Археолошки Музеј / Архив / Уставен Суд

Над 600.000 евра за бироа и за столови за уставните судии и за МНР

Мебелот ќе се изработува по нарачка, но од каков материјал, боја и во каков стил, се' уште не е одлучено

Повеќе од 600.000 евра ќе се потрошат за опремување на канцелариите во новите згради на уставните судии и на Министерството за надворешни работи. Мебелот по нарачка ќе го изработи скопската фирма „Дизајн фантазија“, која на јавниот повик на кој се јавиле десет производители на мебел, доставила најповолни услови. Колку и какви парчиња мебел ќе се изработат, во која боја, материјал и стил, се' уште се дефинира. Сигурно е, велат од владината Служба за општи и заеднички работи, дека ќе се нарача, генерално,канцелариски мебел.

„Најголем дел ќе бидат бироа и столови и сигурно по некоја седечка гарнитура за таканаречени чекалници. Колку парчиња мебел и од каков материјал и боја ќе бидат, се' уште одлучуваме, бидејќи треба да го вклопиме новиот мебел со постојниот што планираме да се користи“, вели Васе Доневски, директор на владината Служба.

Тој објаснува дека најголем дел од пазарениот мебел ќе се искористи за канцелариите и за другите простории во новата зграда на Уставен суд. Односно, за неа е планиран комплетно нов мебел. За опремување, пак, на МНР ќе се искористи дел од постојниот што го користи администрацијата.

Набавката на мебелот, потврдува Доневски, значи дека привршуваат проектите за новите згради на Уставен суд и на МНР. Всушност, пред Нова година истекуваат и роковите за изградба на двата објекта. Сепак, тие малку ќе бидат пробиени.

„Објектите ќе се предадат во употреба, најверојатно, непосредно по Нова година. Неблагодарно е да лицитираме со нови рокови, а утврдените малку ќе се пробијат од објективни причини“, дополнува Доневски.

И во двете згради деновиве се лепат плочки. Во МНР во тоалетите, додека во зградата на Уставен суд во холовите. И во двата објекта практично се извршуваат последните зафати пред конечното средување на ентериерот. Се работи и на фасадата на МНР каде што досега се поставени дваесетина од планираните 60 скулптури на светски политичари. (Дс.Т.)