Вести

НОВИТЕ ГРАДБИ ВО ПАРК-ШУМАТА ПОКРИЕНИ СО ДОКУМЕНТАЦИЈА

Водно се уништува легално

Никој ниту не' консултира ниту не' прашува што е најсоодветно да се гради во градежниот реон до парк-шумата Водно, велат во „Паркови и зеленило“

Висококатница никна пред заштитената парк-шума Водно

Никој ниту го консултира ниту го прашува Јавното претпријатие „Паркови и зеленило“ што е најсоодветно да се гради во градежниот реон до парк-шумата Водно.Во „Паркови и зеленило“ велат дека општините ги носат детаљните урбанистички планови без законска обврска да побараат стручен став од нив, иако се единствено претпријатие задолжено за заштита на шумата. Според нив, локалните власти треба да ги консултираат дали е подобро во овој реон да се градат згради или индивидуални куќи за да се зачува зеленилото што го храни градот со чист воздух.

- Општина Центар го донесе планот за ниските падини на Водно, кај хотел „Панорама“ без наше мислење за оправданоста на изградбата на педесетина висококатници во овој појас. За жал, Општината никогаш не не' повикала на стручните расправи за детаљниот урбанистички план. Така што не сме имале можност на овие расправи да го кажеме своето мислење, ниту пак да имаме увид во детаљниот план - велат од јавното претпријатие.Во „Паркови и зеленило“ велат дека доколку забележат дека некој навлегол во шумата, единствени ингеренции им се да направат записник. Нашите шумочувари на терен ја набљудуваат ситуацијата и за секое градежно навлегување во парк-шумата ги преземаат мерките што се во нивна надлежност. За жал, надлежностите не се многу големи. Шумарите може да ја запрат градбата до доставување валидна документација, да направат записник што потоа го доставуваме до полиција и пријавуваме до комунална инспекција. Понатаму надлежните преземаат мерки во нивна надлежност - велат во „Паркови и зеленило“. Еколошкото друштво „Еко-мисија“ пред неколку месеци посочи на изградбата на овие згради и побара заштита на шумата од понатамошна урбанизација. Нивните барања беа Владата и Министерството за транспорт и врски да ја обележат границата на градежната зона на парк-шумата со цел да се спречат урбанизацијата на Водно и разните малверзации со земјиштето што влегува во шумскиот појас.

- Урбанизацијата на Водно се случува три децении наназад. Ниту тогаш ниту сега не се знае доколку некој ја пречекорил линијата. Мора да се спроведе целосна истрага за да се открие. Но, најчесто, се' е формално правно покриено. Пример се големите згради кај „Панорама“, за кои е забележително дека навлегуваат кон парк-шумата. Власта е незаинтересирана нешто да спречи, а директно учествува. Постои спрега меѓу администрацијата, политиката и бизнисот - вели Петар Бошевски од „Еко-мисија“.Во моментов, на ниските падини на Водно, кај хотелот „Панорама“, се случува градежна инвазија. Во и околу поранешното Олимписко село се градат околу триесетина згради високи до седум ката, а се расчистува теренот за градење на уште околу дваесетина. Таму, под зградите, се наоѓа и таблата на која пишува „Парк-шума Водно“, што ја означува границата каде таа почнува. Во „Паркови и зеленило“ креваат раменици велејќи дека ништо не може да направат. Реагираме до надлежните инспекциски служби. Но, често се случува по сите наши интервенции и реакции, градежниците да излезат со комплетна документација за градба. Тогаш не може ништо да направиме. Се' што се случува надвор од границите на парк-шумата не е во наша надлежност. Се' додека не се навлегува во зоната на парк-шумата немаме право и не може да реагираме - велат во „Паркови и зеленило“.

Првиот проект најверојатно ќе биде Аква Парк во Расадник, а со нови спа центри ќе можат наскоро да се пофалат и хотелот Дрим во Струга и Инекс Горица во Охрид

Во Македонија ме чека убава иднина - ова е коментарот на Бугаринот Бојко Дражев, кој својот бизнис со спа центри од следната недела ќе го прошири и во Македонија. Бугарската компанија Спа дизајн ќе регистрира фирма во Македонија и ќе отвори свои канцеларии и изложбен салон во Скопје. Намерата е во блиска иднина да се направат и магацини и да се отворат канцеларии и во Охрид. Канцеларијата во Скопје, според идеите на Дражев, ќе го покрива не само македонскиот, туку и српскиот, косовскиот и албанскиот пазар.

"Планот е да се вработат околу 100 луѓе. Бидејќи во Бугарија се соочуваме со недостиг на работна сила, отворена е опцијата работници од Македонија да работат и во Бугарија. За во Бугарија да најдам работник, треба да го украдам од друга фирма. За разлика од тоа, Македонија има квалитетни работници кои се невработени" - вели Дражев.
Тој првпат ја поминува македонско-бугарската граница. Вели, еден ден му бил доволен за да почувствува дека инвестира на право место во право време.

"Кога влегов во Македонија немав чувство дека сум во друга држава. Луѓето се исти, со иста насмевка, исто облечени, со исти дух. Мислам дека Македонците се вредни луѓе, условите за инвестирање во Македонија се многу поволни. Ми треба само малку време да ги проучам законите овде, но во секој случај мислам дека овој бизнис во Македонија добро ќе се развива" - оптимистички изјавува Дражев.

Неговата фирма гради спа центри и базени. Освен изградба, тие прават и проекти за изгледот на ваквите центри, организираат обука за кадарот кој ќе работи таму, даваат предлози како да се менаџира со објектите. Но, неретко се појавуваат и како инвеститори, а нивниот план е да инвестираат и во изградба на голем спа центар во Скопје.

"Нашата цел не е да изградиме што повеќе спа центри. Ние сакаме да направиме квалитетни центри и базени, кои ќе му користат на инвеститорот. А не само да направиме да земам пари и после постојано да ни плаќаат за сервисирање. Тоа не би било добра реклама за нас" - потенцира Дражев.

Тој е веќе во преговори за изградба на првите центри во Македонија. Првиот проект најверојатно ќе биде аква парк во Расадник, Општина Кисела Вода, каде според деталниот урбанистички план е предвиден ваков објект. Со нови спа центри ќе можат наскоро да се пофалат и хотелот Дрим во Струга и Инекс Горица во Охрид.

Според Општината, инвеститор на градилиштето на кое се случи инцидентот е фирмата „НЃ инженеринг“, која пак ги демантира тие наводи

Немаше повредени покрај свлечувањето на земјиштето, иако градилиштето не е прописно оградено

Дел од рид во Кисела Вода вчера падна од се' уште непознати причини. Немаше повредени работници или случајни минувачи, иако градилиштето, лоцирано на ниските падини на Водно не е прописно оградено. Веќе неколку месеци овој дел покрај улицата Огњан Прица се срамнува заради изградба на зграда. Инвеститор, како што тврдат од Општината Кисела Вода, е фирмата „НЃ инженеринг“, а градежната дозвола, велат, се води на Наташа Мицевска и Ѓорѓи Николов. Наспроти Општината, од посочената фирма негираат дека градат објект на улица Огњан Прица бб, во близина на средното училиште „Васил Антевски-Дрен“. Уште помалку дека вчера се случил инцидент на нивните градилишта.

На терен можеше да се види длабока дупка во висина и ширина од околу педесетина метри, како и паднати огромни столбови од бетонска арматура. На овој празен плац ќе се гради шесткатница, велат од Општината.

- Се' е во ред. Градителите имаат уредна техничка документација, изјави Драган Ристевски, раководител на Секторот за урбанизам во Општината Кисела Вода.Градежниот инспектор Ристо Челебиев изјави дека пред да се направи опсежна анализа и вештачење не може да се каже што навистина се случило на терен. Надзорниот орган или вештото лице допрва ќе утврдува дали станува збор за несовесна работа, виша сила или нешто друго. Инвеститорот има одобрение за градба - изјави Челебиев, инспектор од Кисела Вода.

На прашањето зошто локацијата не е прописно оградена, тој рече дека тоа не било можно поради фреквенцијата на машини и луѓе при ископ на брдото. Граѓаните што живеат во овој реон сметаат дека постои опасност од ерозија, односно свлечување на земјиштето, како и загрозување на безбедноста на останатите жители, но досега никој не реагирал на нивните апели.

Планот за овој реон е усвоен во 2003 година. Претходно, децении наназад, потврдија во Општина Кисела Вода, поради стрмноста на теренот, не се вцртувала маркичка за градење. Градските власти, пак, пред неколку месеци одговорија дека не знаат што им се случува на ниските падини на Водно. Не одговорија и дали имаат евиденција колку градби досега ја оштетиле парк-шумата. Тие се оградуваат од се', иако нивното Јавно претпријатие „Паркови и зеленило“ е надлежно за заштита на шумата, вклучувајќи и уништување при градење.

- Град Скопје нема законско право ниту можност да ги санкционира сопствениците на овие објекти, туку само ја обезбедува заштитата на Водно од аспект на заштита на урбаната опрема, одржување на шумата и зеленилото, заштита од пожари, уредување на патеките и облагородување на просторот. Град Скопје повеќепати апелираше до општините да ги почитуваат границите на парк-шумата Водно и да внимаваат околу издавањето градежни дозволи во близина на заштитениот појас. Нарушувањето на природните географски карактеристики на планината може да доведе до сериозни нарушувања и појава на свлечишта - објаснија од Градот.

http://dnevnik.com.mk/?ItemID=DA7EAA30D947C34884D898479F88CBD6