Скопска обиколница [A2/A4]

Нови рокови за обиколницата на Скопје

Далноводите уште не се дислоцирани, имотите не се обесштетени, ако се финишира во јуни, ќе биде дури и добро

Билјана Ангеловска

Обиколницата на Скопје треба да биде целосно завршена до април годинава. Ова го најави министерот за транспорт и врски, Миле Јанакиески, на минатонеделната собраниска седница, одговарајќи на пратеничко прашање кога конечно ќе биде предадена во употреба обиколницата на Скопје.

„Согласно со договорот со кредиторот и динамичкиот план за работа, крајниот рок е јуни. Но, според состојбата на терен, очекувам тоа да се случи во април“, рече Јанакиески.

Дали ќе се исполнат очекувањата на Јанакиески изградбата да биде завршена во април, останува да се види. Но, според фактичката состојба на теренот каде што гради „Гранит“, реално, тешко е да се поверува во такво нешто.

Одговорните во Агенцијата за патишта тврдат дека веќе нема посериозни пречки за работа, проблемите со далноводите се решаваат тековно и само се чекаат повисоки надворешни температури за да се постави завршниот слој асфалт. Но, очигледно не е баш така.

Според она што може да се види на терен, реално е обиколницата да биде завршена најрано до јуни. Не затоа што се потребни високи температури за завршниот асфалтен слој туку зашто има уште многу да се работи. Точно е дека за полимеризираниот асфалт температурата треба да биде повисока од 10 Целзиусови степени, но повеќе од јасно е дека времето не е единствениот виновник за незавршената обиколница.

Оперативата на „Гранит“ и натаму има проблеми со далноводите кај Стајковци. Иако МЕПСО уште во октомври ветуваше дека ќе ги исклучи од напон за да може да бидат дислоцирани, досега тоа е сторено само на еден. Уште еден 35-киловолтен далновод чека да биде исклучен, а кај трет, пак, се' уште има нерешена експропријација. Имотноправни проблеми се' уште има и на неколку натпатници, како и на еден приклучок.

Очигледно, одговорните во Агенцијата за патишта (поранешен Фонд за магистрални и регионални патишта) не можат да се справат со проблемот со земјиштето. Доказ за тоа е шестгодишната работа на 15-ината километри од обиколницата. Всушност, изградбата на првата фаза од обиколницата на Скопје веќе е длабоко навлезена во седма година, а најголемата причина за маратонската изградба се нерасчистените имотноправни односи.

Првата фаза од обиколницата, делницата од Хиподром до Оризари, е во вкупна должина од 14,7 километри и почна да се гради во август 2002 година. Втората делница од Оризари до Сарај е долга 11,8 километри и ја изгради „Терна“. За разлика од „Гранит“, грчката фирма немаше проблеми со трасата, па бидејќи доби релативно чисто земјиште, брзо и ја заврши својата работа. Тоа е само уште една потврда дека квалитетот на изведувачот нема никаква улога во брзината на реализација на обврската. Доколку скопски „Гранит“ имаше слободен терен, својата работа ќе ја завршеше многу пред да стартува втората фаза, а обиколницата на Скопје ќе беше комплетно завршена во цела должина уште во минатата година.

Првата делница од Хиподром до Оризари што ја гради „Гранит“ е во вкупна должина од 14,7 километри, додека втората од Оризари до Сарај е долга 11,8 километри и ја изведуваше „Терна“.

Обиколниот пат на Скопје е дел од Коридорот 8 и има посебна важност за Македонија, бидејќи ја поврзува со Бугарија и со Албанија.