Владата на Србија не ги казнува виновниците, туку го прикрива доцнењето на изградбата на Коридорот 10, чијашто главна траса треба да поминува од Австрија низ Словенија, Хрватска, Србија и Македонија до Грција, со основање нова фирма, објавува белградски „Блиц“. Се уште нема смена на одговорните за недостатоците иако од 250 километри автопат се изградени само 47. Откриени се многу грешки, од лошата изработка на проектната документација, чиешто проектирање го бараа странски банки, до лошо објавените тендери, за кои многу фирми не добија согласност за изградба. Владата планира наскоро да донесе одлука за пренос на сите надлежности за изградбата на Коридорот 10. - Ако изградбата на Коридорот почне без комуникација и целосен увид што досега го ограничуваше ЈП „Патишта на Србија“, тој никогаш нема да биде завршен, иако најавуваат дека автопатот ќе биде готов до 2012 година - вели еден извор за „Блиц“. Меѓутоа, тоа не може да биде целосен одговор од надлежните. Уште помалку е прифатлива аболиција за тие што не сакаа или не ја знаеја својата работа да ја одработат како што треба, а паневропскиот коридор го сфатија како багателно располагање со партискиот плен. - Откако беа набавени парите, причина за целото доцнење со изградбата на Коридорот 10 е човечкиот фактор. На ниту еден пат не може да се спроведе изградба без соодветно изработена документација. Затоа треба да се сменат тие што не работеа добро и верувам дека ќе има кадровски промени ако е сериозна намерата на Владата да го забрза овој процес, а мислам дека е така. Кога фирмата не работи добро, не се гради нова зграда, туку се менуваат работниците - вели Милан Вујичиќ, професор на сообраќајниот факултет. Губењето на статусот трансевропски автопат во 1997 година, од кога официјално почна изградбата на коридорот, државата годишно ја чини милијарда евра. Толку пари ќе се слееаја во државната каса од приходите што ќе ги донесеше коридорот како дел од паневропската мрежа што ја поврзува Западна Европа со Блискиот Исток. Хрватска не штедеше средства и луѓе во рок од 10 години да ги изгради сите 1.100 километри автопат. Вистина е и дека поради важноста на српскиот проект во 2008 година Владата на Србија основа Национален совет за инфраструктура, чијшто претседател е претседателот на Србија Борис Тадиќ. Една година подоцна ова тело формираше фирма „Коридор 10“ за да може максимално да се забрза изградбата на сите нови делници, со најголема можна рационализација на трошоците. Ненад Иванишевиќ, член на УО на „Коридор 10“, вели дека нивната фирма нема одговорност бидејќи не доцнат во реализацијата на работите што им се доделени и во проектираните активности за 2010 година. Тој тврди дека тие се под постојан надзор од страна на светските кредитори. - Оваа недела доаѓа мисија на Светска банка, а потоа и други претставници на банки што се наши кредитори. Тие треба да одобрат кредити за новите делници и ќе кажат дали сме ја завршиле работата добро или не - вели Иванишевиќ. Коридорот 10 и решавањето на имотно-правните односи се директна надлежност на ЈП „Патишта на Србија“, кај кои се и средствата за проектирање и за имот. Фирмата „Коридор 10“ се занимава само со изградба на патната инфраструктура на Коридорот 10.