гради Џим Деловски, повратник од Австралија, кој од неодамна со своето семејство се врати да живее во Струмица.

Објектот е со намена за ресторан и ќе се простира на површина од 2991 м². Според одобрениот план за градба, ќе има подземна гаража (паркинг простор) со површина од 840 м², на приземјето е планирано да има “национален ресторан“ со површина од 696 м², поделен во два дела, првиот кат е планиран за “банкет сала“ за свечености со простор од 890 м² и поткровје од 565 м², каде ќе има соби со 50 легла за ноќевање.

Како што изјави за Радио СтрумицаНет, сопственикот Џим Деловски, новиот угостителски објект ќе биде готов до крајот на април или почетокот на мај, пред почетокот на новата летна сезона. Во самиот објект и околу него ќе има таканаречен “ирски пат“, а целиот внатрешен простор ќе биде со модерен дизајн.

Деловски планира во почеток да вработи 30-тина млади и искусни луѓе од Струмица, кои ќе го опслужуваат работењето во овој нов угостителски објект, со кој ќе се врати некогашното збиралиште на струмичани, посебно во летните ноќи.

Дали угостителскиот објект и понатаму ќе го носи старото име на некогашната летна бавча по кое струмичани си го нарекуваа, “Монте Карло“ или ќе добие ново име, Деловски сеуште размислува. (Р.Ѓ.)

Преземено од www.strumicanet.com