Противпожарна заштита

Роза Петкова

Скопските пожарникари се мобилизираат за гаснење пожар со систем од 1972 година, кој едвај се слуша. Наместо да работи со современа опрема, противпожарната бригада на главниот град се уште користи радиостаници стари повеќе од 30 години. На лошата опременост во бригадата се пожали и нејзиниот прв човек, командирот Благоја Менковски, на состанокот за планирање на буџетот за 2011 година, одржан со скопскиот градоначалник Коце Трајановски и со градските советници во Охрид. Тој побара во наредниот буџет за пожарникарите да се издвојат вкупно 79 милиони денари или околу 1, 2 милиони евра, во кои се вклучени трошоците за тековните сметки, основните средства за работа и нови инвестиции за подобрување на состојбата на бригадата. Освен за нова телекомуникациска опрема, Менковски побара пари и за реновирање на старата зграда на бригадата. - Објектот е изграден во 1982 година и оттогаш не е реновиран. Влезните врати треба да се сменат, да се направи вентилација во внатрешноста на гаражите и да се асфалтираат влезовите во гаражите. Исто така, веќе две години не вршиме лекарски прегледи од стручни лица. Лани правевме таков преглед, а еднаш во годината мора да се направи - истакна Менковски. Во капиталните инвестиции кои се планираат за следната година тој најави и купување на опрема и машини, набавка на електрогенератори, а за своите вработени побара и спортски реквизити, со кои би се опремила вежбалница, во која тие ќе можат да одржуваат физичка подготвеност. - Бараме да се изгради и метална кула за вежбање за пожарникарите, за која имаме готов проект, а треба да се објави тендер. Таа чини 1,5 милиони денари - вели командирот. Во приоритетните средства за работа се планира и набавката на едно командно возило, како и специјално пожарникарско возило со поголема цистерна од 16 кубици вода. Според Менковски, бригадата во моментот има две цистерни, кои имаат капацитет од два кубика, па често се случува при гасење на пожар да им снема вода. За новата цистерна се потребни околу 300.000 евра. И наредната година во план е да се купат нови униформи и чизми за пожарникарите, како и друга опрема, во која влегуваат појаси за спасување и заштитни јажиња.