Патувањето од Скопје до Лондон и назад со нискотарифната компанија „Виз ер“ ќе ги чини македонските граѓани најмалку 170 евра доколку немаат британска виза. Во моментов, повратен билет за британската метропола на 20 јуни, кога линијата официјално ќе стартува, чини 85 евра со платени аеродромски такси. Исто толку чини и виза за Велика Британија, која е задолжителна за сите македонски државјани.

Влезот на нискобуџетните авиокомпании во земјава донекаде ги спушти цените на авионскиот превоз, но засега само за една дестинација. Очекувањата се дека билетите дополнително ќе поевтинат откако и компанијата „Флај Ники“ од септември ќе оперира со лет од Скопје до Виена. Првичните најави на менаџментот на компанијата се дека повратен билет за австриската метропола нема да биде поскап од 100 евра, за разлика од сега, кога ретко може да се најде карта под 150 евра.



Тешко до виза

Иако првичната цена што ја нуди „Виз ер“ е навистина ниска, познавачите сметаат дека ќе нема преголем интерес за патувања само до Лондон, со оглед на тоа што визата за Велика Британија е скапа, но и прилично тешко се добива. Но, оваа можност ќе биде многу поволна за тие што ќе го користат Лондон само како попатна станица до некоја друга дестинација.

Билетите за летот до Лондон може да се купат само преку интернет, преку веб-страницата на „Виз ер“. Генерално, цената зависи од периодот кога тие се резервираат и од времетраењето на патувањето, доколку се работи за повратен билет.

- Цената се одредува според побарувачката. Но нашите билети најчесто чинат околу една третина од цената на авиобилетите на стандардните авиокомпании. Колку порано се резервира билет, толку ќе биде поевтин - велат од „Виз ер“.



Нема бесплатен оброк

Нешто поскапи се билетите за седумдневен престој и повеќе, кои за крајот на јуни може да се набават за 95 евра во двата правца. Во јули, пак, чинат околу 180 евра.

На промоцијата на нискотарифната компанија во Скопје, менаџментот на „Виз ер“ најави дека билетите за Лондон ќе чинат од 35 евра нагоре, во еден правец. Во оваа цена се вклучени аеродромските такси и еден рачен багаж со стандардна големина. Дополнително се плаќа за поголем багаж, кој подлежи на чекирање, како и за оброк за време на летот.

Директната линија со британската метропола ќе се одвива четири пати неделно, секој понеделник, среда, петок и недела. Авионите од Скопје ќе слетуваат на релативно непознатиот аеродром „Лутон“, кој е оддалечен од централен Лондон околу 50 километри.



Од „Лутон“ до Лондон за 16 евра

Се обидовме да откриеме колку патниците ќе ги чини превозот од аеродромот до центарот на метрополата. Според информациите на интернет, патниците на располагање имаат воз, автобус или автомобил со возач. Најевтина варијанта е однапред да се купи автобуски билет преку интернет, кој чини нешто повеќе од две евра. Инаку, редовната автобуска линија од аеродромот до центарот на Лондон чини 17 евра, а дестинацијата се поминува за околу 80 минути. Билетот за воз во еден правец чини 16 евра и се патува 25 минути, додека за превозот со автомобил до центарот се плаќа 91 евро.

Раководството на турски ТАВ, која стопанисува со македонските аеродроми, преговараше и со нискобуџетна компанија „Рајан ер“, но засега нема ништо конкретно.