Почитувани,

Министерството за транспорт и врски ги отфрла како невистинити пласираните информации со кои се наведува дека е поништена постапката за отуѓување на земјиште предвидено за изградба на хотел во општина Штип.

Ве информираме дека земјиштето наменето за изградба на хотел во општина Штип е отуѓено по пат на јавно наддавање за отуѓување на градежно неизградено земјиште сопственост на Република Македонија, на кое за најповолен понудувач е избрана компанијата „Оаза“ ДОО Штип. Потребните средства се уплатени од страна на најповолниот понудувач во предвидениот рок и во тек е солемнизација на договорот за отуѓување на земјиштето.

Со договорот најповолниот понудувач се обврзува дека во рок од 9 месеци од солемнизирање на истиот, ќе обезбеди одобрение за градба на предвидениот објект од општината, а  истиот  ќе  го  изгради  во  рокот  предвиден  согласно  одредбите  од  Законот  за градење.

Министерството за транспортврски согласно своите законски надлежности спроведува јавни наддавања за отуѓување исклучиво на локации кои претставуваат неизградено градежно земјиште за кои е потврдена имотно-правната состојба и кои се целосно во сопственост на Република Македонија.

Скопје / 19.02.11 / 14:31
Минситерството за транспорт и врски распиша јавна објава за отуѓување на градежно земјиште сопственост на државата за повеќе локации со цел изградба на хотели.

Станува збор за парцела во Гевгелија со површина од 3.092 метри квадратни, градежна парцела во Кратово со површина од 1.657 метри квадратни и две градежни парцели во Битола со површина од 5.669 и 11.443 метри квадратни.

Предвидено е почетната цена на земјиштето да изнесува 61 денар од метар квадратен.

Минситерството за транспорт и врски распиша јавна објава за учество на јавно наддавање и за локација во општина Центар опфатена со ДУП „Дебар маало 1“.

Локацијата е наменета за изградба на државни институции со компатибилна класа намени за деловно – комерцијален простор до 40%.

Вкупната површина на парцелата изнесува 7.528 метри квадратни.

Почетната цена на јавното наддавање изнесува 6.480 денари за метар квадратен, а по изградбата на објектот наменет за општинска зграда, инвеститорот ќе биде обврзан да го предаде на општина Центар

Ќе се гради хотел и казино на Меџитлија

Хотелот „Континентал“ комплетно се реновира

Во скопскиот хотел „Континентал“ во тек е реконструкција на собите. Четириесетина соби од петтиот кат се веќе комплетно реновирани и подготвени за издавање
За десетина дена ќе биде завршена и реконструкцијата на првиот кат, а другите четири ката за околу шест месеци. - Новите соби ќе добијат посовремен изглед и секоја ќе се разликува по дизајнот. Се трудевме да ги опфатиме сите европски стандарди, вклучувајќи електрична инсталација што заштедува енергија, нови врати со картичен сензор, нов мебел, еколошки прозорци, противпожарна заштита, телевизори со рамен екран и сосема нов систем на греење и ладење - вели Антоан Јазбек, претседател на бордот на директори во хотелот „Континентал“. Се реновираат и конференциските сали, фонтана-барот и салонот за масажа. Во план е и поставување летниковец, сала за вежбање и сауна. Комплетното завршување на измените во еден од најстарите скопски хотели би требало да заврши кон крајот на годинава.

Хотелски комплекс ќе никне крај Охридското езеро

недела, 03 април 2011, 12:12

Хотелот во Преспа, гробница за пеликани

И жителите на Коњско и експертите по екологија се против намерата на државата за изградба на хотелски комплекс на Преспанско Езеро

Ако го направат хотелот, ќе направат пустош во недопрената природа на ова место на Преспанско Езеро - загадување од автомобилите, отпадните води... Таков комплекс ќе ги загрози пеликаните, кормораните, целиот растителен и животински свет и затоа нека си бараат друга локација за хотелот. Со ваков револт жителите од преспанското село Коњско вчера се обидуваа да му се спротивстават на Министерството за транспорт и врски да го продаде земјиштето од 1.755 квадратни метри во месноста Рот, на самиот брег. Јавната лицитација е закажана за 15 април, а на продажбата се спротивставуваат и експерти, универзитетски професори што работат на заштитата на Езерото.

Министерството и управата на националниот парк „Галичица“, на чија територија се наоѓа огласеното земјиште, сметаат дека природата нема да биде загрозена. Но, дури сега изјавуваат дека допрва ќе се прават истражувањата за евентуалното загрозување на биодиверзитетот.

Во село Коњско, лоцирано на јужниот дел од езерото, во непосредна близина на границата со Албанија и со Грција, сега има околу триесет куќи од кои само во две-три постојано живеат луѓе. Со другиот дел од Преспа го поврзува земјен пат, па затоа доаѓаат и малку туристи. На песочното полуостровче Рот секој ден престојуваат стотици пеликани и корморани. Селаните велат дека од памтивек тука е хранилиштето на птиците. Преку ден кормораните ловат риби, а навечер се враќаат во своите гнезда на островот Голем Град и на грчкиот Свети Ахил, каде што луѓето им изградиле околу 1.500 гнезда за размножување.

- Рот е нашата најубава плажа со најчиста вода, па затоа доаѓаат туристи. Ако го направат хотелот, ќе има загадување, ќе се направи канализација, а каде ќе одат отпадните води? Сега водата е толку чиста што може да се пие од подлабокиот дел - вели Димитрија Ѓоргиевски од Коњско.

Селаните сметаат дека местото е ризично за градба, зашто се случувало надојдената езерска вода да ја прекрие плажата.

Претставка до Министерството за животна средина испрати и екологистот Петар Бошевски. Во неа прашува дали тоа дало дозвола за градба во ова еколошки чувствително подрачје. Ако се утврди дека не била почитувана процедурата, тој бара од надлежните брза реакција, зашто наддавањето е закажано за една недела.

Во Преспа веќе кружат информации дека на местото око му фрлил наш бизнисмен во Швајцарија и тука сака да гради хотел.

- При носењето на одлуката за проширување на националниот парк беше истакнато дека границата ќе слезе до самиот брег за да се заштитат растителните и животинските видови. Но, сомнително е што во понатамошната постапка границата се помести назад за 500 метри - вели Томе Веловски, шумски инженер.

Од Националниот парк „Галичица“ смируваат со објаснување дека со хотелот ќе се развие туризмот, а ќе се почитуваат сите еколошки стандарди при градбата.

- Тоа е во националниот парк, но е зона дозволена за градба. Со ова селото ќе живне. Од хотелот ќе се бара да ги испочитува сите стандарди за заштита на природата, да има пречистителни станици и слично - вели директорот Зоран Анѓеловски.

Жанета ЗДРАВКОВСКА
Бранко ЃОРЃЕВСКИ

Загрозен и Голем Град

Градежна мина во негибнатиот рај

Државата нуди земјиште кај преспанското село Коњско за изградба на хотелски комплекс по цена од едно евро за квадрат

БИТОЛА - Ќе продаде ли државата бесценето земјиште во национален парк и тоа за едно евро квадрат само за да исполни нечија желба за изградба на хотел? Ќе остане ли негибната природната средина во Преспанско или, пак, кормораните ќе мора да си бараат друг рај за размножување? Одговорот ќе се знае веќе в петок, за кога е закажана јавна лицитација за отуѓување државно земјиште на брегот на Преспанското Езеро. Се нудат 1.755 квадрати што се наоѓаат на тромеѓата со Албанија и со Грција на јужниот дел од езерото, во еколошки чувствително подрачје. Земјиштето е дел од крајбрежјето на селото Коњско и е во состав на националниот парк „Галичица“.

Револт, разочарување и неизвесност се чувствува меѓу Преспанци откако се прошири веста дека државата ќе ја продава најубавата плажа крај езерото, наречена „Рот“. Токму водите крај Коњско, поради недопрената природа, се легло на стотици пеликани, корморани и разни други птици. За Преспанци „Рот“ е една од најубавите плажи на езерото, измислена за холивудски филмови и во никој случај не смее да се дозволи урбанизација, иако и до нив веќе стасала веста дека швајцарски бизнисмен со македонско потекло, кој минатото лето бил во овој крај, посакал да гради токму во нивниот рај.

„Водата е чиста, цело село ја пие. Ќе влеземе малку подлабоко и ќе си наполниме за дома. Ако почнат овде да градат, се' ќе уништат и ќе загадат. За хотел, како што се зборува, ќе мора да направат и канализација. А каде ќе одат тие нечистотии? Се знае, во езерото. И што ќе биде тогаш? Налето овде доаѓаат туристи само поради чистотијата на воздухот и на водата“, вели Митре Ѓоргиевски, 80-годишен жител на Коњско.

Постојани жители на Коњско во последните години се само двајца старци, сопружници. Другите се иселиле претежно во Ресен, но не ги запоставиле своите имоти. Секој викенд го минуваат на своите стари огништа. Покрај езерото се изградени 46 викенд-куќи и од пролет до есен се полни со гости.

„Доколку се остварат намерите на Владата да се продаде дел од крајбрежјето на селото, тогаш ние, мештаните, не ќе можеме да си дојдеме. И свеќа нема да им запалиме на нашите предци на селските гробишта. За тоа ќе треба да му плаќаме на концесионерот“, изјави Христо Ѓоргиевски, жител на Коњско.

Преспанци предупредуваат дека никој што ќе гради на плажата „Рот“ нема да види аир. Водата често ја поплавувала целата плажа, па дури имало години кога езерото доаѓало и до селските куќи. Овој дел од Преспа е котлина на езерото, велат мештаните.

„Ова е езерска котлина и не смее да се продава. Плажата треба да остане на државата, таа да воспостави ред, а не да ја дава за градење. Цела природа ќе се испусти. Пеликаните доаѓаат од островот Голем Град, тука ловат. Кормораните преку ден ловат риби и се враќаат на островот. Ова место е рај за очите и за душата. Големците не смеат да дозволат уништување“, коментира Кире Василевски, искусен рибар од селото Стење.

На новите планови на Владата за плажата во Коњско реагираат и советниците во Општина Ресен. Пред да биде донесен урбанистичкиот план тие предупредија на неправдата што со новата градба може да им биде нанесена на природата, но и на жителите од овој крај. Дотолку повеќе што реонот ќе треба целосно да се урбанизира, да се изградат пат, водовод, канализација.

Во Министерството за транспорт и врски велат дека лицитацијата за земјиштето се распишува на иницијатива на општината Ресен. Иако тврдат дека парцелата не е во националниот парк, сепак, признаваат дека од месното население добиле сознанија за можно загрозување на биодиверзитетот. Поради тоа, пред да пристапат кон продажба ќе побарале мислење од Министерството за животна средина за влијанието врз околината.

Но, Министерството за животна средина и просторно планирање не е во тек со продажбата на земјиште во НП „Галичица“. Според директорот на Управата за животна средина, Филип Иванов, досега до Министерството официјално не е доставена никаква урбанистичко-планска документација. Неизвесно е кога и дали воопшто ќе биде воспоставена комуникација меѓу двете министерства, со оглед на тоа дека лицитацијата е закажана за петок. Сепак, тој е категоричен дека нема да добие согласност и да помине ништо што е спротивно на законот.

„Продажба на земјиште и изградба во национален парк не значи автоматски незаконска постапка бидејќи таму има и заштитени зони, но и зони во кои е дозволено градење. Доколку земјиштето што се продава не е во строго заштитено подрачје на националниот парк, односно не е во прва или во втора зона, тогаш не би требало да има проблем бидејќи во третата зона се дозволени стопански активности, како и изградба на хотели. Но, притоа мора да се запазат одредени услови и да се применат повисоки мерки за заштита на животната средина, со цел да нема никаква деградација на околината“, вели Иванов.

Тој ги отфрла обвинувањата дека е поместена границата на НП „Галичица“. Иванов категорично тврди дека националниот парк и натаму е со старите граници бидејќи на идејата за негово проширување реагирале месното население, локалната самоуправа и неколку шумско-стопански организации. Од друга страна, според Законот за води, не е дозволено да се гради на растојание помало од 50 метри од бреговата линија, поточно од највисокиот регистриран водостој, што автоматски значи дека секоја градба ќе биде доволно далеку од брегот. (Б.А.-А.Б.)

ДОМ бара одлагање на лицитацијата

„Да се одложи продажбата на земјиштето, а потоа задолжително да се отвори експертска јавна расправа за евентуална изградба на хотелски комплекс во Коњско“, бара претседателката на ДОМ, Лилјана Поповска. Според неа, формално-правно не постои законска пречка за изградба бидејќи просторот не е дел од заштитеното подрачје на националниот парк. Но, како што потенцира таа, доколку никне габаритен објект, секако дека ќе биде пречка за непреченото прелетување на ретките птици што тука доаѓаат од островот Голем Град.

„На тој простор нема место за големи урбани објекти што негативно ќе влијаат на биодиверзитетот и целата природа. Потребни се објекти за екотуризам ограничени во простор и во висина. За жал, кај нас е ниска еколошката свест, па не се гледа суштината“, вели Поповска. (Б.А.)

„Галичица“ со исти рамки од 1958 година

Директорот на НП „Галичица“, Зоран Ангелоски, тврди дека границите на паркот се исти од 1958 година, но сега се попрецизно дефинирани откако лани е направено ново зонирање. Просторот е поделен на три зони, првата е зона за строга заштита, втората за одржливо искористување и третата за активно управување. Земјиштето што се продава се наоѓа во последната трета зона и тука се дозволени градежни активности за развој на туризмот.

Ангеловски е сигурен дека со урбанизацијата на просторот нема да се наруши биодиверзитетот, за што најголема гаранција се 11 научни студии за националниот парк изработени од домашни и од странски експерти и професори, вклучувајќи ја и швајцарската агенција за заштитени подрачја. (Б.А.)

Отворен мотел во селото Нежилово