Авиокомпании и линии

Ќе летаме директно до Дубаи и до Сингапур

За директно авионско поврзување со Скопје моментно се преговара и со Кина и со Индија

Сања Наумовска



Македонските аеродроми „Александар Велики“ во Скопје и „Св. Апостол Павле“ во Охрид се подготвуваат за авиоповрзување со повеќе дестинации од Азија, Австралија и од Источна Европа. Веројатно уште летово македонските граѓани ќе можат директно, а и по многу поволни цени да патуваат во Дубаи, Сингапур, во Индонезија, како и до Австралија и до Литванија. За директно авионско поврзување со Скопје моментно се преговара и со Кина и со Индија.

Агенцијата за цивилно воздухопловство веќе почна да склучува билатерални договори со државите, а првите апликации на авиокомпаниите заинтересирани да оперираат од нашите аеродроми се очекуваат до крајот на февруари. Во летната сезона, редовна врска скопскиот и охридскиот аеродром ќе добијат и со уште две дестинации во Европа. По 25 март, превозникот „Џет ер“ директно ќе не' поврзе со Брисел, а холандски „Туи“ со Амстердам.

„Билатералните спогодби што ги потпишуваме со овие држави се прв чекор врз чија основа авиокомпаниите ќе имаат можност да влезат на нашиот пазар и да организираат редовен авиопревоз. Сите што ќе поднесат апликација, дозволите ги добиваат во најкус рок, за редовните линии за седум дена, а за чартерите и до три дена. Очекуваме особено да се заинтересираат нискотарифните компании, кои на нашите граѓани ќе им понудат прифатливи цени на билетите“, вели директорот на Агенцијата за цивилно воздухопловство, Дејан Мојсовски.

Тој објаснува дека во услови на либерален пазар, компанијата во апликацијата може да го определи бројот на летовите, капацитетот на авионите со кои ќе пренесува патници, како и слободно да ја формира цената на билетот.

Со зголемувањето на бројот на директни дестинации, по реконструкцијата на двете воздушни пристаништа, минатата година за15 проценти се зголемил и бројот на патниците кои полетале или пристигнале на нашите аеродроми. На аеродромите оперираат повеќе од 30 авиокомпании, а бројот на дестинации е зголемен за 50 отсто.

Од аеродромот „Александар Велики“ во Скопје директно се стигнува до 13 дестинации низ Европа, а во летниот период кон уште толку со чартер-линиите. Минатата година нашите граѓани прв пат добија можност за многу прифатливи цени да отпатуваат до Лондон, Венеција и до Измир. До повеќето редовни дестинации летови има секојдневно, а македонските граѓани, според побарувачката на билети, најмногу патуваат до дестинации во Германија и во Швајцарија, потоа до Австрија и до Италија. Македонските патници од летово ќе останат покуси за една дестинација во Европа откако деновиве повлекување од македонскиот пазар и укинување на директната линија до Прага најави компанијата „Чех ерлајнс“. Превозникот и официјално ја известил АЦВ дека нема да аплицира за дозвола во летната сезона по 25 март, без да ги образложи причините за повлекувањето.

http://www.utrinski.com.mk/?ItemID=112972F910322142919C5A0F36D64214

Македонија и Катар договорија редовна авиолинија

Македонската Влада со предлог-закон сака да склучи спогодба за редовна авионска линија со Катар. Воведувањето на редовната линија е во насока на зајакнување на економската соработка, како и потребата од создавање и одржување поволни услови за инвестиции. Како што неодамна објави „Капитал“, најверојатно во март годинава може да се воспостави редовна линија Скопје-Доха преку катарската национална авиокомпанија Катар ервејс (Qatar Airways). Детали за можната нова директна линија до Доха сe уште нема.

Емирот од Катар, шеикот Хамад бин Калифа Ал Тани, кој Македонија ја посети во октомври минатата година, си замина со најава за интензивирање на соработката во авиосообраќајот. Тој најави и можна соработка со Македонија во градежништвото, земјоделството, туризмот и во енергетиката.

 http://www.time.mk/read/NONE/76ba20d04a/index.html