Плоштад - Тетово

Модерен изглед на тетовскиот плоштад

ТЕТОВО - Привршува реконструкцијата на плоштадот во Тетово. Веќе се наѕира новиот изглед кој е значително повпечатлив и попривлечен и, како што велат познавачите, со многу повеќе европски белези и карактеристики. Градежните работи треба да завршат пред новогодишните празници.

За реконструкцијата Општина Тетово од буџетските средства издвои околу 300.000 евра. Но, тоа не е крајно решение за градскиот плоштад во Тетово. Според проектот, на овој простор се планирани поинакви сообраќајни решенија. (Г.Е.)

Нема волја за враќање на хероите

Реновирањето на плоштадот во Тетово заврши, но обележјата на хероите не се вратија на своите места

Гојко Ефтоски



ТЕТОВО - Реновирањето на плоштадот во Тетово заврши, а бистите на народните херои Тодор Циповски-Мерџан и Ѓоце Стојчевски-Амбарче веќе три години не се враќаат на локациите. Обележјата и натаму фаќаат прашина во несоодветни простории, а како што стојат работите, уште долго ќе бидат далеку од очите на нивните сограѓани.

Борците и усно и писмено побараа од локалната самоуправа да ги постави бистите на заслужните места. Од одговорните во општината добија ветување дека прашањето ќе се симне од дневен ред. Но, од тоа нема ништо. Пропадна и обидот на советниците-Македонци да ја поттикнат работата. Се чини дека раководството на Општина Тетово, наоѓајќи разно-разни изговори, нема волја да ги врати бистите на хероите.

„Локалната самоуправа не одговори на нашето писмено барање“, коментира Стојан Петрушевски од Сојузот на борците. Притоа потсети дека општинарите лани ветиле враќање на хероите на плоштадот за некој од празниците. Се очекуваше дека тоа ќе се случи по повод 2 Август, потоа за 8 Септември, па за 11 Октомври и на крајот за 19 Ноември - Денот на ослободувањето на Тетово. Обврската постојано се одложуваше, а прашањето не се реши.

Двете бисти стоеја на посебни постаменти во центарот на градот до 4 октомври 2008 година кога поради реновирање на плоштадот, беа однесени од изведувачот на работите. Во меѓувреме, борците предложија нова локација за бистите, кај Споменикот на Револуцијата пред Центарот за култура „Иљо Антевски-Смок“.

Во тетовската самоуправа потврдија дека писменото барање од боречката организација е стигнато, а дека по него ќе расправал Советот. И неколкумина членови на Советот го иницирале прашањето за бистите. Добиле одговор дека најнапред ќе се расправа на координација, а потоа и на советничка седница.

„Се договоривме да се изработи елаборат, а дури потоа уште еднаш да се договориме во присуство на градоначалникот. Дотогаш бистите нема да се поставуваат“, вели Ирфан Емини, претседател на Советот на Општина Тетово. Но, Зоран Митревски, член на Советот од редовите на НСДП, убеден е дека тоа не е главната причина. „Нема волја кај колегите-Албанци од двете партии - ДУИ и ДПА. Тие сега наметнуваат некаков елаборат, не за друго, туку да се најдат локации и за поставување споменични белези на Албанци. Никој не е против иницијативата, но тоа е, сепак, ново барање. Ние бараме да се вратат бистите на плоштадот, а за нови споменици и за кои личности дополнително нека се расправа и нека се прават елаборати“, коментира Митревски.

Слично мислење има и советникот Драган Давидовски од ВМРО-НП. „На координација не се постигна никаков договор. Има големи опструкции околу ова прашање. Колку што можам да сфатам, нема желба и не верувам дека бистите ќе бидат вратени“, убеден е Давидовски. Што се однесува до изработка на постаментите за бистите, тој вели дека ќе нема финансиски проблеми, бидејќи предложил советниците-Македонци да се откажат од едномесечниот паушал за таа намена.