Локацијата за овој проект е предвидена со новиот детален урбанистички план за „Мал ринг“, кој сé уште се изработува во проектантската куќа „Ин-пума“

Не се знае дали има студија колку е безбедно тркалото да се постави на мост

На пешачки мост, кој ќе почнува меѓу објектите на поштата и идниот офицерски дом и ќе води кон Музејот на македонската борба и новиот театар, ќе се постави панорамското тркало. Локацијата за тркалото е предвидена со новиот детален урбанистички план за „Мал ринг“, кој сé уште се изработува во проектантската куќа „Ин-пума“. Од општината Центар не потврдуваат ништо, само велат дека измените и дополнувањата на планот се во тек и дека сé уште не се знаела новата локација.

- Откако комисија ќе го разгледа планот, ќе имаме точен податок за новата локација на тркалото - изјави Јовица Ацковски, портпаролот на општината.

Ова е втора локација за изградба на панорамското тркало. Првата беше кејот, веднаш до зградата на МЕПСО, но планот се измени поради подземната сообраќајница, која треба да се гради на истата локација. Од градот направиле студија што покажала дека врз сообраќајницата не треба да има тешки објекти. Сé уште не се знае дали од градот, чиј проект е поставувањето на тркалото, направиле и студија за тоа колку ќе биде безбедно тркалото да се постави на мост. Дали е побезбедно тркалото да биде поставено врз подземната сообраќајница или, пак, на мост на река што, кога има пообилни врнежи од снег и дожд, може многу да надојде.

Горан Марковски, професор на Градежниот факултет, вели дека многу несоодветно решение е да се постави панорамско тркало на мост.

- Факт е дека сé може да се дизајнира, но постојат некои инженерски логики што треба да се запазат, а да не зборувам за регулацијата на Вардар и протокот на ветерот. Според мене, ова е многу несоодветно решение, непотребно силување и на конструкцијата и на просторот. Мостот ќе треба да биде премасовен, за да може на него да се постави и тркалото и да се овозможи тој да биде пешачки мост - објаснува професорот Марковски.

Во огласот пишува дека идејното решение се однесува на панорамското тркало со придружни елементи, но сé уште не е определено што друго се планира да се постави. Со тендерската документација од претходниот конкурс беше предвидено на тркалото да можат да се возат 144 посетители, по шестмина распоредени во кошници. Дополнително ќе треба да се утврди и на кого градот ќе му го даде тркалото на стопанисување, дали за возење, односно за разгледување на градот ќе се наплатуваат билети и колку би чинело да се види панорамата на Скопје.