Трговскиот дефицит во периодот јануари-април 2011 година изнесувал 940 милиони долари. Според претходните податоци на Државниот завод за статистика, вкупната вредност на извозот на стоки од Македонија во периодот јануари-април 2011 година изнесувала 1,3 милијарда долари, а на увозот 2,2 милијарди долари. Покриеноста на увозот со извоз е 58,7 отсто.

Трговската размена по производи покажува дека во извозот најголемо е учеството на катализаторите на носачи со благородни метали или нивни соединенија, фероникелот, производите од железо и челик (валани производи), облеката и преработките од нафта. Во увозот најмногу се застапени платината и легурите на платина, необработени или во прав, суровата нафта, моторните возила за превоз на лица и електричната енергија. Во периодот јануари-април 2011 година најголемо учество во извозот на стоки имаат земјите-членки на ЕУ 27 (63,2 отсто) и земјите од Западен Балкан (25,5 отсто), а во увозот на стоки најголемо учество имаат земјите-членки на ЕУ 27 (53,3 отсто) и земјите во развој (29,3 отсто). Според вкупниот обем на надворешнотрговската размена, Република Македонија најмногу тргува со Германија, Русија, Велика Британија, Србија и со Бугарија (48,2 отсто од вкупната надворешнотрговска размена се врши со овие пет земји).

Се намалил бројот на одобренија за градба

Во април 2011 година биле издадени 220 одобренија за градба, што е за 5,6 отсто помалку во однос на истиот месец од претходната година. Државниот завод за статистика соопшти дека според издадените одобренија за градење, предвидената вредност на објектите изнесува 1,4 милијарда денари, што е за 33,3 отсто помалку во однос на истиот месец од претходната година.

Од вкупниот број издадени одобренија за градење, 165 (75 отсто) се наменети за објекти од високоградба, 20 (9,1 отсто) за објекти од нискоградба и 35 (15,9 отсто) за објекти за реконструкција.

Обезбедени 400 транспортни дозволи за Украина

Дополнителна квота од 400 транспортни дозволи за македонските превозници што се занимаваат со транспорт во Украина обезбеди Владата за 2011 година. Во Министерството за транспорт и врски соопштија дека е обезбеден дополнителен контингент со 50 универзални транспортни дозволи и дозволи за превоз во и од трети земји, 300 универзални транспортни дозволи за возила со еуро 3 и првпат надвор од редовната квота се обезбедени 50 универзални транспортни дозволи за возила со еуро 5.

Во рамки на работата на мешовитата работа комисија во која членуваат претставници на ресорните министерства од Република Македонија и од Украина е договорена квотата на дозволи за превоз за 2012 година.
Македонските превозници во текот на следната година ќе можат да искористат 200 универзални транспортни дозволи и дозволи за превоз во и од трети земји, 700 универзални транспортни дозволи за возила со еуро 2, 800 универзални транспортни дозволи за возила со еуро 3 и 100 универзални транспортни дозволи за возила со еуро 5.

Трговскиот дефицит во првите пет месеци од годинава изнесувал над 1,1 милијарда долари