„Првомајска“ од рампа до Расадник ќе биде булевар

Новиот булевар ќе се гради со заем од Европската банка за обнова и развој

Сања Наумовска


„Првомајска“ од рампа до Расадник ќе има четири сообраќајни ленти со широчина од 3, 5 метри или вкупна сообраќајна површина со широчина од 14 метри. Покрај булеварското решение на сообраќајницата ќе има велосипедски и пешачки патеки. На овој начин, сметаат во Градот, ќе се реши еден сообраќаен проблем, особено во Кисела Вода, каде што поминуваат и по 40.000 возила дневно.

Проширувањето на улицата „Првомајска“ во Кисела Вода ќе стартува веднаш штом Градот Скопје и Европската банка за обнова и развој ќе го потпишат заемот од 190 милиони денари. Банката, благодарение на добриот кредитен рејтинг, му дава на Градот заем од 350 милиони денари, со кои, покрај проширување на „Првомајска“, ќе се направи и Центар за управување и контрола на сообраќајот.

Градежните работи ќе стартуваат кај рампата во Кисела Вода и ќе се движат во правец на раскрсницата со улицата „Народни херои“ кај Расадник. Според плановите на градските власти, „Првомајска“ во втората фаза од проектот ќе се проширува и кон Драчево, на потегот од Цементарницата „Усје“ до Маркова Река. В о рамките на проектот за проширување е предвидена и изградба на колектор од Транспортниот центар до „Првомајска“.

Во очекување на стартот на реализацијата на проектот се вршат обемни подготвителни активност за изместување на подземните инсталации, правењето на привремените сообраќајни решенија, експропријациите и други проектни задачи, информираат од Градот. Веќе се дадени налози за дислокација на трафиките од трасата на улицата. Проширувањето нема да зафаќа во дворот на Општина Кисела Вода ниту, пак, ќе има потреба од уривање на бараките. Трасата на новата улица не поминува ниту на локации каде што има трајни објекти.

„Оваа сообраќајница е од огромно значење, од причина што секојдневно ја користат илјадници жители на тој дел од градот. Исто така, на потегот кон Драчево последните години се разви индустриска зона, која има потреба од добра сообраќајна врска“, информираат од Градот, каде што велат дека заемот од Европска банка ќе се враќа во рок од 13 години со 3 години грејс-период.