Веро Центар

Ексклузивно интервју со Никос Веропулос, сопственик на трговскиот ланец Веро на Балканот

Грција е мајстор за бирократија

Во вашата земја, иако има бирократски препреки заради транзицијата, вашиот политички систем се обидува да најде решенија. Затоа и ги проширивме нашите дејности во земјата. Во оваа земја, работната сила е многу лојална, вредна, има луѓе кои вистински сакаат да соработуваат и да имаат прогрес

Веро е трет по големина трговски ланец во Грција, а првиот излез на странскиот пазар го прави со отворањето на Веро супермаркетот во Скопје во далечната 1998 година. Оттогаш до денес се прошири и на српскиот пазар, и севкупно има 11 трговски центри надвор од грчката граница. Со сопственикот на компанијата Никос Веропулос, која е основана во 1973 година од татко му и чичко му разговарав ден по отворањето на новиот Веро Центар во Скопје.
Ова е негово прво медиумско претставување, за кое се покажа вистински флексибилен но и отворен за разговор.

Во Грција е познат како трговец со лице, односно има став за општествено важните прашања и несуетен однос кон кого било.

Освен за иновациите кои ги применуваат во новиот Веро Центар, разговаравме и за грчката криза, за бирократските проблеми во земјите каде работи, како и за работните навики на Македонците, Грците и Србите. Според Никос Веропулос, ние сме лидери и во реформите, и во ефикасноста и лојалноста во работата, а националноста на бизнисот - има важна улога. 


Зошто сте сконцентрирани со бизнисот во Македонија и Србија? Зошто не во Бугарија, Романија или Албанија или Хрватска?
- Два фактора се главни: едниот е дека во Бугарија и Романија веќе имаше конкуренција од мултинационални компании кои влегоа на тие пазари пред нас. Втората причина е што откривме дека граѓаните овде ќе ги ценат нашите продавници.

Кој е вашиот пазарен удел во Македонија и Србија?
- Не знам, бидејќи нема конкретна база на податоци на која би се потпрел. Не сакам да претпоставувам бидејќи можам да згрешам. Важно за нас е дека сме навистина среќни со продавниците и со обртот кој тие го прават, како и со бројот на луѓето кои ги посетуваат нашите продавници.

Рековте дека во 1997 година решивте да влезете на македонскиот пазар, што е всушност Ваша прва инвестиција во странство. Како напредува оваа инвестиција и сметате дека се исплатеше?
- Се исплатеше 120%. Верувам во тоа и ова е резултатот.

Веропулос продавниците на Балканот станаа трговски центри
кои вклучуваат и услуги како што се "продавници во продавница". Има ли бенефиција од недвижностите?
- Секако дека има и тоа голем бенефит од недвижности. Но, сметаме дека сме поинакви од останатата конкуренција. Има големи мултинационални трговци на кои приоритет им е вредноста од недвижностите. Наш приоритет е прифаќањето и успехот на супермаркетот. Вредноста на недвижноста е втора по приоритет. Затоа во овој трговски центар не се искористени сите квадрати на вториот кат. Ако на прво место ни беше вредноста од недвижноста, ќе го направевме вториот кат цел со продавници кои ќе ги изнајмувавме колку што можеме повеќе. Во недвижности, тоа е голема вредност. Решивме да не го направиме тоа. Решивме да направиме комплекс кој ќе биде удобен за потрошувачите.

Што е со бирократијата? Дали е ограничувачки фактор во вашите
инвестициски планови?
- Во која земја? 

Во Македонија и во Србија, бидејќи земјите во регионот се
слични во бирократијата.
- Мајстор за бирократија е Грција.

Го знаеме тоа, целиот свет сега го знае тоа...
- И знаеме да живееме во такви услови уште од времето кога моите
родители почнале да работат во Грција. Затоа учиме, ако може да се научи од овие проблеми. Но тоа не е комплимент. Во вашата земја, иако има бирократски препреки заради транзицијата, вашиот политички систем се обидува да најде решенија. Затоа и ги проширивме нашите дејности во земјата. Почувствувавме дека има позитивен став кон решавање на проблемите. Во другите земји...тоа е навистина голема дискусија.
Грција има свој вид на бирократија, Србија си има сопствена бирократија. Не сакам многу да навлегувам во детали, бидејќи може да звучи дека критикувам други системи.
Но за Србија, тоа е друга приказна. Србија помина низ тежок период во скоро време. И процедура е за институциите да бидат подготвени да прифатат новини во работењето. Иако теоретски Србија е постара држава, има уште постара инфраструктура и во институционална смисла. Тие не се трудат да најдат решенија како што вие се обидувате да најдете решенија. 

Колкав е бирократскиот трошок во целата инвестиција?
- Бирократскиот трошок е времето. И не можете да го пресметате
трошокот на времето. Може да е безначаен, но може и да е
катастрофален понекогаш. Времето е многу важно. Инвестиција може да биде целосно уништена бидејќи времето за реализација е продолжено повеќе од неопходното. Но нема дефиниција која е временската рамка за секоја инвестиција.

Му помага ли грчката Влада на трговскиот сектор или само на производството?
- Би рекол дека сум многу разочаран од начинот на кој грчката Влада го третира трговскиот сектор, особено супермаркетите. И лично тоа сум им го кажал. Знаат. Да, повеќе се залагаат за производството и промовираат мерки за него, тоа е традиција, според која, во текот на годините се создаде впечаток дека производството е скапоценост, а трговијата е тенок воздух. Тоа можеби било случај пред 60 години. Во денешно време, трговијата прави големи инвестиции. И доколку споредиме со некои производители, ние имаме трикратно или четири пати поголеми инвестиции отколку што тие би ги направиле за да произведуваат одреден производ. Од друга страна, за секоја земја важи дека ако имате ефективно производство на храна или други производи, секако дека е предност. Но исто така мора да имате и национална трговска мрежа. Мултинационалната трговија е добро да ја има за конкуренција, но многу е важно да се има национална трговска мрежа. И на вашите министри им реков дека треба да имате национална мрежа.

Како би го опишале персоналот кој работи во Веропулос маркетите?
- Во оваа земја, работната сила е многу лојална, вредна, има луѓе
кои вистински сакаат да соработуваат и да имаат прогрес.
Не го кажувам тоа бидејќи е комплимент, туку затоа што верувам во тоа. Во Грција секој си е "приказна за себе", си има свој индивидуален карактер, а во Србија....па да речеме дека воведовме корпоративна политика чија имплементација треба да доведе до лојалност и одговорност кај вработените. Продажниот директор од тука го префрливме во Белград за да го води и доведе во ред бизнисот. 

Дали националноста на бизнисот има улога?
- Верувам дека има улога.

Ова е предност или проблем?
- За нашата компанија претставува предност. Во трите земји во кои
работиме, културата е слична. Не е иста, но е слична. Овдешната
култура е уште послична со нашата. Немам специфична дефиниција, но сметам дека националноста на бизнисот е важна.

Отворањето на Веро надвор од националните граници е голема
предност за грчките производители да ги промовираат своите
производи на полиците надвор од Грција. Ја ценат оваа можност или
не? И дали увезувате во Грција производи од Македонија и Србија?
- Мислам дека грчките производители не ја сфатија целосно можноста која ја имаат со Веро продавниците. Не ја искористија. Можеа да постигнат повеќе. Но ние не би сакале да ги чекаме засекогаш. Им кажавме, ги поканивме, им ги покажавме нашите продавници, го знаат нашиот обрт... Некои од нив ја сфатија можноста, но повеќето не.
За вториот дел од прашањето, се обидуваме да увеземе
производи во Грција, има одредени компликации заради фактот што
Грција е дел од ЕУ (има компликации на граница). Увезуваме некои производи од Србија и сега работиме на увозот на извесен број производи од оваа земја.
Но, она што го направивме е: користиме добавувачи од овде да извезуваме во нашите продавници во Србија. Голем дел од Веро производите се произведени тука и се продаваат во Белград.

Што е подобро, да се почне целосно нова инвестиција или да се преземе постоечки трговски ланец во странство?
- Ние го одбравме потешкиот начин. Почнавме целосно нови
инвестиции. Ова е потежок начин бидејќи чини повеќе пари и обртот
расте постепено, но е подобар начин бидејќи ги инсталираш
продавниците како што сакаш, на начин на кој сакаш, ги обучуваш
луѓето од нула и не наследуваш проблеми на компанијата која може
ќе ја преземеш. 

Како би ја опишале моменталната политичка и економска ситуација во целиот регион? Кои се вашите предвидувања за иднината, бидејќи
да речеме, дека излегуваме од кризата?
- Тоа прашање е тешко за одговарање. Секоја земја минува низ различна фаза од кризата.
Верувам дека Грција не излегува, туку влегува во уште поголема криза.
Економската состојба во земјата не е соодветна.
Тоа е скапа држава за управување.
Во Грција, во многу бизниси и во многу институции не се прават пресметки, не се калкулира. Институциите мора да водат сметка. Германците не се глупави што водат сметка во последниве 30 години и сега се таму каде што се. Мора да научиме да бидеме повеќе Германци.

Чек, чек, малку..... Веро е четврти во Грција.... и го држи Шпар (Spar)..... еве нешто од википедија....

http://en.wikipedia.org/wiki/Veropoulos

http://en.wikipedia.org/wiki/Greek_Supermarkets