Авиокомпании и линии

Охрид, 30 април 2011 (МИА) – Како резултат на големиот интерес на туристите од земјите на Бенелукс за туристичко патување во Македонија, холандскиот тур-оператор „Корендон Интернешнал“, во чиј аранжман холандски туристи организирано преку закуп оваа година ќе летуваат во Охрид и Струга, во шпицот на престојната сезона воведува трет чартер-чет од Амстердам за Охрид.

Третиот-чартер лет ќе се реализира секој петок во периодот од почетокот на јули до крајот на август, со што бројот на гости што годинава ќе дојдат во Македонија се зголемува од претходно планираните 8.500 на 10.480 или над 500 гости неделно.

Изминатите три дена во Охрид и Струга престојуваше тим на холандскиот тур-оператор „Корендон“, при што беше спроведена проверка околу кондицијата на сместувачките и услужните капацитети во врска со најавеното доаѓање на холандските туристи на Охридско-струшката ривиера.

Како што истакна Асим Меѓедовиќ,  менаџер на „Фибула ер Травел“ македонскиот партнер на „Корендон Интернешнал“ во Македонија, претставниците на холандскиот тур-оператор заминале со позитивни впечатоци од активностите што во организациски аспект се спроведени во Македонија за прифаќање и престој на туристите од Холандија.

- „Фибула Ер Травел“ како партнер-агенција на „Корендон“ ги заврши сите подготовки предвидени согласно договорот околу опслужувањето на гостите што ќе доаѓаат во Македонија. До вчера тука беа претставниците на „Корендон“ при што ги посетија сите сместувачки капацитети каде ќе бидат разместени гостите, за да се уверат дека се ќе биде во најдобар ред при нивниот престој тука. Оценките се максимално позитивни, оттаму што она што го видоа на терен е висока подготвеност за опслужување на туристите од Холандија, изјави Меѓедовиќ.

Само за промоција на Македонија како туристичка дестинација, „Корендон“ досега инвестирал околу 500 илјади евра. Според последните информации, холандскиот тур-оператор до вчера има продадено над шест илјади или 80 отсто од закупените аранжмани за Охрид и Струга, така што најавите од „Корендон“ дека сигурно ќе го продолжат договорот за закуп на аранжмани за 2012 година, се проширува со можност за нивно долгорочно присуство во Македонија.

Директорот на Асоцијацијата на хотелиери на Македонија (ХОТАМ) Дончо Танески, рече дека долгорочното присуство на туристите од Бенелукс во Охрид и Струга кои веќе доаѓаат, сега веќе зависи од нас самите, дали ќе успееме да се наметнеме како добри домаќини.

- Претставниците на „Корендон“ отворено ни посочија дека отсега натаму се е во наши раце. Мораме да бидеме свесни дека во време на голема активност преку интернет, не може ништо да се скрие. Секој коментар, секоја и најситна забелешка преку социјалните мрежи се достапни за сите веќе истиот ден. Тоа значи дека не само партнерите вклучени во проектот, туку и институциите на системот, од инспекциските служби до комуналните служби, а најмногу месното население значи сите ние, мора максимално да се ангажираме во пружање што подобра услуга на гостите и нивна заштита, посочи Танески.

Тој уште додаде дека покрај Охрид и Струга, како аранжмани „Корендон“ и „Фибула ер Травел“ пробно вршат понуда за пакет-аранжмани со кружни тури низ Македонија, со повеќедневен престој и посета на сите позначајни културни и природни атракции во земјата. Повеќе од 70 холандски туристи пројавиле интерес за такви аранжмани, во чии рамки покрај Охрид, во рамки на престојот во Македонија би ги посетиле уште и Кавадарци, Неготино, Струмица, Штип, Скопје, Вевчани. Танески повтори дека тука како главен предуслов за реализација на таквите планови е какви ќе бидат коментарите на првите гости што ќе дојдат во Македонија.

Првиот авион со 189 гости од Холандија во Охрид доаѓа на 6 мај. „Фибула ер Травел“, заедно со локалната самоуправа на Охрид и Амбасадата на Кралството Холандија и за нив подготвува посебна програма. аб/лв/12:07