Мал Ринг

Споменици ќе се градат во Вардар кај Камен мост

Спомениците се идеја на Владата, Општина Центар даде виза за нив

Деспина Трајковска

Две фонтани – спомен-обележја поставени во водите на Вардар од двете страни на Камен мост се само дел од новините предвидени со измените на Детаљниот урбанистички план - Мал ринг, кој вчера беше усвоен од страна на Советот на Општина Центар. Освен футуристичката идеја за поставување споменици во реката Вардар, кои е планирано да работат на механизам на бунари и се иницијатива на Министерството за култура, ДУП предвидува и изградба на две деветкатници од левата страна на Вардар, наменети за државни институции.

Едната пред објектот на Комерцијална банка, во која ќе се смести Архивот на Македонија и Археолошкиот музеј, а другата наменета за Уставниот суд е планирана во близина на МНТ. Со усвојувањето на измените на ДУП, кои се дел од владината програма за изработка на приоритетни планови, се постави и урбанистичка рамка за црквата на плоштадот, а се потврдија и педесетината спомен-обележја и споменици кои ќе се градат на плоштадот и околу него, како и на левата страна на Вардар на „Карпошово востание“. Виза добија и четирите скулптури на лавови кои е планирано да се постават по два од двете страни на мостот „Гоце Делчев“.

Новата рамка на ДУП дозволува и изградба на два портала, во функција на спомен-обележја, а се предвидени на крајните делови од вториот дел на улицата „Македонија“. Планот предвидува и изградба на пешачки мост меѓу планираниот мост на цвеќето и Камен мост.

„За сите објекти вцртани во планот треба да се изготват архитектонско-урбанистички проекти кои понатаму ќе ги дадат насоките на идејните решенија. Истото ова се однесува и за планираните спомен-обележја, за кои ќе се распишуваат јавни конкурси за избор на идејните решенија“, истакна Лидија Андреевска, планер од ИНПУМА, која е автор на ДУП. Таа вчера не ги прифати обвинувањата на советниците од опозицијата, кои посочија дека планот е спорен оти Градот и стручната ревизија имале повеќе забелешки. „Измените на ДУП се во целост со законските норми. Забелешката од Градот дека било потребно да се распише меѓународен конкурс за избор на решение за измените на ДУП за нас е неприфатливо, бидејќи со овие корекции не вршиме менување на концептот на централното градско подрачје“, изјави Соња Шумкова, раководителка на Одделението за урбанизам во Општина Центар, која не даде дециден одговор дали планерот ги испочитувал забелешките во однос на сообраќајните решенија издадени во негативното мислење од градските власти.

Како и многупати досега кога Општина Центар носеше измени на одредени планови, а Градот имаше негативно мислење за нив, општинарите посочуваа оти тие не се обврзани мислењата да ги земаат здраво за готово. Имено, во законот стои дека Градот дава согласност, односно мислење по урбанистичките планови, но не е конкретно прецизирано дека тоа треба да се земе предвид. Во полчасовната полемика, во која главен збор ја имаа советниците-опозиционери и кои посочија дека и голем број граѓани на Центар изнеле негативен став за предложените измени, единствено за збор од власта се јави советникот Владимир Бахчовановски.

При гласањето на планот, кој помина со 12 гласа „за“, четири „против“, а тројца советници беа воздржани, од гласањето самоиницијативно се повлече претседателот на Советот Владимир Здравев, оти, како што рече, не сака пак да го обвинуваат за судир на интереси, што беше случај пред половина година. И тогаш Советот гласаше за измени на истиот план, кој со последните усвоени корекции дава урбанистичка можност за реализација на речиси десетина владини проекти.

Споменик на Јустинијан Први кај Камениот мост

Општина Центар ќе гради два споменика на своја територија, изгласа Советот на Општина Центар на вчерашната седница. Едниот споменик ќе биде посветен на царот Јустинијан Први, еден од најмоќните цареви на Источното Римско Царство, додека вториот споменик е наречен „Воин“. Во предлог-одлуката објаснето е дека споменикот на Јустинијан Први ќе се гради на примостието на Камениот мост, од десна страна гледано кон плоштад Карпош, додека споменикот „Воин“ ќе се постави пред зградата Ибни Пајко, која се наоѓа од десна страна на Камениот мост. Идејниот проект ќе го избира одбор од осум члена, додека реализацијата, управувањето и чувањето ќе се одвива со средства од буџетот на Општина Центар. Спомениците, се вели во предлог-одлуката, ќе се градат како симбол и траен спомен на вековните стремежи и борби за опстанок на луѓето и народите што живеат на територијата на Македонија.

Јорданка Ивановска