Милениумски Крст

Лифтот ќе биде поставен во средината на Крстот,ќе може да се движи и хоризонтално, по двата крака

Лифтот што ќе биде поставен на Милениумскиот крст на Водно в среда ќе пристигне во Скопје од фабриката „Емо“ во Охрид, најави претседателот на Фондацијата за изградба на Крстот, Благоја Дојчиновски. Тој вели дека директорот на фабриката му ветил дека лифтот ќе биде монтиран до 27 септември, кога православните верници го одбележуваат празникот Крстовден.  Лифтот ќе биде поставен на средината на објектот и ќе се искачува до краците. Тој ќе се движи и хоризонтално по краците, од каде што посетителите ќе уживаат во ексклузивната глетка на панорамата на Скопје.

Дојчиновски вели дека има оптимистички најави и за изградба на жичницата со која посетителите ќе се искачуваат до најновиот симбол на градот. Австриската фирма „Лајтнер“ била заинтересирана да инвестира во изградбата на жичницата, а имаше најави дека и наш иселеник во Австралија е расположен да вложи пари.

- Како фондација ќе побараме од Владата да помогне во финансирањето на жичницата, а постои варијанта таа да биде дадена под концесија. Нејзината изградба ќе чини околу шест милиони евра - вели Дојчиновски.

Појдовната точка на жичницата, според него, би била кај трговскиот центар „Рамстор“. Предвидено е таа да се движи кон поранешниот хотел „Панорама“, па да врти десно кон Милениумскиот крст.

Моментно работници поставуваат арматура на двете плочи на Крстот, по што ќе се поставува нова бетонска кошулица, како подлога за изолацијата. Овие активности се извршуваат со парите што Владата и' ги даде на Фондацијата како поврат на ДДВ, платен при изградбата на објектот. Фондацијата го доби целиот износ од 16.200.000 денари (околу 260.000 евра), од кои осум милиони денари и беа исплатени лани, а остатокот годинава. Со овие пари неодамна беше асфалтиран и патот од Средно Водно до врвот, кој засега е затворен за сообраќај поради опасноста од пожари.

За да ги заштедат парите, од Фондацијата побараа градските власти да им ја дадат коцката што беше извадена при реконструкцијата на плоштадот и на улиците Водњанска, 13 Ноември, Благоја Стефковски и 11 Октомври, со која сакаат да го изведат партерното уредување околу Крстот. Ако ја добијат коцката, нема да мора да купуваат бекатон-плочки, па парите би ги пренамениле за доизградба на објектот, во чие подножје е предвиден ресторан, а беше најавена и изградба на црква.

Од Градот велат дека најголем дел од коцката е потрошен, односно со неа се поплочени неколку скверови и тротоари низ градот.

- Дел од коцката се наоѓа во магацините на претпријатието „Улици и патишта“. Таа не е чиста, односно, на неа е залепен дел од подлогата на плоштадот. Денеска наша екипа ќе оди да провери во каква состојба е коцката и дали ќе одгивара за поплочувањето околу крстот. Доколку има доволно, Градот ќе ја отстапи на Фондацијата - велат градските власти.