Концесија на автопатишта

Министерството за транспорт и врски уште еднаш ќе прави консултантска анализа за тоа како е најисплатливо да се градат автопатиштата од Коридорот 8. Иако студијата на Луис Берже, која ја чинеше Владата 1,4 милиони евра, покажа дека е неисплатливо овие патишта да се градат од приватен концесионер, Министерството сега ќе бара уште една студија. Ама пари од ЕУ-фондовите за изградба на модерни сообраќајници нема да бара, иако токму тој модел го применуваат сите други земји во регионот.

Според министерот за транспорт и врски, Миле Јанакиески, се бара нова анализа, која ќе ги ревидира податоците и ќе препорача која е најприфатлива варијанта за реализација на овој стратешки инфаструктурен проект. Според искуството, за обезбедување пари за консултанти, изработка на анализа и подготвување тендер се потребни 1-2 години. Првите километри автопат во најоптимистичка варијанта може да ги очекуваме во 2015 година.

„Доставивме апликација до ЕБРД за добивање средства од WBIF, кои ќе се користат за консултант кој би направил анализа и врз база на неговите укажувања би продолжиле активности и постапки согласно со Законот за јавен долг со меѓународните банки за добивање на потребните средства. Она што беше најголем проблем во постапката за концесија е обезбедувањето финансиски средства, посебно во економска криза“, вели Јанакиески.

Иако Владата пред три години одлучи сите делници од Коридорот 8, поделени на два пакети, да ги даде под концесија, министерот Јанакиески сега вели дека најисплатлива за концесионерите е само делницата Гостивар-Кичево.

„Студијата на Луис Берже прогнозираше раст на сообраќајот во наредните 30 години, односно покажуваше колку би растел превозот на стока и патници и бројот на возила по коридорите. Според тие параметри, најверојатно, најисплатлива за концесионери ќе биде само делницата Гостивар-Кичево. Но, тоа сега уште еднаш ќе побараме да ни го ревидира нов консултант, кој ќе ни препорача што би било прифатливо и на кој начин е најисплатливо да се финансира изградбата на Коридорот 8“, истакна Јанакиески.

Oстанатите автопатишта, поради слабата фреквентност на возила, Владата планира да ги гради со задолжување. Дел од делниците нема да се изградат на ниво на автопат, како што претходно беше предвидено, туку само ќе се реконструираат и надградат со нов асфалт. Делницата до Косово, односно од Скопје до граничниот премин Блаце, која е најфреквентна, Владата планира да ја гради во соработка со косовската власт, но сè уште нема договор.

„Делницата Гостивар–Кичево има поголем број возила споредбено со другите и за овој патен правец ќе спроведеме концесија, но прво ова треба да го потврди и консултантот. Потоа ќе треба да се направи уште една студија, која би била релевантна за идните концесионери, бидејќи тие за ваквите големи проекти најчесто бараат средства од меѓународните финансиски институции“, објаснува Јанакиески и потенцира дека во меѓувреме Владата контактирала и со други финансиски институции.

Делницата Миладиновци–Штип, бидејќи нема доволен број возила, ќе се гради со класично задолжување, а Крива Паланка-Романовце, Кочани-Штип, Миладиновци-Скопје, Требеништа-Охрид и Подмоље-Струга ќе одат на реконструкција. Каде што има црни точки и поголеми кривини, патиштата ќе се прошират, а во останатиот дел само ќе се обнови асфалтот.

„За делницата Скопје-Блаце очекувам состанок со мојот колега од Косово за да утврдиме јасна рамка и динамика за заедничка реализација на проектот, било да е тоа преку концесии или преку заем. Многу е важно тоа што и од страна на Македонија и од Косово има ист тип пат – магистрален, а доколку се оди со изградба на автопат, тогаш треба паралелно да се градат двете делници“, вели Јанакиески.

Но, изградбата на оваа делница би стартувала дури во 2014 година со некакви првични постапки.