Скопско Кале

Византиски и венецијански монети од 13 век пронајдени на Кале

Грне со 46 златни византиски монети и 77 сребрени венецијански монети кои датираат од 13 от век, пред неколку дена биле откриени при археолошките ископувања на тврдината Кале.

А денеска бил откриен и вреден женски византиски накит својствен за највисоката византиска аристократија.

„Се кога ќе собереме, ова е еден од полуксузните наоди, затоа што е во таков контекст, во такви услови најден што му дава многу голема историска и културна вредност. Инаку се работи за едно мало неугледно грнче во кое што беа откриени 46 златни византиски монети од владетелот, дотогаш на Скопје, Јован III Дука и уште 77 венецијански сребрени монети од различни владетели, венецијански дуждови, кои заедно ни го определуваат историскиот момент на рушење буквално на византискиот град“, изјави Драги Митревски.

Кале кое интензивно се истражува веќе трета година по ред денеска го посети и министерката за култура Елизабета Канческа-Милевска.

Завршен е и проектот за целосно осветлување на тврдината. Избрана е фирмата и по добивањето на енергетската согласност, кон крајот на мај ќе почне целосна илуминација и на југозападниот бедем и на киклопскиот бедем на кој се работи во овој период.

Тимот археолози ќе ја истражуваат тврдината Кале до крајот на јуни, а потоа од есен ќе им остане просторот на терасата на ресторанот Кале во кој се влегува од главната јужна порта. Со тоа ќе заврши тригодишното археолошко истражување на Калето.