Јарболи и знамиња

Грандиозни знамиња за подигање на националната свест

Знамињата се со димензии 8 на 4 метри, а едно чини околу 5.000 евра

Со грандиозни знамиња распоредени на стратешки локации во земјава, власта ќе ја подига националната свест кај граѓаните. Се поставуваат на јарбол висок 24,5 метри, кој тежи над еден тон.

Знамињата се со димензии 8 на 4 метри. Локациите за нивно поставување ги одредила Владата во соработка со службата за општи заеднички работи.

Досега се поставени 8, а до крајот на април ќе бидат поставени уште толку. Знамињата веќе се веат на врвот на Водно, Калето, Плоштадот, Собранието, клучката кај Континентал, како и битолскиот Широк сокак, ридот во Штип и Самоиловите тврдини во Охрид.

„За овие досегашните поставени имаме добиено и согласности, со претходно барање до градот Скопје, до Министерството за култура,односно Управата за заштита на културното наследство“, вели Васе Доневски, директор на СОЗР.

Знамињата се да обединуваат, а не да делат. Доколку под подигање на национална, Владата не подразбира само етничка свест, тогаш проектот е легитимен, вели колумнистот Трајановски.

„Овој потег на Владата, грандиозноста на знамињата, укажува на тоа дека за некого сепак големината е битна. За жал, ова знаме се повеќе почнува да се употребува како тотемски и племенски симбол, наместо како национален и граѓански симбол“, изјави Жарко Трајановски, колумнист.

Знамиња со гигантска големина поставуваат претежно земјите од латинското горворно подрачје. Од јужно американските, такви има најмногу во Мексико, а од европските пример е Шпанија.

„Нема земја којашто тоа не го направила, има во Турција, Грција, пошироко Мексико и насекаде таков тип на знамиња има, дури и повисоки знамиња“, вели Васе Доневски.

Во втората фаза од проектот кој го спроведува владината Служба за општи и заеднички работи, знамиња ќе бидат поставени и на двата аеродроми, граничните премини Богородица, Деве Баир и Табановце, на автопатот над Велес, заобиколницата кај Ѓорче Петров и кај Судската палата во Скопје. Секое знаме чини по околу 5 илјади евра.