Гаражни објекти (општо)

Паркирање во катна гаража за 8.500 евра!

Општина Центар денеска ќе ја утврдува цената за продажба на паркинзите и на локалите во се' уште неизградената катна гаража кај МТВ

Деспина Трајковска


По неверојатни 8.500 евра ќе се продава едно паркинг-место во катната гаража што ја гради Општина Центар кај МТВ. Квадрат од дуќаните во објектот ќе чини најмалку 1.300 евра. Овој ценовник што го утврдил градоначалникот Владимир Тодоровиќ денеска се очекува да биде одобрен од Советот на Општината. Иако се очекува дел од советниците да не се согласат со предложените цени, првенствено што објектот не е на атрактивна локација, сепак, тие нема да бараат намалување на цените за да Општината ја заокружи финансиската конструкција за изградба на објектот, која е проценета на 5 милиони евра. Имено, општинарите зедоа кредит од 2,5 милиони евра, а остатокот од парите очекуваат да ги обезбедат преку продажба на паркинг-местата и од деловниот простор. Така, со оглед на тоа дека наскоро на општинската адреса ќе стасаат побарувања за веќе изведените градежни работи, Општината брза да го усвои ценовникот и наскоро да организира лицитација за локалите. Меѓу другото, во образложението на предложениот ценовник е наведено дека продажбата треба да се изврши без одлагање. Цената за паркинзите е фиксна, а деловниот простор ќе се продава преку лицитација.

Во предложениот ценовник, кој денеска треба да се разгледува на Совет, оние што планираат да купат дуќан во катната гаража, за квадратен метар ќе треба да платат најмалку 1.500 евра доколку сакаат локал на приземје. Во случај да се заинтересирани за локал на некој од катовите ќе лицитираат со почетна цена од 1.300 евра евра за квадрат.

Инаку, само во случај на продажба на сите локали и паркинг-места Општината ќе ги обезбеди потребните пари за доисплата на ангажираните во изградбата, покрај парите од кредитот. Во спротивен случај, како и од каде ќе ги плати побарувањата, градоначалникот Тодоровиќ можеби ќе појасни денеска.

Токму поради сомнежите дека ќе има слаба заинтересираност за паркинзите и за дуќаните во објектот, опозицијата во Советот неколкупати досега напомена дека катната гаража е промашен капитален објект. Од СДСМ сметаат дека некоректно е што воопшто Општината се задолжила за изградба на објектот и истовремено ризикува со продажба на паркизните и деловниот простор да ја затвори финансиската конструкција. Според опозиционерите, катната гаража нема економска оправданост првенствено што се гради на неатрактивна локација.

Инаку, таа треба да биде готова до идната пролет. Ќе има капацитет од околу 500 паркинг-места со бруто развиена површина од речиси 19.000 квадратни метри, од кои 1.537 квадрати ќе бидат наменети за деловен простор. Деловниот простор ќе се наоѓа на првите три ката, а на другите два ката и едно подземно ниво ќе се користат за паркирање.