Надземни и подземни пешачки премини

Ќе се копа подземјето за нови премини

Иако овој вид премини се покажаа како неекономични, од Градот Скопје се убедени дека новите пет подземни објекти за пешаци ќе функционираат

Иако подземните пешачки премини се покажаа како неекономични и се синоним за валканост и запуштеност, а скопјани немаат навика да ги користат, градоначалникот Коце Трајановски има намера да изгради уште пет вакви објекти во Скопје. Идејата е подземните премини да бидат изградени на „црните точки“ во градот, каде што изминативе години во сообраќајни несреќи биле прегазени пешаци. Градоначалникот Трајановски изградбата на овие премини ја најави и во предизборната програма, каде што е наведено дека изградбата ќе почне до крајот на оваа година.Подземни пешачки премини ќе се градат кај поранешен „Рубин кармин“ на улицата Димитрие Чуповски, на истата улица кај „Мекдоналдс“, на Бит-пазар и кај трговските центри „Бисер“ и Лептокарија“.  Прецизните локации за изградба допрва ќе се утврдуваат - изјави Неделчо Крстевски, портпарол во Градот.

Нема менталитет за подземни премини

Крстевски вели дека постапката за испитување и документирање на инфраструктурата е веќе почната. Набрзо треба да заврши постапката за идејно проектирање, по што ќе се знаат точните места на изградба на премините.  Тоа ќе зависи од поставеноста на подземните инсталации - вели Крстевски.

Во врска со оправданоста на проектот, бидејќи никој со години не ги користи постојните подземни премини, од Градот се убедени дека тоа нема да биде случај со новите. Градските власти сметаат дека новите премини ќе бидат користени, оти се работи за улици на кои со години сообраќајниот метеж е голем проблем за пешаците. Потенцираат дека за некој премин да биде користен потребно е просторот да се издава за комерцијални цели, односно во нив деноноќно да работат продавници.

Сепак, останува времето да ја покаже оправданоста на новите подземни премини бидејќи менталитетот на граѓаните во Скопје е да не ги користат, не само подземните туку и надземни премини. Пешаците се најнедисциплираните учесници во сообраќајот и улиците често ги поминуваат онаму каде што им одговара, а не онаму каде што е предвидено со обележани премини. Како најнови примери може да се посочат скапиот проект „Влајко“, кој пет години никако да заживее и надземниот премин од железна конструкција во Чаир, кај училиштето „Лирија“, кој исто така, ретко се користи.

Во врска со подземните премини, изминативе децении во градот се изградени четири. Сега само два се во употреба - кај хотел „Континентал“ во Автокоманда и кај трговскиот центар „Скопјанка“ во Аеродром. Но, граѓаните често ги избегнуваат, велејќи дека не се чувствуваат безбедно да минуваат таму, особено кога дуќаните ќе се затворат. Останатите два премина, на Јужен булевар и на булеварот Александар Македонски се затворени поради тоа што со години служеа само како дувла на зависници и на криминал.

Да се постават семафори со копчиња

Премините за пешаци изминативе години им се омилена тема на скопските градоначалници. Досега се покажа дека сите активности околу ова прашање се сведени на зборување, а не на реализација. Надземни премини на булеварот Партизански одреди и на други локации ветуваше поранешниот градоначалник Трифун Костовски. Тогаш се замеша и Општината Карпош, велејќи дека тоа било нивна идеја. Од Карпош дури тврдеа дека правеле анкета со која се покажало дека граѓаните сакаат ваков вид премини и најавуваа дека набрзо ќе почнат со изградба. Се остана само на зборови, односно стана јасно дека се работи за препукување на локално ниво, а не за решавање на проблемите на граѓаните. Надземен премин кај поранешен „Рубин кармин“, на улица Македонија ветуваше и поранешната градоначалничка на Центар, Виолета Аларова.

Сепак, скопјани не се многу воодушевени од овие идеи. Тие повеќе се за инсталирање копчиња на семафорите со кои ќе се вклучува зеленото пешачко светло. Многу време ми одзема качувањето и симнувањето по скали. Полесно ми е преку улица - вели еден граѓанин на прашањето дали би користел подземен пешачки премин доколку го има. Според кажувањата на стари скопјани, првиот надземен премин во градот бил изграден во педесетите години на минатиот век кај денешен „Рамстор“, поточно кај бутикот „Рива“. Бил од железна конструкција, но по некое време бил отстранет затоа што жителите не стекнале навика да го користат.

http://www.dnevnik.com.mk/?ItemID=965722FDDA5B094CAB36DB9EC1D6A283

Идната недела стартува изградбата на надземниот премин на Бит-пазар

Најпрвин ќе се копаат темелите од страна на грнчарската продавница, спроти Здравствениот дом