Пуцко Петрол(поранешен G Mall Skopje)

ГАЗИТ ГЛОУБ ЌЕ ГРАДИ МОДЕРЕН ТРГОВСКИ ЦЕНТАР

ИНВЕСТИТОРИТЕ ВО "АЛУМИНА" ЧЕКААТ ОДОБРЕНИЕ ЗА ГРАДБА ОД ОПШТИНА КАРПОШ

До крајот на годинава ќе почне изградбата на шопинг центарот на земјиштето на некогашна Алумина. Во телефонски разговор за Сител, директорот на Газит Глоуб за Југоисточна Европа, Ронен Ашкенази изјави дека проектот целосно е готов и компанијата чека одобрение за градба од Општина Карпош.

Ашкенази е уверен дека тоа е само процедура и дозволите ќе ги имаат до крајот на годинава, со што ќе почне да се гради трговскиот центар.

– Проектот ќе почне да се реализира оваа година, 2009-та. Имаме трговски центар кој е целосно дизајниран, чекаме само одобрение од општина Карпош. Доколку се биде во ред и ги добиеме дозволите навреме, изградбата ќе почне до крајот на годинава - изјави Ронен Ашкенази, директор на Газит Глоуб за Југоисточна Европа во телефонскиот разговор за Сител.

Од Општина Карпош не информираа дека има уште неколку процедури до реализацијата на ултрамодерната градба. Прво треба да се изработи деталниот урбанистички план, Газит Глоуб да поднесе барање за локациски услови и за проектот, кои кога ќе бидат одобрени компанијата ќе треба да плати комуналии и потоа ќе може да гради.

Модерната градба, со трговски центар, луксузен хотел и деловни згради ќе биде прва од ваков тип во Македонија. Израелската инвестиција за проектот изнесува 120 милиони евра.