Такси превоз

Во градовите каде што институциите се грижат за функционирањето на такси- дејноста, ваквиот вид такси-превоз не поминува

По повод објавите на некои медиуми дека такси-превозниците во Скопје добиваат конкуренција со влегување на компанијата „Болт“, која им нуди дополнителна заработувачка на граѓаните, се огласи претседателот на Групацијата на автотакси- превоз, Сашо Рајчановски.

Тој смета дека целта на влегувањето на овие компании е прибирање податоци од граѓаните со кои тргуваат и ги нудат како програми полни со податоци.

– Во даден момент, дозволува следење на сите граѓани и потенцијални такси-возачи штоја прифатиле апликацијата, избегнување на оданочување, невработување такси- возачи и растурање на целиот систем на автотакси-превоз. Секогаш зад нив стои висок функционер, кој има добра провизија и кој мора да издејствува промени во Законот за да можат непречено да функционираат – нагласува Рајчановски.

Тој додава дека во поголеми градови каде што градот се грижи за добро функционирање на такси-дејноста, а државата ги штити граѓаните, ваквиот вид такси-превоз не поминува.

– Нивните обиди да профункционираат се попречени од институциите, па дури гледавме во Париз и во други градови како лиценцираните регуларни таксисти им ги превртуваа и им ги палеа автомобилите – вели Рајчановски, нагласувајќи дека и во минатото имало обиди за влегување на вакви компании, но, како што вели, постојните закони и одлуките на Градот не го дозволуваат тоа.

– Очекувавме вакво нешто, бидејќи не е случајно што во предлог-законот за превоз во патниот сообраќај се предвидува, освен со таксиметар, да може да се наплатува и преку електронска апликација, која може да се симне на мобилен телефон. Се предвидува драстично намалување на казните. За ова и за многу други работи, дадовме сериозни забелешки, дадовме наши мислења и предлози – дециден е Рајчановски.

Инаку, како што пишуваа медиумите, реклами на компанијата за мобилност „Болт“ периодов ги имале како целна група граѓаните на Скопје, нудејќи им да возат и да заработуваат. Огласите, пак, на социјалните мрежи го отворија прашањето дали естонската компанија, конкурент на „Убер“, влегува на македонскиот пазар. Преку ваквите огласи, кои првпат се објавени на 25 септември, компанијата „Болт“ практично бара возачи што би ги регрутирала за транспортните услуги што евентуално би ги понудила во Скопје. Таму, меѓу градовите каде што корисниците може да се пријават за да возат, веќе е наведен и главниот град Скопје.

Скопје во моментов е и единствениот град од целиот регион на Западен Балкан каде што може да се регистрирате како возач, односно „Болт“ засега не оперира, ниту, пак, има најава за такво нешто во друга западнобалканска држава.

Компанијата не оперира ниту во Бугарија, а од земјите во регионот, своите услуги ги нуди само во Грција, Хрватска и во Словенија.

Станува збор за естонска компанија за мобилност, која нуди различни услуги за транспорт и испорака, меѓу кои и возење во такси или приватни автомобили, изнајмување автомобили, електрични скутери и велосипеди, па дури и достава на храна и на продукти.

Најпозната е по тоа што корисниците може да се пријават како возачи со свој сопствен автомобил, со што би станале достапни за изнајмување.

„Болт“ во моментов функционира во повеќе од 500 града во 45 земји во Европа, Африка, Западна Азија и во Латинска Америка.

https://www.vecer.press/во-градовите-каде-што-институциите-се/

ПРЕД КОЛАПС Е ТАКСИ ПРЕВОЗОТ ВО СКОПЈЕ, ПОРАДИ АРСОВСКА ВРИЕ ОД ДИВИ ТАКСИСТИ, A КОМПАНИИТЕ СЕ ПРЕД ЗАТВОРАЊЕ, ВЕЛАТ ОД АСОЦИЈАЦИЈАТА НА ТАКСИ ПРЕВОЗНИЦИ

Пред колапс е такси превозот во Скопје. Сè помалку има легални такси возила, а на секој чекор има диви таксисти без лиценци, кои наплаќаат двојно повеќе и возат со небезбедни коли.

За да се викне такси возило преку регистрираните компании се врти и по еден час. Проблемот е голем особено навечер, кога нема шанси да се најде кола, па граѓаните ги користат услугите на дивите таксисти кои си наплатуваат како ќе им текне.

Од Асоцијацијата на авто-такси превозници велат дека главен виновник за ситуацијата е Град Скопје и градоначалничката Данела Арсовска бидејќи нема никаква контрола, ниту стратегија.

„Градот Скопје е најголем виновник за колапсот на такси превозот. Никој не контролира и нормално дека сè повеќе колеги ги напуштаат компаниите каде имаат давачки и си возат на диво. Дури 80 отсто од таксистите се диви. За една година нема да остане ниту една такси-компании, ќе нема граѓаните кај да бараат такси, ќе има само диви таксисти. Не е нормално за три години мандат градоначалничката Данела Арсовска да нема ниту една средба со нас. Па со претходните градоначалници сме имале средби во Градот еднаш месечно“, вели Абдула Рушити, претседател на Асоцијацијата на авто-такси превозници.

Пред две години со одлука на Советот на Град Скопје поскапе такси превозот во Скопје. Тогашната одлука предвидува цената да се формира во зависност од тоа колку е горивото. Сегашната цена по која возат таксистите 40 денари старт и 25 денари за секој изминат километар е прва тарифа и важи кога цената на горивото е до 75 денари за литар. Втората тарифа би се применувала кога цената на горивото е од 75,50 денари до 119,50 денари и тогаш стартот би бил 50 денари, а секој изминат километар 30 денари. Третата најскапа тарифа предвидува старт од 60 денари, а за секој километар да се наплатува 35 денари кога цената на горивото ќе биде над 120 денари.

https://sdk.mk/index.php/dopisna-mrezha/pred-kolaps-e-taksi-prevozot-vo-skopje-poradi-arsovska-vrie-od-divi-taksisti-a-kompaniite-se-pred-zatvorane-velat-od-asotsijatsijata-na-taksi-prevoznitsi/