Кале уште ги чека барокните хотели

Изминаа три години откако по нарачка на Владата беше донесен ДУП наменет, пред се', за привлекување странски инвестиции

Деспина Трајковска

Само еден од планираните пет хотели под Кале е извесно дека наскоро ќе почне да се гради. Сопственикот на една од парцелите веќе ја има обезбедено градежната дозвола, другиот се' уште ја чека, додека еден плац допрва ќе се продава. Така барем тврдат од Општина Центар, без конкретно да одговорат дали градежна дозвола за хотелот веќе си обезбедил и поранешниот владин функционер Марјан Јованов или, пак, извесната „3Д Тим инвест“, која стана сопственик на плац за кој претходно најмногу излицитира „Воденица-оне“, но, сепак, се откажа од него.

„За едниот хотел е издадено одобрение за градба, а за другиот е отпочната постапка за добивање градежна дозвола“, штуро одговараат од Центар.

Марјан Јованов, кој кога ја купи парцелата беше на чело на Дирекцијата за нафтени резерви и кратко време потоа без конкретно издржано објаснување ја напушти функцијата, вчера не беше достапен да коментира за случајот. Останува непознато дали се подготвува да почне да гради и во која насока го планира хотелиерскиот бизнис. Тој купи едната од петте парцели наменети за хотел за околу 355.000 евра. За 8.745 квадратни метри понуди најмногу од деветте учесници на лицитацијата, односно за квадрат плати 2.500 денари.

„Договорот за отуѓување неизградено градежно земјиште со физичкото лице Марјан Јованов е солемнизиран на 22.2.2011 година и во тек е рокот од девет месеци за добивање одобрение за градење од Општина Центар“, информираат од Министерството за транспорт и за врски. Оттаму додаваат дека другата продадена парцела во меѓувреме добила нов сопственик, бидејќи избраниот најповолен понудувач на првата лицитација не ја уплатил понудената сума навреме.

„‘Воденица-оне‘ не ги уплати средствата во согласност со постигнатата крајна цена на јавното наддавање во потребниот законски рок. За оваа локација се распиша повторна објава за отуѓување по пат на јавно наддавање и за најповолен понудувач беше избрана компанијата ‘3Д Тим инвест‘, со која договорот за отуѓување на земјиштето е солемнизиран на 25.3.2011 година и во тек е рокот за обезбедување одобрение за градба“, дообјаснуваат од Министерство кое кон крајот на идниот месец ќе одржи лицитација за третата наменска парцела за хотел.

Во меѓувреме не кажуваат дали постои можност сопствениците евентуално да ги препродадат веќе купените парцели на трети лица или, пак, договорот за продажба потпишан со државата ги спречува во евентуалните такви планови. Така, со сигурност не можат да се отфрлат шпекулациите дека сопствениците на големо размислуваат да се откажат, односно да ги продадат атрактивните локации на заинтересирани странски фирми.

Инаку, за сите планирани хотели инвеститорите имаат обврска да ја обезбедат градежната дозвола во рок од 9 месеци по купувањето на земјиштето, а објектите да ги изградат во определен законски рок. ДУП-от налага сите да имаат стилска фасада, најмногу до три ката, а некои до два. Освен хотелски комплекс, урбанистичката рамка предвидува под Кале да се изгради и катна гаража и спортски-комплекс со апартмани и со терени.

Речиси три пати поевтини плацови

Наместо да инкасира неколку милиони од продажбата на наменското државно земјиште, државниот буџет досега се полни со речиси три пати помали суми од планираните. До сега продадените парцели се оттуѓени за помалку од еден милион евра, односно метар квадратен земја ги чинеше сегашните сопственици околу 40 евра, иако претходно од ресорното министерството ги нудеа плацовите за повеќе од 100 евра за квадрат, но останаа непродадени истите. Така беше се' додека државата не одлучи да го продава земјиштето за едно евро квадрат, што предизвика голем интерес, па на една лицитација имаше дури девет заинтересирани субјекти.

Со години стојат две спорни локации

Дури се чека на изградба на засега два хотела, имајќи ги предвид веќе продадените парцели и роковите за градба што ги обврзуваат инвеститорите, државата се' уште го расчистува случајот со спорните плацови во реонот. И натаму траат судските постапки за разрешувања на случајот откако Владата во нејзиниот претходен мандат се посомнева во законитоста на продажбата на локациите спроведени во 2006 година. „За две локации е во тек постапка за раскинување на договорите за отуѓување заради констатирани отстапувања од Законот за градежно земјиште. Овие постапки се водат пред надлежен суд“, информираат од ресорното министерство.

Наместо странци, газди се локални бизнисмени

Засега воопшто не е остварена идејата да се привлечат странски инвеститори за што ДУП-от беше донесен наменски во 2009 година и тоа по нарачка на Владата. Наместо како што беше планирано плацови да купат странски компании што би донеле некој од бренд-хотелите, тие станаа сопственост на локални бизнисмени што не се изјаснуваат за плановите со хотелиерскиот бизнис. Во меѓувреме, сигурно е дека не се оствари намерата државата да инкасира милионски суми од атрактивните парцели. По неколкуте неуспешни обиди за нивна продажба, државата во меѓувреме ги смени плановите и овозможи истите да се продадат по едно евро квадрат, што ги привлече локалните бизнисмени.

Бројот на хотели во земјава расте, но бројот на собите и креветите во нив опаѓа

За која парцела се работи. Од веста неможе да се добие некоја слика. 

Тоест малку е контрадикторно со поставената фотографија и името на урбанистичкиот план, кој претпоставувам е во опфатот кај полигонот спроти ‘‘Градски‘‘, а и најлогично изгледа да е таму, таму се предвидени хотели, знам за еден веќе од претходно е откупена парцелата, оваа ќе биде втора ако не се лажам. Во тој случај остануваат уште една или две парцели за хотел во тој простор. Секако, можно е и да грешам.

Министерството за транспорт и врски продаде две парцели на левиот брег на Вардар во Скопје, непосредно под американската амбасада, опфатени со ДУП „Централно зеленило покрај Вардар – Парк 2“. Се работи за градежно земјиште кое беше огласено за продажба минатиот месец со почетна цена од 61 денар за квадрат, а е наменето за изградба на хотел и катна гаража.