Филхармониската сала ќе има акустика како во Бољшој

Акустички салата ќе ја подготви Јорг Кумел од Германија, кој вели дека неговата фирма по исти стандарди го реновира и најпознатиот светски театар - Бољшој во Русија

Сала според светски стандарди ќе добијат македонските филхармоничари

Новата зграда за Македонската филхармонија ќе има акустика иста како во театарот Бољшој. Единствено со таква акустика може да се пофалат неколку нови симфониски концертни сали во Европа. Камен-темелник на новата сала за филхармоничарите беше поставен минатата недела на просторот меѓу Македонската опера и балет и Факултетот за музички уметности. Јорг Кумел, експерт за акустика од Германија, работи на акустичко уредување на салата. Неговиот тим ќе работи детаљно на секој дел од сцената и салата. Најавува дека нашата сала акустички ќе ја уредат со иста сериозниот и професионалност како и останатите сали во светот на кои работеле.

Во моментов тимови од фирмата на Кумел уредуваат и две големи концертни сали во Кина. Тој вели дека ќе работат се' до денот на отворањето на салата, при што ќе употребат современа технологија за прецизно акустичко дотерување на просторот. Ќе се води сметка за дизајнот на концертниот простор, за ходниците, површината на ѕидовите, поставеноста на столовите, материјалите со кои тие ќе бидат обложени.

- Лично ќе бидам одговорен за акустичкиот дизајн на ентериерот и за музичките елементи во комплексот. Нашата работа почнува заедно со почетокот на реализацијата на архитектонскиот проект, а завршува на денот кога ќе биде пресечена лентата на официјалното отворање на салата. Се' ќе биде подредено на задоволување на акустичките перформанси. Потоа останува на музичарите да се трудат да го искористат просторот, неговите одлики и да се покажат во најдобро светло - вели Кумел.

ПРОПУСТИТЕ СЕ НЕДОЗВОЛИВИ

Тој додава дека изработката на салата е предизвик, бидејќи, како што вели, поради имиџот на фирмата не смеат да си дозволат ниту еден најмал пропуст. Ќе се обидеме да направиме концертна сала која ќе им биде конкуренција на најдобрите сали од тој тип низ светот. Ова за нас е голем предизвик, особено зашто градиме за оркестар со одличен квалитет и искуство. За нас тој ансамбл е како птица на која треба да и' се најде покрив под кој ќе може да пее. Оркестарот е квалитетен, но за тој квалитет вистински да се изрази, неопходна му е соодветна сала, која ќе придонесе за уште поголем квалитет - додава Кумел.Главен иницијатор да се ангажира фирмата на Кумел е виолинистот Олег Кондратенко. Првично, за акустичкото уредување на просторот постоеше идеја да се ангажираат луѓе од кај нас. Сепак, како што истакнува Кондратенко, таков кадар кај нас се' уште нема.

- За нас музичарите, најважна е акустиката. Уште од почетокот видовме дека има проблеми со планирањето. На почеток се планираше македонските изведувачи да избираат акустичар што би бил од Македонија. Сепак, ние ниту имаме искуство ниту некоја веќе изградена сала со високи стандарди. Интервениравме до Министерството за култура, по што беше прифатен предлогот да се ангажира познатиот германски акустичар. За нас е најважно да имаме човек кој зад себе има големо искуство. Сега е неопходно и надлежното министерство да си ги исполни обврските кон тие проектанти, за се' да биде завршено навреме - вели Кондратенко.

КВАЛИТЕТНА САМА ЗА СВЕТДИ КОНЦЕРТИ

Според најавеното, новата филхармониска зграда треба да се изгради за една и пол година. Во неа треба да има една голема - симфониска сала и една помала сала за камерни изведби. Домашните уметници се тие што најмногу се радуваат на нејзината изградба. Имаат повеќе причини за радување. Среќни се што конечно Македонската филхармонија, која повеќе од шест децении работеше како потстанар, ќе добие свој дом.

- Се надевам дека салата ќе биде изградена скоро и дека дефинитивно ќе имам можност да одржам многу концерти во неа. Верувам дека објектот ќе биде уште еден поттик и за сите музичари од Македонија и ќе придонесе за поголем квалитет. Се надевам дека салата ќе биде уште една дополнителна мотивација за гостување на многу симфониски оркестри од странство. Не само Скопје, како главен град, туку и народот во Македонија, публиката и воопшто државата заслужува ваков концертен дом - вели виртуозот на пијано, Симон Трпчески.Музичарите од Македонската филхармонија, кои со години настапуваат во салата на Домот на АРМ, со нетрпение чекаат да влезат во нов објект, уреден според сите акустички стандарди.

- Пресреќни сме што ќе добиеме врвна акустична сала. Просторот во кој сега настапуваме е со лоша акустика и колку и да се трудиме не можеме да звучиме добро. Подобро звучи кога свириме во холот отколку кога сме во салата. Затоа новиот објект е огромна придобивка и за нас и за културата во Македонија. Тоа е можност и да викаме добри солисти, диригенти кои не можевме да ги поканиме да настапат кај нас, зашто немаме концертен простор - вели виолинистката Ана Кондратенко.На дел од музичките уметници, се' уште не им се верува дека ќе се гради нов концертен дом.

- Толку сум среќен, што дури не верувам дека ова се случува. Ќе имаме сала која, освен што ќе ни биде дом, ќе ни даде можност за подобра реализација на концертите. Ќе ги имаме и сите оние простории за проби што им се потребни на музичарите. Првпат откако постои Македонската филхармонија ќе се почувствуваме достоинствено. Досега бевме кираџии и никогаш не сме имале нормални услови за работа. Посакуваме само што побрзо да се заврши - вели диригентот Борјан Цанев.